އިނގިރޭސި ޕޮޕް ލަވަކިޔުންތެރިޔާ އޮލީވިއާ ޑީންގެ ލަވައެއްގައި، މަޝްހޫރު ސޯލް ލަވަކިޔުންތެރިޔާ ބިލް ވިދާސްގެ "ޖަސްޓް ދަ ޓޫ އޮފް އަސް" ލަވައިގެ ރާގު ކޮޕީކޮށްފައިވާ ކަމަށް ބުނެ ކެލިފޯނިއާގެ ކޯޓަކަށް މައްސަލައެއް ހުށަހަޅައިފި އެވެ.
މި މައްސަލަ ހުށަހަޅާފައިވަނީ އޮލީވިއާ ޑީން 2025 ވަނަ އަހަރު ނެރުނު އަދި ބްރިޓް އެވޯޑް ކާމިޔާބުކުރި "ދަ އާޓް އޮފް ލަވިން" އަލްބަމްގައި ހިމެނޭ "އައިވް ސީން އިޓް" މި ލަވައާ ގުޅިގެންނެވެ.
"ޖަސްޓް ދަ ޓޫ އޮފް އަސް" އަކީ 1981 ވަނަ އަހަރު ބިލް ވިދާސް ނެރުނު ވަރަށް މަގުބޫލު ލަވައެކެވެ. މަރުވެފައިވާ ލަވަކިޔުންތެރިޔާގެ އުފެއްދުންތަކުގެ ހައްގުތައް ބަލަހައްޓާ ކުންފުނިން ތުހުމަތުކުރާ ގޮތުގައި، މި ދެ ލަވައިގެ މިއުޒިކީ ސިފަތަކުގައި ހުރި އެއްގޮތްކަން ބޮޑުކަމުން، އެއީ އިއްތިފާގަކުން ވެފައިވާ ކަމެއް ކަމަށް ގަބޫލެއް ނުކުރެވެ އެވެ.
މި ދައުވާގައި ބަދަލު ހޯދުމަށް އެދިފައިވަނީ އޮލީވިއާ ޑީންގެ ރެކޯޑް ލޭބަލް ކެޕިޓަލް ރެކޯޑްސް އާއި، މައި ކުންފުނި ޔުނިވާސަލް މިއުޒިކް ގްރޫޕްގެ އިތުރުން އޭނާގެ ލަވަތައް ޝާއިއުކުރާ ކުންފުނިތަކުގެ އަތުންނެވެ. ނަމަވެސް، ލަވަކިޔުންތެރިޔާ އޮލީވިއާ ޑީން ނުވަތަ އެ ލަވަ އުފެއްދުމުގައި ބައިވެރިވި ބާސްޓިއަން ލަންޖެބެކް އަދި މެކްސް ވުލްފްގޭންގްގެ އަތުން ބަދަލު ހޯދުމަކަށް މި ދައުވާގައި އެދިފައެއް ނުވެ އެވެ.
"އައިވް ސީން އިޓް" އަކީ 2025 ވަނަ އަހަރުގެ ސެޕްޓެމްބަރު މަހު ނެރުނު އޮލީވިއާ ޑީންގެ ކާމިޔާބު އަލްބަމް ނިންމާލުމަށް ހިމަނާފައިވާ އެންމެ ފަހު ލަވަ އެވެ.
މިހާތަނަށް ސްޕޮޓިފައި މެދުވެރިކޮށް މި ލަވަ 246 މިލިއަން ފަހަރު އަޑުއަހާފައިވާއިރު، ބިލް ވިދާސްގެ "ޖަސްޓް ދަ ޓޫ އޮފް އަސް" ވަނީ 948 މިލިއަން ފަހަރު އަޑުއަހާފަ އެވެ.
ބިލް ވިދާސްގެ މި ލަވައަކީ ސެކްސަފޯން ކުޅުންތެރިޔާ ގްރޯވާ ވޮޝިންގްޓަން ޖޫނިއާ އާއެކު އުފެއްދި ލަވައެކެވެ. އަދި މި ލަވަ އެންމެ ފުރަތަމަ ނެރުނީ ވެސް ގްރޯވާ ވޮޝިންގްޓަންގެ ނަމުގަ އެވެ.
މި ލަވަ ވަނީ 1981 ވަނަ އަހަރު އެމެރިކާގެ ޗާޓުތަކުގެ ދެވަނަ ހޯދައި، އެންމެ މޮޅު އާރް އެންޑް ބީ ލަވައިގެ ގްރެމީ އެވޯޑް ބިލް ވިދާސް އަށް ހޯދައިދީފަ އެވެ. ބިލް ވިދާސް މަރުވީ 2020 ވަނަ އަހަރު އެވެ.
މިއަހަރުގެ ގްރެމީ އެވޯޑްސްގައި އޮލީވިއާ ޑީން ވަނީ އެންމެ މޮޅު އާ ފަންނާނުގެ މަގާމު ހޯދާފަ އެވެ. އޭނާގެ "ދަ އާޓް އޮފް ލަވިން" އަލްބަމް އެމެރިކާގެ ޗާޓުތަކުގެ ތިންވަނަ އަދި އިނގިރޭސިވިލާތުގެ ޗާޓުގެ އެއްވަނަ ހޯދާފައިވާއިރު، ބްރިޓް އެވޯޑްސްގައި އެއީ އަހަރުގެ އެންމެ މޮޅު އަލްބަމްގެ ގޮތުގައި ވަނީ ހޮވިފަ އެވެ.
