"ނޫނޭ ނަދާލް.. ތަފާތު.. ވަރަށް ތަފާތު.. ނަދާލް.. ނަދާލްއަކީ އަހަރުމެންގެ ބައްޕަގެ ކާފަ ދަރިއެއް ނޫން. އަދި އަހަރެންގެ ދަރިއެއްވެސް ނޫން. ނަދާލްއަކީ.. ނަދާލްއަކީ.." މާޖިދު ވާހަކައިގެ މެދުތެރެއިން އެތަނުގައިހުރި މާޒިޔާއަށް ބަލައިލި އެވެ. "މާޒި.. ނަދާލްއަކީ އަހަރުމެން އެންމެންގެ ކޮއްކޮ. އަހަރުމެންގެ ބައްޕަ މުޖްތަބާގެ އެންމެ ހަގު ދަރި"
މާޖިދު ހާމަކުރީ އެތަނުގައި ތިބި މީހުންނަށް ހީވެސް ކުރަން ނޭނގޭނެހާ ބޮޑު ހަގީގަތެވެ. ވުމާއެކު އެމީހުންނަށް ތިބެވުނީ އެ ހަގީގަތް ގަބޫލުކުރަން ނޭނގިފަ އެވެ. އެންމެންގެ މޫނުމަތިންވެސް ފެންނަން ހުރީ ތަރިބުރައިގެން ގޮސްފައިވާކަމުގެ އަސަރުތަކެވެ.
"ވަޓް ނޮންސެންސް" ނަދާލް އެތަނުގައި އޮތް ހިމޭންކަން ކަނޑުވައިލި އެވެ. އޭނާގެ އަޑުން ފާޅުކުރި ހަރުކަށިކަމުގެ ނިވަލުގައި ހިތުގައި އުފެދުނު ނުތަނަވަސްކަން ފޮރުވައިލަމުން ނެވެ.
"ނަދާލް.. ދަރިފުޅާ އެއީ ހަގީގަތެ-" މާޖިދުގެ ޖުމްލަ މެދުކެނޑުނީ އެވަގުތު ނަދާލް އަތް ހިއްލައިލައި އެ ވާހަކަ ހުއްޓައިލުމަށް އިޝާރާތް ކުރުމުންނެވެ.
"އަޅުގަނޑަށް އެނގޭ އަޅުގަނޑަށް ދެރަގޮތެއް ވާތަން ބަލަން މަންމަވެސް ބައްޕަވެސް ނުހުންނާނެކަން. އެކަމަކު މިކަމުގަ ކުށް ކުރީ އަޅުގަނޑޭ.. މި ފޭކު ވާހަކަތައް ނުހަދާ ޒީންތައާއި ކުޑާއްތަ ބޭނުން އަދަބެއް އަޅުގަނޑަށް ދޭން ދޫކޮށްލަބަލަ" ނަދާލްގެ ބުމަ ގޮށްޖަހައިލި އެވެ.
"ނަދާލް.. މިއީ ދޮގު ވާހަކަތަކެއް ނޫނޭ!" މާޖިދު ގޮނޑިން ތެދުވެގެން އައިސް ނަދާލްގެ ކޮނޑުގައި އަތް ބާއްވައިލި އެވެ. "މިއީ ސީދާ ބައްޕަ ސޮއިކޮށް ދީފައިވާ ހިބައިގެ ލިޔުމެއް.. އިތުރަށްވެސް ހެކި ބޭނުމިއްޔާ މި ކިޔާ" އޭނާ ނަދާލްއަށް ދިއްކޮށްލީ އޭ 4 ސައިޒުގެ ބާ ސިޓީ އުރައެކެވެ.
ނަދާލް ފަހަރަކު މީހެއްގެ މޫނަށް ބަލައިލުމަށްފަހު އެ ސިޓީއުރަ ކަނޑައިލި އެވެ. އެތެރޭގައި ވަނީ މީގެ ފަނަރަ ވަރަކަށް އަހަރު ކުރިން ނޭޕްލްސްގެ ހަސްފަތާލެއްގައި ހަދާފައިވާ ޑީ.އެން.އޭ ރިޕޯޓެއްގެ އިތުރުން، އޭނާ އެތަނެއްގައި މަދު ދުވަސްކޮޅެއް ހޭދަކުރި ޔަތީމުޙާނާއިން ދޫކޮށްފައިވާ ލިޔުންތަކެކެވެ. އެ ހުރިހާ އެއްޗެހީގެ ތެރެއިންވެސް ނަދާލްގެ ސަމާލުކަން އެންމެ ބޮޑަށް ހުއްޓުނީ އޭގައިވާ "ފެކްސް" އެއްގެ ކޮޕީއަކަށެވެ. އޭނާ އެ ފެކްސްގައި ވި އެއްޗެއް ދެތިންފަހަރު ކިޔައިލި އެވެ. ހާމަވެގެންދިޔަ ހަގީގަތާއެކު އޭނާގެ ހަށިގަނޑުގައި އެކީ އައްސިވެގެންގޮސް އަތްފައިން ވާގި ދޫވާހެން ހީވާން ފެށުމުން އެންމެ ކައިރީގައިހުރި ސޯފާ ގޮނޑީގައި އިށީނދެވުނެވެ.
"ދޮންބޭ؟ މިއީ.. މިއީ ކިހިނެއް ހިނގައިދިޔަ ކަމެއް؟" މާޒިޔާގެ އަޑުގައި މަޑު ތުރުތުރުލުމެއް ހުއްޓެވެ. ނަދާލްގެ ހަރަކާތްތައް ހުރިގޮތުން އެހެން އެންމެނެކޭ އެއްގޮތަށް އޭނާއަށްވެސް ދެކެވެމުންދިޔަ ވާހަކަތަކުގެ ތެދުކަން ކަށަވަރުވީ އެވެ.
"މާޒިއަށްވެސް އެނގޭނެ.. މާޒި ވިހެއުމުގެ ތެރޭގަ މަންމަ ނިޔާވީއްސުރެ ބައްޕަގެ ހުރިހާ ވަގުތެއް ހުސްކޮށްލީ އަހަރުމެންނަށާއި ވިޔަފާރިއަށްކަން. ބައްޕައަށް ކިރިޔާވެސް ހިންދެމިލީ އަހަރެން ނުސްރާއާ ކައިވެނިކޮށްގެން ގޭގެ ހުރިހާ ޒިންމާއަކާ ނުސްރާ ހަވާލުވި ފަހުން. އެހިސާބުން ބައްޕަ އަހަރުމެން ދެބެއިންނާއެކު މަސައްކަތް ފެށީ އޭރު ހިންގަމުންދިޔަ ކޭޓަރިންގް ވިޔަފާރި އިތުރު ހަރުފަތަކަށް ގެންދިޔުމަށް" މާޖިދު ކިޔައިދިނެވެ. "އެ މަސައްކަތުގެ ތެރޭގަ އަހަރުމެންނަށް ވަރަށް ގިނަ ވިޔަފާރިވެރިންނާ ބައްދަލުވެ.. ވަރަށް ގިނަ ވިޔަފާރި ދަތުރުތައް ދެވުނު. ނަޝްވާ ލިބުނު ހިސާބުން ނުސްރާގެ ހާލު މާ ދެރަވެގެން އަހަރެންނަށް އެ މަސައްކަތާ ދުރަށް ޖެހިލަން މަޖުބޫރުވި.. އެއީ މުރުޝިދުވެސް ޒީނިޔާއާ ކައިވެނިކުރަން ތައްޔާރުވަމުން ދިޔައިރު. އެހެންވެ އެ ދުވަސްކޮޅު ބައްޕަގެ އެކުވެރި ވިޔަފާރިވެރިންނާއެކު ދަތުރުތަކުގައި ގޮސް އުޅުނީ ބައްޕަ އެކަނި. އެގޮތަށް އިޓަލީއަށް ކުރި ދަތުރެއް ނިންމާފައި އައިސް ބައްޕަ ބޭނުންވީ ވަގުތުން ކުންފުނި ރީބްރޭންޑްކޮށް ރެސްޓޯރެންޓް ޗެއިނެއްގެ ގޮތުގަ ކުރިއަށް ގެންދަން. އަހަރުމެންނާ މަޝްވަރާ ކުރުމުގެ ކުރިން އޭރު އަލަށް ހުޅުވުނު ދެ ރިސޯޓަކުން ބައްޕަ އޮތީ ޑީލްތައް ހަމަޖައްސާފަ. އަހަރުމެންވެސް ވަގުތުން އެ ހިޔާލާ އެއްބަސްވީ. އެފަހަރު ބައްޕައާއެކު ދެ ޝެފުންވެސް ރާއްޖެ ގެނައި. އެތަނުން އެކަކަކީ އުމުރުން ފަންސަވީހަކަށް އަހަރުގެ އަންހެނެއް. ނަމަކީ ޑީނާ."
"މާޒި އޭރު ތަންކޮޅެއް ކުޑަވާނެ. ބާރަ ވަރަކަށް އަހަރު ކަންނޭނގެ ވާނީ. އެކަމަކު މާޒިވެސް ހަނދާން ހުންނާނެ ޑީނާ. ހަމަ ގައިމުވެސް ޒީނިޔާ ހަނދާން ހުންނާނެ" މުރުޝިދު އިތުރުކޮށްލި އެވެ. އެއާއެކު ޒީނިޔާގެ ހަނދާނުގައިވެސް އޭނާއާ ދާދި އެއްވަރު އުމުރުގެ ޑީނާގެ ސޫރަ ކޮށްޓައިލި އެވެ. އެ ސޫރަ އޭނާއަށް ތަސްވީރު ކުރެވިގެން ދިޔައީ ފަނޑުކޮށް ނަމަވެސް ޑީނާގެ މާމުއި ކުލައަށްދާ ދެލޯ އެއީ ހަނދާނުން ނުފޮހެވޭނެހާ ރީތި ދެލޮލެވެ. އެ ދެލޮލުގެ ހަނދާން އާވުމާއެކު ޒީނިޔާއަށް ނަދާލްއާ ދިމާލަށް ބަލައިލެވުނީ ބިރެއް ފެނުނު ފަދައިންނެވެ.
"މިއަދާ ހަމައަށްވެސް.. އަހަރުމެންގެ ސިގްނޭޗަރ ގިނަ ޑިޝްތަކަކީ ޑީނާގެ ރެސިޕީތަކާ އެއްގޮތަށް ތައްޔާރުކުރެވޭ ޑިޝްތަކެއް. ޑީނާ.. ޑީނާ އަހަރުމެންނާއެކު ގާތްގަނޑަކަށް ހަތް އަހަރު މަސައްކަތްކުރި. ހަގީގަތުގެ މި ކުންފުނީގެ ކާމިޔާބީގެ ފަހަތުގަ ފޮރުވިފައިވި އެންމެ ހުނަރުވެރި ދެ އަތަކީ ޑީނާގެ ދެ އަތް. ކުންފުންޏަށްޓަކައި އެ ގުރުބާނީ ވީއިރު ދުވަހަކުވެސް އޭނައަށް ދެވުނު މުސާރަ ފިޔަވައި އިތުރު އެއްވެސް އެއްޗެއް ބަދަލުގައި ނުހޯދާ. އެހެންވެ އަހަރުމެންނަށްވެސް ޑީނާއާމެދު ދެކެވުނީ ވަރަށް ގާތްކޮށް.. ވަރަށް ކުއްލި ނިންމުމެއް އޭރު ޑީނާ އަލުން ގައުމަށް ދާން ނިންމި ނިންމުމަކީ.. އެހިސާބުން އަހަރުމެންނަށް ޑީނާ އެއްކޮށް ގެއްލުނީ. ގުޅޭނެ ގޮތެއްވެސް ނެތް. ވިޔަފާރީގެ ކަންކަމާ އުޅެން ހަދައިގެން އިތުރަށް ހޯދާކަށްވެސް ނޫޅެވުނު. އެހެން ހުއްޓައި އެއްދުވަހަކު ބައްޕައަށް އެޑްރެސްކޮށް އޮފީހަށް އައި ފެކްސްއަކުން އަހަރެމެންނަށް ޑީނާގެ ހަބަރެއް ލިބުނީ. އޭރު އަހަރެމެންނަކަށްވެސް އޭގައި އޮތީ ސީދާ ކީކޭކަމެއް ނޭނގޭ. ބައްޕަ ބުނުއްވިހާވެސް އެއްޗަކީ ޑީނާ ވަރަށް ބަލިވެ އުޅޭ ވާހަކައާއި، ބޭސްފަރުވާ ކުރާނެ ގޮތެއް ނެތް ވާހަކަ. އަހަރުމެން އެއްވެސް ސުވާލަކާނުލައި ބޭސްފަރުވާ ސްޕޮންސާރ ކުރިން. އެ މުއްދަތުގެ ތެރޭގައި އަހަރުމެން ދިޔައީ ހޮސްޕިޓަލް މެދުވެރިކޮށް ޑީނާގެ ހާލުވެސް ބަލަމުން. އޭގެ ދެތިންމަސް ފަހުން އެ ހޮސްޕިޓަލުން ގުޅާފަ ޑީނާ ނިޔާވި ހަބަރު ދިނީ. އެއާއެކު ބައްޕަ އެންމެ ފުރަތަމަވެސް ކުރެއްވި ކަމަކީ އަހަރެންނާއި ނުސްރާ އަދި މުރުޝިދު ގެންގޮސްގެން ހުރިހާ ހަގީގަތެއް ކިޔައި ދިނުން" މާޖިދު އިތުރަށް އޮޅުން ފިލުވައި ދިނެވެ.
"އެ ތެދެއް.. ހުރިހާ ވާހަކައެއް އަހަރުމެންނަށްވެސް އެނގުނީ އެދުވަހު. ޑީނާގެ ދިހަވަރަކަށް އަހަރުގެ ކުއްޖަކު ހުންނަކަމާއި އެ ކުއްޖާގެ ބައްޕައަކީ އަހަރެމެންގެވެސް ބައްޕަކަން. ބައްޕައަށް އެ ފެކްސް ފުރަތަމަ ފޮނުވިއިރުވެސް ޑީނާ ދިރިހުންނާނެކަމުގެ އުއްމީދެއް ނެތް. އެހެންވެ އެ ކުއްޖާއާ ދޭތެރޭ ވިސްނާފަ އަޅާލާނެ އިތުރު މީހަކު ނެތީމަ އޭނައަށް މަޖުބޫރުވީ ބައްޕަގާތުން އެހީއަށް އެދެން. އޭރު އެ އާއިލާގެ އެކަކުވެސް އޭނާއަކާ އަޅައެއް ނުލާ. އެކަމުގައިވެސް އޮތީ ބައްޕަގެ ކުށް. ޑީނާ ބަލިވެ އިންފަހުން އަދި އޭގެ ކުރިންވެސް ބައްޕަގާތު ކައިވެނިކުރަން އެދުނު. އެކަމަކު ބައްޕަ ބުނި ގޮތުގަ ބައްޕަ އެއްވެސް އިރަކު ޑީނާއާ ކައިވެނި ކުރާކަށް ހިޔާލެއް ނުކުރޭ. އެއީ ހަމައެކަނި ބައްޕަގެ އެކަނިވެރިކަން ފިލުވައިލަން- އެހެމް- ޑީނާ ފުރައިގެން ދިޔައީވެސް އެ މައްސަލައިގަކަން އެނގުނީ އެދުވަހު" އެތަނުގައި އިން ނަދާލްއަށް ބަލައިލަމުން މުރުޝިދު ދައްކަމުންދިޔަ ވާހަކަ ކުޑަކޮށް "ސެންސަރު" ކޮށްލި އެވެ.
"ބައްޕަ ވަރަށް ލަދުންހުރެ ހުރިހާ ވާހަކައެއް ކިޔައިދީފަ އަހަރެންނާއި ނުސްރާގާތު އެދުނީ ނަދާލް ގެނެސްގެން އަހަރުމެންގެ ދަރިއެއްގެ ގޮތުގައި ބަލައިދޭން. ބައްޕަ ގަބޫލުކުރިގޮތުގަ އޭރުން ބައްޕަ ކުރި ހުރިހާ ކުށެއް ދުނިޔެއަށްވެސް ފޮރުވުނީ.. އަހަރެންނާއި މުރުޝިދު ފުރަތަމަ އެކަމާ ވަރަށް ދެކޮޅު ހެދިން. އެކަމަކު ބައްޕަގެ އަމިއްލަ އަބުރާއި ހައިސިއްޔަތު ކުޑަވެދާނެކަމުގެ ބިރުގަ ބައްޕަ ދެންވެސް ހުރީ ނަދާލްއަކީ އަމިއްލަ ދަރިއެއްގެ ގޮތުގައި ބަލައިގަންނަން ތައްޔާރަކަށް ނޫން. އަހަރުމެން އެކަމާ އެއްބަސް ނުވެއްޖެނަމަ ނަދާލް އެ ޔަތީމުޙާނާގަ ބޮޑުވާން ދޫކޮށްލަންވެސް ބައްޕަ ފަސްނުޖެހޭނެކަން ފުރަތަމަ ވިސްނުނީ ނުސްރާއަށް. ނުސްރާ ދެކުނު ގޮތުގަ އަހަރުމެންގެ ކޮންމެ މުދަލަކަށް ނަދާލްގެ ހައްގެއްވެސް ވޭ. އަހަރުމެން ނަދާލްއާމެދު ގޯސްކޮށް ކަން ކުރިނަމަ.. ނަދާލް ހާލުގަ ޖެހެން ދޫކޮށްލައިފިނަމަ އަހަރުމެން ކޮންމެވެސް ދުވަހަކުން އެކަމުގެ އަގު ދައްކަން ޖެހޭނެކަމަށް ބުނި. ދެން އަނެއްކާ ޒީނިޔާއަށްވެސް.. އަދި ކުޑާއްތައަށްވެސް އެނގޭނެ ނަޝްވާ ލިބުނު ފަހަރު ނުސްރާގެ ހާލު ގޯސްވިވަރު. އެހާ ދުވަސްވެގެން ދިޔައިރުވެސް އަހަރުމެންނަށް ކުއްޖަކު ނުލިބޭކަން. އަދި މިއަދާ ހަމައަށްވެސް ކުއްޖަކު ނުލިބޭކަން. މައިރާއާއި މަލަކް ވިހެއި ފަހުންވެސް ނުސްރާހުރީ ވަރަށް ކުއްޖަކު ބޭނުންވެފަ. އެހެންވެ ނުސްރާގެ އާދޭހާއި، އޭނަ ދެއްކި ހުރިހާ ވާހަކައަކަށް ވިސްނައިފަ އެންމެފަހުން އަހަރެންނަށްވެސް ބައްޕަ އެދުނުގޮތަށް އެއްބަސްވާން ޖެހުނީ" މާޖިދުގެ ވާހަކަ ނިންމައިލި އެވެ.
"މި ހުރިހާ ދުވަސް ވެގެންދިޔައިރު މުރުޝިދަށް މިއިން ވާހަކައެއް އަހަރެންނަށް އަންގާލުން މުހިއްމު ކަމަކަށް ނުވިތަ؟" ހިމޭންކަމުގެ ސުކޫތަކަށްފަހު ފުރަތަމަ ސުވާލެއް ކުރީ ޒީނިޔާ އެވެ. އެހެނަސް އޭނާގެ ސުވާލާ ވިއްދައި މާޒިޔާވެސް ވާހަކަދައްކަން ފެށި އެވެ. އެއަށްފަހު މާޖިދާއި މުރުޝިދުވެސްމެ އެވެ.
"ޒީންތަ ބަހައްޓާ. ތިމީހުންގެ ކޮއްކޮއަށް.. އަހަރެންނަށް މިކަން އަންގައިލުން މުހިއްމު ކަމަކަށް ނުވިތަ؟ ބަލަ ނަދާލްއަކީ އަހަރެންގެވެސް…"
"ބައްޕައެއްކަމަކު އެ ކުރީ ހާދަ ވިޔާނުދާ ކަމެ…"
"ކޮންމެ ގޮތަކަށް ކަންތައް ހިނގައިދިޔަސް އެއީ މާޒީ.. ޑީނާ ކުރި އެންމެ ފަހުގެ ވަސިއް..."
"ޒީނިޔާ.. މާޒިޔާ.. ހަމަޖެހިބަލަ މިއީ އަހަރެން އެކަނި ނިންމި..."
"ނަދާލް.. ދަރިފުޅު އިތުރަށް އެއްވެސް ކަމެއް އޮޅުންފި…"
އެތަނުގައި ދެކެވެމުންދިޔަ ހުރިހާ ވާހަކައެއް ނަދާލްއަށް އިވެމުން ދިޔައީ ތަރުތީބެއް ނެތި މާ ދުރުން އަންނަ ތަކުރާރުވޭވޭ ހުންނަ އަޑުތަކެއްގެ ގޮތުގަ އެވެ. އެމީހުންގެ ދޫތަކުން އިވެމުން ދިޔައީ އޭނާގެ ނަމެވެ. އެމީހުން މުޚާތިބު ކުރަމުންދިޔައީ އޭނާއާ އެވެ. ނަމަވެސް މާޖިދު އޭނާއަށް "ދަރިފުޅާ"އޭ ކިޔާލައި ގޮވައިލުމުން މިފަހަރު އޭނާގެ ހިތަށް ފިނިކަން ލިބުމުގެ ބަދަލުގައި ރިއްސައިގަތީ ބޮލުގަ އެވެ. މައިރާ "ނެޑް"އޭ ކިޔައި ގޮވައިލި ގޮވުމުގައިހުރި ގާތްކަމުން އޭނާއަށް ވީ އުނދަގުލެވެ. ހަޔާތުގެ ބޮޑުބައި އޭނާއަށް މި ހޭދަކުރެވުނީ ދޮގެއްގެ މަތީގައި ދޮގެއްގެ ގޮތުގަ އެވެ. ހަގީގަތަކީ އޭނާއަކީ އެމީހުން ބޭނުންވެގެން އެ އާއިލާއަށް ގެނެސްފައިހުރި މީހެއް ނޫންކަމެވެ. މަޖުބޫރަކުން އެމީހުންގެ ތެރެއަށް ގެނެވިފައިވާ މީހެއް ކަމެވެ. އަދި އެވެސް އުފަން ބައްޕަ ދުނިޔޭގައި ހުރެމެ ޔަތީމެއްގެ ގޮތުގައި ލޭބަލު ކުރެވިގެނެވެ.
ކުރިމަތީގައިހުރި ކޮފީ މޭޒުމަތީގައި އަޅާފައިވާ ބިއްލޫރިގަނޑުން ފަނޑުފަނޑުކޮށް ފެންނަމުންދިޔަ އަމިއްލަ ސޫރައަށް ނަދާލް ބަލައިލީ ބީރައްޓެހި ގޮތަކަށެވެ. އޭނާގެ ބުމައާއި އިސްތަށިގަނޑާއި މޫނުމަތިންވެސް މާޖިދުގެ ޒުވާން ދުވަހާ އެތައް އެއްގޮތް ސިފަތަކެއް ފެންނަން ހުއްޓެވެ. އެހެނަސް އޭނާއަކީ މާޖިދުގެ ދަރިއެއް ނޫނެވެ. ޙުދު އޭނާއަށްވެސް އޭނާގެ އަމިއްލަ ނަފްސާއި ވަންތުކަން މިހާރު އޮޅިފައިވާކަހަލަ އެވެ. އަތުގެ އިނގިލިތަކުގެ ކުރިން ދޫވެގެންދިޔަ ރިޕޯޓުތައް ބިންމަތީގައި ނުޖެހެނީސް އޭނާ ސޯފާއިން ތެދުވި އެވެ. ލަސް ފިޔަވަޅުތަކެއްގައި އެޕަރޓްމެންޓުން ނުކުތުމަށް ހިނގައިގަތެވެ.
"ނެޑް؟" މައިރާ ބަލާކަށް ނުހުރެ ނަދާލްގެ ފަހަތުން ހިނގައިގަތެވެ. އެ ފަންގިފިލާއަށް ހުއްޓައިލި ލިފްޓުން ދެމީހުން އެކުގައި ޓެރަހަށް މިސްރާބު ޖެހިއިރުވެސް ނަދާލްގެ ހުރީ އިސްޖަހާލައިގެނެވެ. އެހެން ހުރެފައި ހަމަ ކުއްލިއަކަށް އެއް އަތް ކަކުލުގައި ވިއްދާލައި ގުދުވެލަމުން މެއާ ދިމާލުން ގަމީސް ބޮނޑިކޮށްލި އެވެ.
"ނެޑް؟ ނެޑް؟ މީހަކަށް ގޮވަންވީތަ؟" މައިރާ ސިހިފައި ނަދާލްގެ ކޮނޑުގައި އަތް ޖައްސައިލުމާއެކު ނަދާލް އެ އަތް ފޮޅައިލީ ދުރަށެވެ. އެއަށްފަހު ގަދަކަމުން ހަށިގަނޑު ސީދާ ކޮށްލަމުން އެވަގުތު ހުޅުވުނު ލިފްޓުން ނުކުތެވެ. ތުރުތުރު އަޅަމުންދިޔަ ދެފައިން ޓެރަހަށް އަރަންހުރި ހައެއްކަ ހަރުފަތުގެ ސިޑި ގިރާކޮށްލި އެވެ. ޓެރަހުގެ ވައިސާފު އަދި ފެހިކަންގަދަ މާހައުލުގައި އޭނާގެ ނަފްސު ހަމަޖެހޭނެ ކަމަށް އުއްމީދު ކުރަމުންނެވެ. އެހެނަސް އެތެރެއަށް ދަމައިލި ފުރަތަމަ ނޭވާވެސް ކުރުވެގެންގޮސް ކެއްސައިގަނެވުނީ ފުއްޕާމެއަށް ވިހައެއް ފެތުރިގެން ދިޔަ ފަދައިންނެވެ. ފައި އޮޅި ވެއްޓެންދިޔަ ނަމަވެސް ހުށިޔާރުކަމާއެކު އޭނާ އަމިއްލަ ހަށިގަނޑު ކޮންޓްރޯލު ކޮށްލަމުން މޭގައި އަތް އަޅައިގެންހުރެ ފިޔަވަޅަކަށްފަހު ފިޔަވަޅެއް ކުރިއަށް އަޅަމުންދިޔަ އެވެ. އެ ހާމަކަން ބޮޑު މާހައުލުގައިވެސް އޭނާއަށް ކުރެވެމުންދިޔައީ މީހާ ހަތަރު ފަރާތުން ބެދެމުންދާކަމުގެ އިހުސާސެކެވެ. އެ ހާސްކަން އޭނާގެ މުޅި ހަށިގަނޑަށް ފެތުރިގެންގޮސް ބޯ އަނބުރައިގަތުމާއެކު އޭނާއަކަށް ދެން ވީ ގޮތެއް ނޭނގުނެވެ. އެންމެ ކައިރީގައިހުރި ގަސްމުށިގަނޑުގެ ކައިރީގައި ދެކަކޫ ޖަހައިލެވުނީ ކިރިޔާ އެވެ. އެދުވަހު ބުއިހާ ކޮފީއަކާއި ކެވުނު މަދު ކާއެތިކޮޅުވެސް ހޮޑަށްލެވި ހުސްވެއްޖެ އެވެ.
"އެއްކޮށް ދޫކޮށްލާ.. އޭރުން ހަމަ ޖެހޭނީ" ހަޓުން ނެގި ފެންފުޅިއެއް ހިފައިގެން އައި މައިރާ ނަދާލްގެ ބުރަކަށީގައި ޖަހައިލަމުން ފިރުމައިލި އެވެ. އެއާއެކު ނަދާލް މައިރާ ދިއްކޮށްލި ފެންފުޅިން އަނގަ ދޮވެލުމަށްފަހު އެތަނުން ތެދުވެލި އެވެ.
"ކުޑާއްތަ ގާތު ބުނާނީ ޕޮޓް ބަދަލު ކޮށްލަން. މިހާރު ރަނގަޅުތަ؟" މައިރާ އަހައިލި އެވެ. ނަދާލް ޖަވާބު ދޭކަށް ނޫޅުނެވެ. ޓެރަހުގެ ރެއިލިންގައި އަތް އަޅުވައިލައިގެން، ސަރާސަރަށް ފެތުރިފައިވާ ކާރޫބާރޫ ބޮޑު މަގަށް ބަލަހައްޓައިގެން ހުރީ އެވެ. މައިރާވެސް އެ ހިމޭންކަމުގައި ބައިވެރިވެލައިގެން ހުރީ ދައްކާނެ ވާހަކައެއް ދުލަށް ނައުމުންނެވެ.
"ހަހަހަ ހައްހައްހައް.. ހަހަ. ހަ.. ހައް.. ހައް" އިވެންފެށީ ނަދާލްގެ ހުނުމުގެ އަޑެވެ.
މައިރާ ނަދާލްއަށް ބަލައިލީ ހަމްދަރުދީގެ ނަޒަރަކުންނެވެ. ނަދާލްގެ ހުނުމުގައި އުފާވެރިކަމުގެ ޒައްރެއްގެ މިންވަރުވެސް ނެތްކަން އޭނާއަށް އެނގެ އެވެ. އިންތިހާ އުފާވެރިކަން އިންސާނާގެ ލޮލުން ކަރުނަ ހިލުވާލާ ފަދައިން ބޭއިންތިހާ ހިތާމަ ބައެއް މީހުންނަށް ހާމަކުރެވެނީ ވޭނީ ހިނިތުންވުމެއްގެ ސިފައިގައެވެ. އުފަލުގެ އެންމެ މަތީ ދަރަޖައަކީ ރުއިމަށްވެދާ ފަދައިން ހިތާމައިގެ އެންމެ މަތީ ދަރަޖައަކީ ހުނުމަށްވެދެ އެވެ. މިވަގުތު ނަދާލްއަށްވެސް އެ ވަމުންދާ ގޮތަކީ އެއީ އެވެ.
"ނެޑް.. އަ.. އައިމް ރިއަލީ ސޮރީ.." މައިރާއަށް ބުނެވުނެވެ.
“ހަހަހަ ފޯ ވަޓް؟ ހަހަ ވަޓް ޑިޑް ޔޫ ޑޫ؟ ހަހަހަ ހާ ހާ" ނަދާލް ހުނުން ކޮންޓްރޯލް ކުރަމުން ދެލޮލުގެ ކަރުނަވަޅުގައި ބޮޑުވައި އިނގިލި ޖައްސައިލި އެވެ.
"ނެޑް.. އެނގޭދޯ މި ހަގީގަތަކުން ވަކި އެއްވެސް ކަމަކަށް އެއްވެސް ބަދަލެއް ނާންނާނެކަން. ހަމަ ގައިމު.. ހަމަ ގައިމުވެސް އަހަރެންނާއި މަލް ނެޑްއާމެދު ދެކޭގޮތަކަށް އެއްވެސް ބަދަލެއް ނާންނާނެ! ޔޫ ވިލް އޯލްވޭޒް ބީ އަވަރ ކަޒިން ބްރަދަރ.. މައި ކަޒިން ބްރަދަރ.. ޓެކްނިކަލީ ސްޕީކިންގް.. ނެޑް ކުރިއަށްވުރެވެސް އަހަރުމެންނާ ގާތް ދޯ މި ވީ. ޔޫ އަރ އަވަރ ބްލަޑް! އަވަރ ފެމިލީ!" މައިރާ ވާހަކަ ދައްކަމުންދިޔައީ ނަދާލްގެ ވިސްނުންހުރި ހިސާބު ރަނގަޅަށް ދެނެހުރެ ކަހަލަ އެވެ.
"އަހަހަ ނޯ ނޯ ނޯ މައި.. މައިއަކަށް ނޭނގޭނެ. އަހަރެންނަކަށްވެސް މިހާރު ނޭނގެއޭ އަހަރެންނަކީ ކާކު ކަމެއް" ނަދާލް ބޯ ހޫރައިލި އެވެ. އޭނާ އަދިވެސް ހުރީ ޒާތަކަށް ހިނި އައިސްފަ އެވެ.
މައިރާއަށް ނަދާލްގެ ހާލަތު ވިސްނޭނީ ކިހިނެއް ހެއްޔެވެ؟ އޭނާ ދުނިޔެއަށް އުފަންވިއިރު ހުރީ ހަމައެކަނި މަންމައެކެވެ. މައްސަލައެއް ނެތެވެ. އޭނާ އެކަން ގަބޫލުކުރީ އެވެ. އެ މަންމަ ނިޔާވުމުން އެކަންވެސް ގަބޫލު ކުރީ އެވެ. އެއަށްފަހު އޭނާއަށް ދެން ލިބުނީ ލޯބިވާ މަންމައަކާއި ބައްޕައެކެވެ. ކާފައެކެވެ. ފުރިހަމަ އާއިލާ އެކެވެ. ދޮންތައަކާއި ކޮއްކޮ އެކެވެ. އޭނާގެ ލޯބި ނީމޯ އެވެ. ނަމަވެސް، އުމުރުން ދިހަ އަހަރުއްސުރެން އެބަޔަކަށް މައިންބަފައިންގެ އަމިއްލަ ދުލުން މިއަދު އެ ބުނަނީ އޭނާއަކީ އެމީހުންގެ ދަރިއެއް ނޫން ކަމެވެ.
މައިރާއަށް ނަދާލްގެ ހާލަތު ވިސްނޭނީ ކިހިނެއް ހެއްޔެވެ؟ އޭނާގެ މުޅި ހަޔާތް އެމީހެއްގެ އިހުސާންތެރިކަމަށްޓަކައި ދަރަނިވެރިވެގެން އުޅުނު މީހާ އެވީ އޭނާގެ އުފަން ބައްޕައަށެވެ. އެމީހާ ވެދިން އިހުސާންތެރިކަމުގެ އަގު އަދާކުރަން އޭނާ ނުކުރަނީ ކީއް ހެއްޔެވެ؟ އެންމެ ފުރަތަމަ ފަހަރުވެސް އޭނާގެ ލޯބި އޭނާގެ އަތުން ބީވެގެން ދިޔައީ ހަމަ އެމީހަކާ ހެދި އެވެ. އައިލީންއާއި މައިޝާންގެ ކައިވެނި ހުއްޓުވަން އޭނާ ބޭނުންވި ވަރެއް އެހެން އިންސާނަކަށް ނޭނގޭނެ އެވެ. ނަމަވެސް އެއިން ކޮންމެ ފަހަރަކު އެމީހާގެ އިހުސާންތެރިކަން ހަނދާންވެ، ނުފެންނަ ހިލިހިލާއަކުން އޭނާގެ ދެއަތް ބަނދެވިގެން ދިޔައީ އެވެ. އެމީހާއަށް ކުރި ވައުދުގައި އިޒްކާއާއެކު އޮތް ގުޅުން ކުރިއަށް ގެންދަން މަޖުބޫރުވީ އެވެ.
މައިރާއަށް ނަދާލްގެ ހާލަތު ވިސްނޭނީ ކިހިނެއް ހެއްޔެވެ؟ އެމީހާ އޭނާ މައިޝާންއާ ތަފާތުކުރި ކިތަންމެ ފަހަރަކު "ތިހެން ނަހަދާށޭ" ބުނަން ނަދާލްގެ ދޫ ހަރަކާތްކުރި އެވެ. އެއީ އޭނާއާއެކު ކުޅެ މަޖާ ކޮށްލަންވެސް އެ އާއިލާގައިހުރި ހަމައެކަނި ފިރިހެން ކުއްޖާ އެވެ. ވީއިރު އޭނާ ވަކި މައިޝާންގެ ނަފްރަތު ބޭނުންވާނޭ ހެއްޔެވެ؟ ނަމަވެސް ކޮންމެ ފަހަރަކު އެ ޝަކުވާތަކުން ބަރުވެފައިވި ދުލުގައި ދަތް އަޅަން ޖެހުނީ އެމީހާއަށް ކުރި އިޚްތިރާމާއި ގަދަރުގެ ސަބަބުންނެވެ. ގަބޫލު ކުރެވުނީ އެމީހާގެ ކުރިމަތީގައި ބަސްބުނުގެ ހައްގެއް އޭނާއަކަށް ނެތް ކަމެވެ. އާހިރުގައި މައިޝާންގެ ހުރިހާ ރުޅިއެއް އޭނާއަށް އަމާޒުވީ އެވެ. ނޭނގި ތިއްބައި ދެމީހުން ދުޝްމަނުންނަށް ވެގެންގޮސް އެ ދުޝްމަން ކަމަށް އާދަވީ އެވެ. ނޭނގި ތިއްބައި މައިޝާން އާއިލާއާ ދުރުވަމުންގޮސް ބޭރު ތެރެއަށް ގިނަވީ އެވެ. މައިރާ ހީކުރަނީ އޭނާ އެ ހުރިހާ ކަމެއް އަމިއްލަ ނަފްސާ މަތި ނާޅުވާ ކަމަށް ހެއްޔެވެ؟ ޒީނިޔާ އޭނާއަށް ކުރާ ނަފްރަތާމެދުވެސް އޭނާއަށް ހަނު ހުރެވެނީ ކުރެވޭ ކުށްވެރިކަމުގެ އިހުސާސްގެ ސަބަބުންނެވެ.
ޓެރަހުގެ ބޭރުން ފެންނަމުންދިޔަ މަންޒަރަށް ފުރަގަސްދެމުން ނަދާލް ރެއިލިންގައި ބުރަކަށި ޖައްސައިލި އެވެ. އޭނާގެ ތުންފަތުގައި ކުރިންހުރި ހިނިތުންވުން ވަނީ ފިލައިގޮސްފަ އެވެ.
"އައި.. އައި ސޯ ހަރ ޓުޑޭ މައި" ނަދާލްގެ އަޑު މައިރާގެ ކަންފަތާ ހަމައަށް ފޯރީ ކިރިޔަކިރިޔާ އެވެ. "ކްލިނިކް ކައިރިން. މައިއަށް ހީވޭތަ ލޫނާ ދުވަހަކުވެސް އަހަރެންނަށް މަޢާފު ކޮށްދޭނެހެން؟" އޭނާއަށް ހިންދިރުވައިލެވުނެވެ.
ނަދާލްގެ ސުވާލަކަށް މައިރާ ޖަވާބެއް ނުދިނެވެ. ޙުދު އޭނާއަށްވެސް އެ ސުވާލުގެ ޖަވާބެއް ނޭނގޭތީ އެވެ. ނަދާލްގެ ހިތް އިތުރަށް މަރައިލަން އޭނާ ބޭނުން ނުވީ އެވެ. ވުމާއެކު މައިރާވެސް ބަދަލުގައި ކޮށްލީ ސުވާލެކެވެ.
"އެދުވަހު އަހަރެން ހުއްޓުވުނީތީ މިހާރު އެކަމާ ރިގްރެޓް ކުރަންތަ؟" މައިރާ އެއްސެވެ. "އަހަރެމެން އަމިއްލައަށް އިއުތިރާފުވިނަމަ މިއަދު ނެޑްވެސް އަހަރެންވެސް މިވަރަށް ސަފާރ ކުރާކަށް ނުޖެހޭނެ ކަންނޭނގެ. ހުރިހާ ކަމެއް ބޭނުންވާ ގޮތަށް ނުވިޔަސް އެޓްލީސްޓް އަމިއްލަ ހިތްހަމަޖެހުމެއް ލިބުނީސް.. މި ގިލްޓު ކޮންމެވެސް ވަރަކަށް ކުޑަވީސް"
"ޕިސް ނުވާނެ މައި" ނަދާލް ބުންޏެވެ. "ތިހެން ބުނަން ފަސޭހަވެދާނެ އެކަމަކު އަހަރެންނަށް ދޯ އެނގޭނީ މިކަމުގަ އަދި އިތުރު ކިތައް އަތް ވާކަން. މައި ތިބުނާ ހަމަޖެހުން ހޯދޭނީ އަހަރުމެންނަށް ފުލުހުންނާއި ކޯޓުގެ ތެރެއިން އެހީވި އެތައް ބައެއްގެ ހަމަޖެހުން ނަގާލާފަ. ނުވިތާކަށް ރޫމީގެ ފޯލްސް އެސެސްމެންޓް ދިން ސައިކޮލޮޖިސްޓް… ޝީ އިޒް ގޮނަ ލޫޒް އެވްރީތިންގް އެންޑް އިޓްސް ނޮޓް.. އައި ޑޯންޓް.. ހްމްމް. އަހަރެންނަށް އެނގޭ މައިއަށް އިވާން ވަރަށް މުހިއްމުކަން އެކަމަކު އަހަރެންނަކަށް ހިއެއް ނުވޭ އެންމެ މީހެއްގެ ދިރިއުޅުން އަލުން ރިޕެއަރކުރަން އެހާ ގިނަ ބައެއްގެ ދިރިއުޅުން ހަލާކުކޮށްލުމަކީ އެންމެ ރަނގަޅުގޮތްހެން. ދަ ކޮސްޓް އިޒް ޓޫ ހައި"
ނަދާލްގެ ވާހަކައާމެދު ހިތްހަމަނުޖެހުނު ނަމަވެސް މައިރާ އިޙްތިޔާރުކުރީ ހަނު ހުންނާށެވެ. އެ ވާހަކަ ކުރިއަށް ގެންދަން ފަށައިފިނަމަ ނަދާލްއާ ދެބަސްވާން ޖެހޭނެކަން އޭނާއަށް އެނގޭތީ އެވެ. މި ވަގުތަކީ އެ ދެބަސްވުމަށް އެންމެ މުނާސަބު ވަގުތެއް ނޫނެވެ. މިވަގުތު އޭނާގެ އަދި ނަދާލްގެ ދިރިއުޅުންވެސް އޮތީ ވަރަށް ނާޒުކު ފައްތަރެއްގަ އެވެ. މިވަގުތު މުހިއްމީ ދެމީހުން އެކަކުއަނެކަކާ އެކުގައި ތިބުމެވެ.
**************
ކޮންމެއަކަސް އެރޭ ވެގެންދިޔައީ ނަދާލްއަށް ދިގު ރެއަކަށެވެ. ބެލްކަނީގައިހުރި ގޮނޑީގައި ހިޔާލަކަށް ގެއްލިފައި އިނދެވުނުއިރު އެރޭ ޖެހިލާ އެންމެ އަރާމު ވައިރޯޅިއަކަށްވެސް އޭނާގެ އެސްފިޔަތައް ބަރުކޮށްލެވޭ ވަރެއް ނުވި އެވެ. އައިލީންގެ ބަދަލުގައި މިރޭ އޭނާގެ ލޯ މަރައިލެވޭ ކޮންމެ ފަހަރަކު ލޯ މައްޗަށް ސިފަވަމުންދިޔައީ ޑީނާ އެވެ. އޭނާގެ މަންމައާމެދު އެ އާއިލާއިން ވި އިޙުމާލު ހަނދާންވާ ކޮންމެ ފަހަރަކު އޭނާގެ ލޭ ކެކިގަނެ އެވެ. އޭނާގެ މުޅި އުމުރު އެބައެއްދެކެ ނަފްރަތުކުރަމުން އައި ބަޔަކީ އޭނާއާ އެންމެ ގާތުގައިތިބި މީހުންކަން އެނގުމުން އޭނާއަށް އިހުސާސްވަމުން ދިޔައީ ގޮތް ހުސްކަމެވެ.
ކުއްލިއަކަށް ނަދާލްގެ ހަރަކާތްތަކަށް ހަރުކަށިކަމެއް ވެރިވި އެވެ. ސިކުނޑީގައި އެނބުރެމުންދިޔަ ހިޔާލުތަކަށް މިސްރާބެއް ލިބުނު ފަދައިން ގޮނޑިން ތެދުވި އެވެ. ސިޓިންގްރޫމުގެ ފާރުގައި ހަރުކުރެވިފައިހުރި ގަޑިއަށް ބަލައިލުމަށްފަހު އޭނާ އެޕަރޓްމެންޓުން ނުކުތީ ނުސްރާމެން ދިރިއުޅޭ އެޕަރޓްމެންޓްގެ "ޑަބަލް" ތަޅުދަނޑި ހިފައިގެނެވެ. ފަރުވާތެރިކަމާއެކު އެ އެޕަރޓްމެންޓް ހުޅުވައިލަމުން އެތެރެއަށް ވަތްއިރު އޭނާގެ ހަރަކާތްތަކުގައި ވަނީ ސިއްރު ކަމެވެ.
"މާޖިދު ކީއްކުރަންތަ އެވާހަކަ ބުނީ؟" އެނދުމަތީގައި ދެފައި ވަށްކޮށްލައިގެން އިން ނުސްރާ ގިސްލުމުގެ ތެރެއިން އަހައިލި އެވެ. "މާޖިދު އަހަރެންނަށް ވައުދުވީމެއްނު ކަށްވަޅަށް ދާންދެންވެސް އެކަން ސިއްރު ކޮށްދޭން. ބައްޕަ ނިޔާވީމަވެސް ހަމަ އެވާހަކަ ނުދައްކާ ހުރެވުނެއްނު؟ ދެން ވަކި މިހާރު-"
"އަހަރެން ހަގީގަތް ހާމަ ނުކުރިނަމަ ޒީނިޔާ ރޭގަ ހުއްޓައިލީހީ ނަދާލް ފުލުހުންނާ ހަވާލުކޮށްފަ! އަހަރެންނަށް އެނގޭ ނުސްރާވެސް މިހާރު ނަދާލްއާ މޫނު ހަދާފަ ހުއްޓެއްކަމަކު ބޭނުންވާނެ ގޮތެއް ނޫންކަން އެއީ. މާޒިޔާގެ ވިސްނުންވެސް ހުރީ ހަމަ މައިޝާންއަށް ހެދިހެން ނަދާލް މި އާއިލާއާ ވަކިކޮށްލަން. މި ހުރިހާ ދުވަހުވެސް ނަދާލްގެ އަމިއްލަ ހިއްސާތަކުގެ ވާހަކަ ވަކިން ނުދައްކާ ހުރެވުނީ ނަދާލް އަހަރުމެން ނިންމި ކޮންމެ ނިންމުމަކާ އެއްކޮޅަށް ހުރީމަ. ހުރިހާ ނިންމުމެއްވެސް ފާސްކުރެވުނީ އިއްތިފާގުން. އެކަމަކު ދެން ނަދާލް އަހަރުމެންނާ ދެބަސްވެއްޖެ ހާލަތެއްގައިވެސް މައިރާއާ ވާހަކަދައްކައިގެން ހުރިހާ ކަމަކުން ރެކި ގަންނާނެ ފުރުސަތެއް އަހަރެން މި ދިނީ" ނުސްރާއާ ޖެހިގެން އެނދުގެ ވައަތް ފަރާތުގައި އޮތް މާޖިދު ނިތްކުރި މަތީގައި އަތް ބާއްވައިލި އެވެ.
"އަހަރެންނަކަށް ނޭނގެ ދެން ނަދާލްއާ ކުރިމަތިލާނީ ކިހިނެއް ކަމެއް.. ދެން ނަދާލް އަހަރުމެންނާ ދޭތެރޭގަ ދެކޭނީ މާ ދުރުކޮށް" ނުސްރާގެ އަނެއްކާވެސް ކަރުނަ ފޮހެލަމުން ބުންޏެވެ. މާޖިދު އިރުކޮޅަކު ނުސްރާގެ ރުއިމުގެ އަޑު އަހަން އޮތުމަށްފަހު ބޯ ހޫރައިލި އެވެ. އަދި އެނދުގެ އަނެއް ފަރާތަށް އެނބުރިލަމުން ދެލޯ މަރައިލި އެވެ.
މާޖިދު ނިދުމުންވެސް ނުސްރާއަށް އެތައް އިރަކު އެކަމާ ވިސްނައި ފިކުރު ކުރަން އިނދެވުނެވެ. ނުނިދޭނެކަން ޔަގީން ކުރެވުމުން އޭނާ ނުކުމެލީ ސިޓިންގްރޫމަށެވެ. ލަސް ހިނގުމެއްގައިގޮސް ބަދިގޭގެ ކައުންޓަރު މަތީގައިހުރި ބިއްލޫރި ކަރަންޓު ޖަގު ޖައްސައިލި އެވެ. އެ ޖަގުގެ ތެރޭގައި ބޮކިޖަހައި ކެކެމުންދިޔަ ފެނަށް ގެއްލިފައި ހުރެވެނިކޮށް އޭނާ ސިއްސައިގެން ދިޔައީ ނަދާލް ކުޑައިރު އުޅުނު ކޮޓަރި ތެރެއިން ވަރަށް ބާރަށް އެއްޗެއް ވެއްޓުނު އަޑު އިވުމުންނެވެ.
ނުސްރާ އެ ކޮޓަރިއާ ދިމާލަށް ފިޔަވަޅުތައް އަވަސްކޮށްލި އެވެ. ދޮރު ހުޅުވައިލުމާއެކު ފެނުނު މަންޒަރުން އޭނާއަށް ބުމަ ގޮށްޖަހައިލެވުނެވެ. އޭނާ ނުހަނު ތަރުތީބުކޮށް ބަހައްޓާ އެ ކޮޓަރީގެ ތަރުތީބުކަން ވަނީ ގެއްލުވައިލެވިފަ އެވެ. އެތަނުގައި ރައްކާކޮށްފައިހުރި ލިޔުންތަކާއި ފައިލްތަކުގެ އިތުރުން އަލަމާރީގައިހުރި އެހެނިހެން ސާމާނުވެސް މޭޒުމައްޗާއި އެނދުމަތީގައި ފަތުރާލެވިފައި ހުއްޓެވެ. އަދި ބައެއް އެއްޗެހި ބިންމަތީގައިވެސް ހުއްޓެވެ.
"ނަދާލް؟"ނުސްރާ ކޮޓަރީގެ ތެރެއަށް ނަޒަރު ހިންގައިލަމުން ކުރިއަށް ފިޔަވަޅެއް އަޅައިލި އެވެ. އޭނާގެ ދެލޯ ނަދާލްއާ ހަމަ ނުކުރަނީސް ނަދާލް އައިސް އޭނާއާ ޖެހޭ ނުޖެހޭހާ ގާތަށް ހުއްޓިލައިފި އެވެ.
"ކޮބާ ޕާސްޕޯޓު؟" ނަދާލް ވައިއަޑުން އަހައިލި އެވެ. ހީވާ ގޮތުން އެވަގުތު މާޖިދު ހޭލައްވަން އޭނާ ބޭނުން ނުވީ އެވެ.
"ކި.. ކީއްކުރަން؟" ނުސްރާގެ އަޑުގައި ޖެހިލުންކަމެއް ހުއްޓެވެ.
"ކޮބާހޭ ޕާސްޕޯޓު؟" ނަދާލްގެ ސުވާލު ތަކުރާރުކޮށްލި އެވެ.
"ފުލުހުން އަތުގައެއްނު؟" ނުސްރާ ހަނދާން ކޮށްދިނީ ކުންފުންޏާ ގުޅޭ މައްސަލަތަކުގެ ތަހުގީގަށް ފުލުހުން ނަދާލްއާއި މައިރާ އަދި މާޖިދާއި މުރުޝިދުގެ ޕާސްޕޯޓު ހިފަހައްޓައިފައިވާ ކަމެވެ. އެހެނަސް ފުލުހުން އެކަމުގައި ހިފަހައްޓާފައިވަނީ ހަމައެކަނި ރާއްޖޭގެ ޕާސްޕޯޓެވެ. ނަދާލް ދައްކަމުންދިޔައީ އިޓަލީވިލާތުން އޭނާއަށް ދޫކޮށްފައިވާ ޕާސްޕޯޓުގެ ވާހަކަ އެވެ. ބޭރުގެ ގިނަ ދަތުރުތަކަށް އޭނާ ބޭނުންކުރާ ޕާސްޕޯޓަކީވެސް އެއީ އެވެ. ވުމާއެކު އޭނާ ދަނީ ރާއްޖޭގައި އުޅުނަސް ގަވައިދުން އެ ޕާސްޕޯޓު އާ ކުރަމުންނެވެ. އެހެނިހެން މުހިއްމު ލިޔެކިޔުންތަކާއެކު ޕާސްޕޯޓު ރައްކާކުރަން ދީފައި އޮންނަނީ ނުސްރާގެ އަތަށެވެ.
"ހަމަ ރަނގަޅަށް އެނގޭނެ އަހަރެން މި ދައްކަނީ ކޮން ޕާސްޕޯޓެއްގެ ވާހަކައެއްކަން!" ނަދާލްއަށް ދަތްކުނޑި ވިކައިލެވުނުއިރު އޭނާގެ އަޑަށްވެސް އިތުރު ބާރެއް ލެވުނެވެ.
"ނަދާލް!" ނުސްރާ ނުރުހިފައި ގޮވައިލި އެވެ. "ނަދާލްއަށް އިވުނީ ކޮންމެ ފެންވަރެއްގެ ހަގީގަތެއްވިޔަސް ނަދާލްއަށް ތި ފާޑަކަށް އަހަރެންނަކާ ވާހަކައެއް ނުދެއްކޭނެ. މިއަދު އަހަރެންނަށްވުރެ އަޑުބާރުވިޔަސް.. މިއަދު ނަދާލްއަކީ މި އާއިލާގެ ދަރިއަކަށްވެފަ އަހަރެންނަކީ ބީރައްޓެހި މީހާ ކަމުގައިވިޔަސް.. އަހަރެން ނަދާލްގެ ދަށުވާކަށް ނުޖެހެއޭ!"
"މޯމް.. އެހެން.. އެހެނެއް ނުބުނަމެއްނު؟ ތިއީ ކޮން ވާހަކައެއް؟" ނަދާލްގެ ވާހަކައިގެ ރާގު ވަގުތުން ބަދަލުވި އެވެ.
"ނަދާލް ކޮންކަމަކު ހޯދާ ޕާސްޕޯޓެއް؟" މިފަހަރު ސުވާލުކުރީ ނުސްރާ އެވެ.
ނަދާލް ފުންނޭވާއެއް ދޫކޮށްލުމަށްފަހު އުނަގަނޑުގައި ދެއަތް އަޅުވައިލި ގޮތުން ނުސްރާއަށް އެ ސުވާލުގެ ޖަވާބު ލިބުނެވެ. އެއާއެކު ނުސްރާގެ މޫނުމަތިން ނުރުހުމުގެ އަސަރު ފިލައިގޮސް މާޔޫސްކަމުގެ ކުލަވަރު ފާއްދައިލި އެވެ.
"މި ހުރިހާދުވަހު ނަދާލް އަހަރެންނަށް މަންމައެއްގެ ލަގަބު ދިނީ ހަމައެކަނި ނަމެއްގައިތަ؟ ސޯޅަ އަހަރުވީއިރުވެސް ނަދާލްގެ ހިތުން އަހަރެންނަށް މަންމައެއްގެ މަގާމު ނުދެވުނުދޯ؟" ނުސްރާގެ އަޑުގައިވަނީ ހިތްދަތި ކަމެވެ. "އާން އެހެންވެތާ؟ މީގެ ދެތިން ގަޑިއިރު ކުރިން އެނގުނު ވާހަކަތަކެއްގެ ސަބަބުން ނަދާލް އަހަރެންނާ ތިހާ އިޚްތިރާމް ކުޑަކޮށް ތި ވާހަކަދައްކަނީ. ބުނަން.. ނަދާލް.. ނަދާލް ބޭނުން ތާކަށް ނަދާލް ދާންވީ.. އަހަރެން ގަބޫލުކުރަން ނަދާލް ހުއްޓުވުމުގެ ހައިސިއްޔަތެއް އަހަރެންގެ ނެތް ކަމަށް. އަހަރެން.. އަހަރެން ބޭނުމެއް ނޫން ނަދާލްއަށްޓަކައި އަހަރެން ކޮށްދިން ކަންކަމަށް ކަލަ ގޮވައިގެން ނަދާލް ހިފަހައްޓާކަށްވެސް. އެއީ ކީއްވެކަން އެނގޭތަ؟ އަހަރެން ނަދާލްއާމެދު ދެކުނީ.. އަދިވެސް ދެކެނީ ތިއީ އަހަރެންގެ އުފަން ދަރިއެއްކަމުގަ. އެކަމު ނަދާލްގެ ހިތުގަ އަހަރެންނާމެދު ދަރިއެއްގެ ކުލުނު ނެތިއްޔާ އަހަރެންނަށްވެސް ރަނގަޅީ.. ވީހާވެސް އަވަހަށް.. ނަދާލް މިތަނުން ދިޔުން" ނުސްރާގެ އަޑު ކުރެހެން ފެށުމާއެކު ނަދާލްއާ ނަޒަރު ވަކިކޮށްލަމުން ކޮޓަރީގެ ތެރެއަށް ހިނގައިގަތެވެ.
ނަދާލް ނުސްރާގެ ހަރަކާތްތަކަށް ބަލަންހުރީ ނުސްރާ ކުރަން މި އުޅޭކަމެއް ދެނެގަތުމުގެ ނިޔަތުގަ އެވެ. އެހެން ހުއްޓައި ނުސްރާ އެނދުމަތީގައި އަޅާފައި އޮތް ގޮދަޑީގެ ކަން ހިއްލައިލި އެވެ.
"އަން މިއޮތީ.. މިއޮތީ ނަދާލް ތި ހޯދާ ޕާސްޕޯޓު" އެތަނުގައި އޮތް ޕާސްޕޯޓު ނަގައި ނަދާލްގެ އަތަށް ދެމުން ނުސްރާ ބުންޏެވެ.
ނުސްރާގެ ފެންކަޅިވެފައިވި ދެލޮލުގައިވި ހިތްހަލާކުގެ އަސަރުތައް ފެނި ނަދާލްގެ ހިތް ވަގުތުން މަޑުވި އެވެ. އެއްޗެކޭ ބުނަން އަނގަ ހުޅުވައިލި ނަމަވެސް ދުލާ ހަމައަށް ބަސްތައް ނުގެނެވެނީސް ނުސްރާގޮސް އެ ކޮޓަރިން ނުކުމެ ދޮރު ލައްޕައިލި އެވެ. އެއާއެކު އޭނާއަށް ގޮތް ހުސްވެފައިވާ މީހަކު ފަދައިން އެނދުގައި އިށީނދެލެވުނެވެ. ކަކުލުގައި ވިއްދައިލި އަތުގެ އިނގިލިތައް ބޮލުގެ އިސްތަށިގަނޑުގެ ތެރެއަށް މަހައިލަމުން އަނެއް އަތުގައި އޮތް ޕާސްޕޯޓަށް ބަލައިލި އެވެ. ނުސްރާ ދެއްކި ވާހަކަތަކާއި އެ އަޑުގައިހުރި ހިތްދަތިކަން ކަންފަތްދޮށުގައި ތަކުރާރުވާން ފެށުމާއެކު އޭނާއަށް އެ ޕާސްޕޯޓު ފެންނަމުންދިޔަ މިންވަރު ހިނދެއް ހިނދަކަށް ދިޔައީ ފުސްވަމުންނެވެ.
ނަދާލް ޗޮކެއް ކަނޑައިލަމުން ޕާސްޕޯޓު ބިންމައްޗަށް ޖެހުމަށްފަހު އެ އަތްވެސް އިސްތަށިގަނޑުގެ ތެރެއިން އަނެއް އަތާ ގުޅުވައި މަހައިލި އެވެ. ނުސްރާގެ ހިތުގަ ޖައްސާފައިދާހާ އޭނާގެ ހިތް ހަރެއްނުވި އެވެ.
********************
ޖެހިގެން އައި ހެނދުނަށް އިރު އެރިއިރު މައިރާ ހުރީ ނަދާލް ދިރިއުޅޭ އެޕަރޓްމެންޓްގަ އެވެ. ނަދާލްއަށް މައިރާ ފެނުމާއެކު ވަގުތުން މައިރާއާ ހަމައަށް ރޭގެ ހަބަރު ދިޔައީކަން ނަގައިގަނެވުނެވެ.
"ސީރިއަސްލީ؟ ޓު ރަން އަވޭ؟ އެއަށްވުރެ ރަނގަޅު ސޮލިއުޝަނެއް ހަމަ ނުފެނުނީ؟" ނަދާލް މައިރާގެ އަޑަށް ބީރު ކަންފަތެއް ދެމުން ފަސްދީ ހިނގައިގަތެވެ. "ބަލަ ނެޑްއާއޭ މި ވާހަކަ ދައްކަނީ!"
"އަހަރެން ދެން ކީއްތަ ކުރަންވީ މައި؟" މައިރާ އަޑަށް ބާރުލާން ފެށުމާއެކު އެއަށްވުރެ ބާރަށް ނަދާލްގެ އަޑު އިވުނެވެ. "މައި ހީކުރަނީ.. މައި ހީކުރަނީ އަހަރެން މިހާރުވެސް މިތާ މި ހުންނަނީ ފަސޭހަވެގެން ކަމަށްތަ! ލޫނާ ދިޔަފަހުން އަހަރެންނަކަށް ނޭނގެ އަހަރެން މިތާ މިކުރަނީ ކީއް ކަމެއް! ހަގީގަތުގަ އަހަރެން ދިރިއުޅުމަށް ކުރާ އެއްވެސް ކަމެއްގެ މަގްސަދެއް ނުފެނޭ! އައި ޖަސްޓް ޕުޓް އެން އެފަރޓް ޑޯންޓް ވޯންޓް ޓު ހަރޓް ދަ ވުމަން ދެޓް ރެއިޒްޑް މީ ބަޓް ނައު-"
"ނައު ވަޓް؟" މައިރާ ނަދާލްގެ ވާހަކަ މެދުކަނޑައިލި އެވެ. “ޝީ އިޒް ސްޓިލް ދަ ވުމަން ދެޓް ރެއިޒްޑް ޔޫ! މިހާރު ވަކި ކޮންކަމެއް ބަދަލުވީ! ބޮޑުބެ ދެއްކި ވާހަކަ ނެޑްއަށްވެސް އިވުނެއްނު. ނުސްދައްތަ ބޭނުންވެގެން ނެޑްއާ ހަވާލުވީ. މީހަކު މަޖުބޫރު ކޮށްގެނެއް ނޫން"
"އެނގެއޭ.. މަންމަ. މަންމަވެސް ބުނީ ތިހެނޭ" ނަދާލް ލަސް ފިޔަވަޅުތަކެއްގައި ގޮސް ބެލްކަންޏަށް ނުކުތެވެ.
ނަދާލްގެ ފަހަތުންދިޔަ މައިރާ ބެލްކަނީގެ ދޮރާ އަރައި ހަމަވުމާއެކު ނޭފަތުގައި އަތް އަޅައިލި އެވެ. "ޗީޑި ދުވާ ވަސް. ޒެފް އައީތަ؟" އޭނާއަށް އަހައިލެވުނެވެ. އެފަދަ ހާމަ ތަނެއްގައި އެހާ ގަދައަށް ސިނގިރޭޓުވަސް ހަރުލާފައި ހުންނާނީ މީހަކަށް އެތަނުގައިހުރެ ހާދަ ސިނގިރޭޓެއް ބޮވިގެނެވެ. ފާޑަކަށް މޫނު ކުނިކޮށްގެން ހުރެ އޭނާ ބެލްކަންޏަށް ނުކުތެވެ. މާވަށިތައް ބަހައްޓާފައިހުރި ހަރުގަނޑުގެ މަތީގައި އޮތް ސިނގިރޭޓު ފޮށްޓާއި ލައިޓަރު އޭނާގެ ލޮލުގައި އަޅައިގަތީ އެހިސާބުންނެވެ.
"ނެޑް؟" ހިތް ގޯސްގޮތަކަށް ތެޅިގަތުމާއެކު މައިރާއަށް ކަންބޮޑުވެފައިހުރެ ނަދާލްއަށް ބަލައިލެވުނެވެ. "ނެޑް ދެން ތިއީ ކޮންކަމެއްތަ؟ ނިކަން ކުޑަކުޑަ ހިތްވަރެއް ލާބަލަ"
މައިރާގެ ވާހަކައަށް ސަމާލުކަން ދިނުމެއްނެތި ނަދާލް ފަރުވާކުޑަ ގޮތަކަށް އެތަނުގައިހުރި ގޮނޑިއަށް ވެއްޓިގަތެވެ. މައިރާއަށް ޖެހުނީ ލިބިފައިހުރި ސިހުމުން އަރައިގަނެ ކުރިން ހުރި ސާބިތުކަން އަޑަށް އިއާދަ ކޮށްލާށެވެ.
"ނެޑް ހީނުކުރައްޗޭ ތިހެން އަމިއްލަ މީހާ ހަލާކުވާން ނެޑް ދޫކޮށްލާފަ އަހަރެން ހުންނާނެއޭ! އައި އޭމް ޑްރޭގިންގް ޔޫ ބެކް ޓު ބިޒްނަސް. ނުވިސްނާ ހުއްޓާ އަހަރެންގެ ބޮލަށް ކޮމްޕެނީ ޖަހާފަ ތިހެނެއް ނުހުރެވޭނެ އިނގޭ! އަދި މިހާރު ތިއީ އަހަރުމެންގެ އެންމެ ބޮޑު ޝެއަރހޯލްޑަރ އެއްނު" މައިރާގެ ވާހަކަ ނިންމައިލީ އަޑަށް މަޒާޖީ ރާގެއް ގެނުވަމުންނެވެ.
"ނޭނގެ މައި.." ނަދާލް ވަރުބަލިވެފައިވާ ފަދައިން ފުން ނޭވާއެއް ދޫކޮށްލި އެވެ. "މި ހިތަށް އަރަނީ އެ ގަބޫލެއް ނުކުރާނަމޭ"
"އެއީ ކީއްވެ؟" މައިރާގެ ބުމަ ގޮށްޖަހައިލި އެވެ.
"ހިއެއް ނުވޭ އެއީ އެންމެ ރަނގަޅު ގޮތް ހެނެއް.. ނޮ ސެމްރާ ގިއުސްޓޯ" ނަދާލް ކޮނޑު އަރުވައިލި އެވެ.
"ތިކަމާ ދެން އަހަރެން ބުނާނީ ވަކި ކީކޭ؟ ނެޑްގެ އަމިއްލައަށް ތިކަމާ ގޮތެއް ނިންމާނީ. މިވަގުތައް ދަނީ އިނގޭ. ޑޯންޓް ޑޫ އެނީތިންގް ސްޓުޕިޑް ނެޑް.. ޕްލީޒް" މައިރާ އެއްފަހަރު ނަދާލްއަށް އަނެއްފަހަރު ހަރުގަނޑުގައި އޮތް ސިނގިރޭޓު ފޮށްޓަށް ބަލައިލުމަށްފަހު އެތަނުން ދިޔަ އެވެ.
*************
ވަގުތަކީ ކޮންމެ ކަމަކަށްވެސް ވާ އެންމެ މޮޅު ފަރުވާއޭ ބުނާ ފަދައިން މަދު ދުވަސްކޮޅެއްގެ ތެރޭގައި އާއިލާގެ އެންމެންވެސް ނަދާލްގެ ހަގީގަތް ގަބޫލުކޮށް އެކަން ބަލައިގެންފި އެވެ. އެކަމުގައި ކުރެވޭނޭ އެހެން ކަމެއްވެސް ނެތުމުންނެވެ. އެންމެންގެ ދިރިއުޅުންވެސް މަޑުމަޑުން އާދައިގެ ހާލަތައް ރުޖޫއަވެއްޖެ އެވެ. ނަދާލްގެ ދިރިއުޅުން ފިޔަވަ އެވެ. އޭނާގެ ގާރުގައި ދެގޮތެއްނުވެ ހުރި މައިރާގެ ނަސޭހަތްތައްވެސް ވެގެންދަނީ ނަދާލްގެ އެއް ކަންފަތުން ވަދެ އަނެއް ކަންފަތުން ނުކުމެގެންދާ މާނައެއް ނެތް ބަސްތަކަކަށެވެ. އޭނާގެ އުޅުމަކަށް ބަދަލެއް ނާދެ އެވެ. އަދިވެސް ހުރެވުނީ އައިލީން އޭނާ ބަހައްޓާފައިދިޔަ ހިސާބުގަ އެވެ.
**************
މަގުގެ އެއްފަރާތުގައިހުރި ފިތުރޯނު ގަހެއްގެ ހިޔަލުގައި ކާރު މަޑުކޮށްލައިގެން އޮތް މައިރާގެ އިނގިލިތައް ނުތަނަވަސްކަމާއެކު ކާރުގެ ހުންގާނުގައި ހަރަކާތް ކުރަމުން ދިޔައިރު އޭނާގެ ނަޒަރު ހުއްޓިފައިވަނީ ދުރުގައިހުރި އިމާރާތަށެވެ. މާ ގިނައިރެއްނުވެ އެ އިމާރާތުގެ މައިދޮރުން އައިލީން ނުކުތްތަން ފެނި މައިރާ އެދިމާލަށް ކާރު ކައިރި ކޮށްލި އެވެ.
"ހާއި.. ލީން ކިހިނެއްތަ؟" ކާރުގެ ކުރީ ސީޓުގައި އައިލީން ހަމަޖެހިލުމާއެކު މައިރާ ގޮވައިލި އެވެ.
"އަހަރެން އަސްލު ބޭނުމެއް ނޫން މައިއާވެސް ކޮންޓެކްޓް ކުރާކަށް. އޮފީހުގެ ނަންބަރުން ގުޅީމަ ނޭނގި ފޯނަށް ޖަވާބު ދެވުނީވެސް. މުހިއްމު ވާހަކައެއް އެބަ އޮތޭ ބުނީމަ މި އައީ" އައިލީން މައިރާއާ ހަތަރުކަޅި ހަމަކޮށް ބަލައިވެސްނުލި އެވެ.
"އޯކޭ.. އަހަރެން ލީންއަކާ ބޭކާރު އެއްވެސް ވާހަކައެއް ނުދައްކާނަން. މަޢާފަކަށްވެސް ނޭދޭނަން. އެނގޭ އެވެސް ވާނީ ބޭކާރު ކަމަކަށްކަން. ދެން ހިނގާ ދޯ ކޮފީއެއް އެއްޗެއް ހިފައިގެންގޮސް ތަނެއްގަ މަޑުކޮށްލަން.. ފިނި ދުވަހެއްނު. ހޮޓް ޗޮކްލެޓް؟" މައިރާ ދައްކަމުންދިޔަ ވާހަކައިގެ މެދުތެރެއިން ފިނި ނޭވާއެއް ދޫކޮށްލި އެވެ. އަދި އައިލީންގެ މޫޑު ރަނގަޅު ކުރެވޭތޯ މަސައްކަތް ކުރަމުން ކާރު ދުއްވައިލި އެވެ. އެމީހުންގެ މަންޒިލަކަށްވީ ހުޅުމާލޭގެ ހުޅަނގު ފަރާތުގައި ހުންނަ ލަކުޑި ފާލަން ތަކެވެ. ކައިރި ތަނަކުން ބުއިންތައް ގަނެލައިގެންގޮސް ފާލަމުން ބޭރަށް ފައި އެލުވާލައިގެން އިށީނެވެ.
"ދެން ކޮން ވާހަކައެއްތަ ދައްކަން ތި އައީ؟" މައިރާ ނަގާނެ ވަރަކަށް ކޮފީތަށްޓާއި މޫދުގެ ފޮޓޯ ނަގައި ނިމެންދެން މަޑުކޮށްލުމަށްފަހު އައިލީން އަހައިލި އެވެ.
"ޕިސްޕިސް ލީންވެސް ދޯ؟ މިހާރު ހަމަ އިވާންއަށް ދޫނުކުރޭ ތި ހުންނަ ރާގުގަނޑު. ތިހާ ރޫޑްވީމަ ލީންއަކާ ނުވެސް ގުޅޭ" މައިރާ ކޮފީތަށި އެއް ކައިރީގައި ބަހައްޓައިލި އެވެ.
"އިވާންއަކީވެސް އޭނަގެ ޒާތުގަ ރޫޑް މީހެއް ނޫނޭ. ބައެއް މީހުންނަށް ހީވާ ކަހަލަ އެމީހުން އައިސް އަހަރުމެންނާ ދޭތެރޭ ކޮންމެ ގޮތަކަށް ކަންކަން ކުރިޔަސް އަހަރުމެން ތިބެން ޖެހޭނީ ހެވިފައޭ" ދުރުގައި އަޅާފައިހުރި ސަފާރީ އޮޑިފަހަރުތަކަށް ބަލަން އިނދެ އައިލީން ބުނެލި އެވެ.
"މައްސަލައެއް ނެތް.. ލީން ބޭނުމީ ސީދާ މައުލޫއަށް ދާންކަމަށްވަންޏާ މި ފަށަނީ. ލީން.. މިފަހުން ނެޑްގެ ހަބަރެއް ބަލައިލިންތަ؟" މައިރާ ކުރި ސުވާލުކުރި އެވެ.
އެހާ ދުވަހަށްފަހު ނަދާލްގެ ނަން އިވުމާއެކު އައިލީންއަށް ލިބުނީ ސިހުމެކެވެ. ނަމަވެސް އެ ސިހުމުގެ ހިލަމެއް މައިރާއަށް ނުވަނީސް މޫނުމަތި އޮމާން ކޮށްލި އެވެ.
"އޭނަ ފޮނުވައިގެން ދޯ ތި އައީ؟ ބުނަން އަހަރެން އޭނަގެ އެއްވެސް ވާހަކައެއް އަޑު އަހާކަށް ބޭނުމެއް ނޫން" އައިލީން ދިމާކޮށްލީ އެތަނުން ތެދުވެގެން ދާށެވެ.
"ލީން އިހަށް މަޑުކޮށްބަލަ" މައިރާ އައިލީންގެ އަތުގައި ހިފެހެއްޓި އެވެ.
"އަހަރެންނަށް ލަސްވެއޭ. ދައްތަ ގެއަށްގޮސް އަހަރެން ހޯދާނެ" އައިލީން ބޭނުންވީ އެތަނުން ދާށެވެ.
"މިހާ އިރުވަންދެންވެސް ތި މަޑުކުރީއެއްނު. އަދި މަޑުކޮށްލަބަ ލީން. އަހަރެން މި އައީ ނެޑް ފޮނުވައިގެނެއް ނޫނޭ!" މައިރާ އައިލީންގެ އަތުން ދޫކުރުމެއް ނެތި ބުންޏެވެ. އައިލީންއަށް ޖެހުނީ ހަތިޔާރު ބެހެއްޓުމަށްފަހު މައިރާގެ ވާހަކަ އަޑު އަހަން އިށީންނާށެވެ.
"ތެދެއް.. އަހަރެން މި އައީ ނެޑްގެ ވާހަކަދައްކަން.. އެކަމަކު ނެޑް ފޮނުވައިގެނެއް ނޫން. އަހަރެންނަށް އަމިއްލައަށް ފެނިގެން. ލީންއަށް މިކަން ނާންގާ ހުންނަން އަހަރެންނަށް ހަމަ ކެތް ނުވީ. ލީން ހަނދާން ހުންނާނެ ކަންނޭނގެ. މިދިޔަ ހަފްތާގެ ކުރީކޮޅު އެއީ.. ޝޯންވެސް މާލޭގެ ހުއްޓާ. ކުޑާއްތަ ބުނެގެން.. ޝޯން އިވާންއާއެކު ކުޑާއްތަމެން ގެއަށް ސައިބޯން ދިޔައެއްނު؟"
މައިރާ އެ ބުނި ދުވަހެއް އައިލީންއަކަށް ނޭނގެ އެވެ. އޭނާގެ މޫނުމަތީގައިވީ ސުވާލުމާކު ޖެހިފަ އެވެ.
"އިވާން ނުބުނޭތަ؟" މައިރާ ހައިރާންވި އެވެ.
"ކޮން ވާހަކައެއް؟" އައިލީންގެ ބުމަ ގޮށްޖެހުނެވެ. އެއާއެކު މައިރާ ކަމަކަށް ތައްޔާރުވެލާ ފަދައިން ހަށިފުރާ ނޭވާއެއް ލިއެވެ. އަދި އެންމެނަށް ހަގީގަތް އެނގުނު ގޮތާއި އެއަށްފަހު ހިނގައިދިޔަ ހުރިހާ ކަމެއްވެސް ކިޔައިދިނެވެ.
"އެރޭ ނޭނގެ ނެޑްއަށް ވެފަހުރި ގޮތެއްވެސް ލީން. ވަގުތުން ފުރައިގެން ދާންވެސް އުޅުނު. ނުސްރާއްތަ ބޮޑު އިމޯޝަނަލް ބްލެކްމެއިލެއް ޖައްސައިގެން މައިތިރިވީ.. އޭގެ ފަހުން އަހަރެންވެސް ވަރަށް މަސައްކަތް ކޮށްފިން އެވާހަކަ ތަންކޮޅެއް ރަނގަޅަށް ދެއްކޭތޯ.. އެކަމަކު ނެޑް ބޭނުމެއް ނުވޭ އެކަކަށްވެސް ފުރުސަތު ދޭކަށް"
މައިރާގެ ވާހަކަތައް އަޑު އަހަން އިސްޖަހައިލައިގެން އިން އައިލީންގެ ލޮލަށް ކަރުނަތަށް ޖަމާވާން ފެށުމާއެކު ދުރަށް މޫނު އަނބުރައިލި އެވެ. އޭނާއަކީ އާންމުގޮތެއްގައިވެސް އެހެން މީހުންގެ ހިތާމަތައް އަޑު އިވޭހިނދު ފަސޭހައިން ރޮވޭ މީހެކެވެ. ވީއިރު އޭނާ އަދިވެސް އެމީހަކުދެކެ ލޯބިވާ މީހަކާ ގުޅޭ އެފަދަ ވާހަކަތަކެއް އިވުމުން ހިތަށް ކިހާ އަސަރެއް ކުރާނޭ ހެއްޔެވެ؟ މިވަގުތު ނަދާލް އުޅޭނެ އެކަނިވެރި ދިރިއުޅުން އޭނާއަށް ތަސައްވުރުވެސް ކޮށްލަން ދައްޗެވެ.
"އަހަރެންނަކަށް ނޭނގެ ލީންއަށް ކިޔައިދީފަ އޮތީ ނެޑްގެ ހަޔާތުން ކިހާ މިންވަރެއް ކަމެއް.. އެކަމަކު އަހަރެން މި ވިސްނަނީ ނެޑް މިވާހަކަތައް ލީންއާ ހިއްސާކޮށްފަ ހުންނާނެ ކަމަށް.. ލީންއަށް އެނގޭތަ ނެޑްގެ މަންމަ ނިޔާވީ ލަންގް ކެންސަރ ޖެހިގެންކަން؟" މައިރާގެ ސުވާލަށް އައިލީން އަވަސް އަވަހަށް ބޯ ޖަހައިލި އެވެ.
"ޝީ ވޯޒް އަ ހެވީ ސްމޯކަރ.. ދެޓް ޓުކް ހަރ ލައިފް.. އެހެންވެ ކުޑަ އިރުއްސުރެން ނެޑް އެކަމަކާ ވަރަށް ދެކޮޅު ކަމެއް ސްމޯކް ކުރުމަކީ.. ބައްޕަމެންވެސް ނެޑް ހުންނަ ތަންތާނގަ ސްމޯކް ނުކުރާނެ. ކިރިޔާވެސް އެކަން ކުރާނެހާ ގަޓްސް ހުންނާނީ ޒެފްގެ. އެކަމަކު މިހާރު ނެޑްވެސް.. ލީންއަށް މިހާރު އެބަ ވިސްނޭތަ އަހަރެން މިވާހަކަ މި ދައްކަނީ ކިހާ ހިސާބަކަށް މިކަން ދިޔައީމަކަން. އިޓްސް ލައިކް ހީ ހޭޒް ލޮސްޓް ހިމްސެލްފް ލީން.. އައި.. އައި ކާންޓް އިވަން ރިކޮގްނައިޒް ދަ ކަޒިން އައި ގްރޫ އަޕް ވިތް އެނީމޯރ އެންޑް ދެޓް ސްކެއަރޒް މީ. ލީން ޕްލީޒް.. އަހަރެންނަށް މިކަމުގަ އެހީއެއް ވެދީބަލަ" މައިރާ އައިލީންގެ އަތް މަތީގައި އަތް ބާއްވައިލި އެވެ. އެހިނދު އެ އަތުގައި ހަރުލާފައިވި މަޑު ތުރުތުރުގެ އިހުސާސް މައިރާއަށް ކުރެވުނެވެ.
"ލީން؟" މައިރާ ކަންބޮޑުވުމާއެކު އައިލީންގެ މޫނަށް ބަލައިލި އެވެ.
"ހިނގަ.. ހިނގާ ގެއަށް" އައިލީންގެ ފެންކަޅިވެފައިވި ދެލޮލުގައިވާ ކަރުނަތައް ފައިބައިގަތެވެ.
"ލީން-"
"މައި ޕްލީޒް.. ހިނގާބަލަ. އަހަރެން ގެއަށް ގެންގޮސްދީ" އައިލީން އާދޭހާއެކު އެދުނެވެ.
މައިރާ އަވަސްއަވަހަށް ބޯ ޖަހައިލުމަށްފަހު އެއް އަތުން އައިލީންގެ އަތުގައި ހިފައިގެންހުރެ އަނެއް އަތުން ދަބަހާއި ކޮފީތަށި ހިފައިލަމުން އެތަނުން ތެދުވި އެވެ. އޭރު އައިލީންގެ ގައިގައި ހަރުލާފައިހުރި ތުރުތުރުން ހީވަނީ އެކުއްޖާ ފުނޑުފުނޑު ވެދާނޭ ހެނެވެ. ދެލޮލުންވެސް ހޯސްލާފައި ކަރުނަ ފައިބަމުންދިޔަ އެވެ. ކާރަށް އެރުމަށްފަހު ލަސްލަހުން ފުންނޭވާތަކެއް ލާން ފެށިތަން ފެނި މައިރާ ކާރު ދުއްވައިލީ ބިއްލޫރިގަނޑު ތިރިކޮށްލަމުންނެވެ. އޭނާއަށް އިނދެވުނީ އައިލީންގެ ނަފްސާނީ ހާލަތަށް ވިސްނާނުލައި އެ ވާހަކަތައް ކިޔައިދެވުނީތީވެސް މޮޔަ ހީވެފަ އެވެ. ނަދާލްއަށް މިކަން އެނގިއްޖެނަމަ އޭނާގެ ދުވަސް ދިޔައީ އެވެ.
ކާރު އޭގެ މަންޒިލާ ހަމައަށް ވާސިލުވިއިރު އައިލީން އިނީ ކޮންމެވެސް ވަރަކަށް ހަމައަކަށް އެޅިފައިހެން ހީވެ އެވެ. އަތްފައިގައިހުރި ތުރުތުރުލުމާއި ލޮލުގައިވި ކަރުނަތަކަށް ނިމުމެއް އައިސްފައިވި ނަމަވެސް އޭނާ އަދިވެސް އިނީ ދެލޯ މަރާލައިގެނެވެ.
"ލީން…" މައިރާ މަޑުމަޑުން އައިލީންގެ ކޮނޑުގައި ކޮށްޓައިލުމާއެކު އައިލީން ދެލޯ ހުޅުވައިލި އެވެ. "ޔޫ އޯކޭ؟"
"ޔާހް.. ޔާހް އައިމް ފައިން" އައިލީން ބުންޏެވެ. އެ ޖަވާބުން މައިރާގެ ނުތަނަވަސްކަމަށް ކުޑަނަމަވެސް ލުޔެއް ލިބުނެވެ.
"މި އާދެވުނީ. ހިނގާ ދާން" މައިރާ ކާރުގެ އިންޖީނު ނިއްވައިލުމަށްފަހު ކާރުން ފޭބުމަށް އަވަސްވެގަތެވެ.
"މައިވެސް ދަންތަ؟" އައިލީން އަހައިލި އެވެ.
"ހްމްމް. ލީން މައްޗަށް އަރުވާލާފަ އަހަރެން ގެއަށް ދާނީ" އައިލީން އެކަނި ދޫކޮށްލާކަށް މައިރާގެ ޟަމީރު އެއްބަހެއް ނުވި އެވެ.
ނުވަވަނަ ފަންގިފިލާއަށް މަޑުކޮށްލި ލިފްޓުން ދެމީހުން ފައިބައިގެންގޮސް އައިލީން ދިރިއުޅޭ އެޕަރޓްމެންޓްގެ ދޮރުމަތީގައި މަޑުކޮށްލި އެވެ. ކީކާޑުން އެޕަރޓްމެންޓް ހުޅުވައިލުމުގެ ކުރިން އައިލީން މައިރާއަށް ބަލައިލީ މައިރާ އަދިވެސް އެތަނުން ދާން ނޫޅޭތީ އެވެ. މައިރާ ހުރީ އައިލީން ކޮޓަރިއާ ހަމައަށްވެސް ގެންގޮސްދީފައި ދާން ކަހަލަ އެވެ. ނަމަވެސް އެޕާރޓްމެންޓަށް ވަންނަން ނެގި ފުރަތަމަ ފިޔަވަޅާއެކު އިވިގެންދިޔަ އިވާންގެ އަޑުން އައިލީންއާއި މައިރާއަށް ސިހިފައި އެކަކު އަނެކަކަށް ބަލައިލެވުނެވެ.
"ލީން ކޮންތާކަށް ގޮސްފަ ތި-" އިވާންއަށްވެސް މައިރާ ފެނިއްޖެކަން ޔަގީން ކުރެވުނީ ކުއްލިއަކަށް ވާހަކަ މެދުކަނޑައިލި ގޮތުންނެވެ. އެ ދެމީހުންގެ ދެމެދުގައި އަވަސް ނަޒަރެއް ބަދަލު ކޮށްލުމަށްފަހު އައިލީންގޮސް ކޮޓަރިއަށް ވަނީ އެކަނިވެލަން ބޭނުންވެފައި ހުރުމުންނެވެ. އެއާއެކު ހޭވެރިކަމެއް ލިބިގެންދިޔަ މީހަކު ފަދައިން މައިރާ ދޮރުމަތީގައި ބެހެއްޓި ފައިވާން އަތަށް ނަގައިގެން އެތަނުން ދާން ހިނގައިގަތެވެ. އެކަން ނާކަމިޔާބުވީ އިވާން ދުރު ފިޔަވަޅުތަކެއްގައި ގޮސް މައިރާގެ އަތުގައި ހިފައި ހުއްޓުވުމުންނެވެ.
"ލުކް އިވާން.. އަހަރެންނަށް އެނގެޔޭ ލީން ގޮވައިގެން ބޭރަށް ދިޔައިމަ އިވާން ހިތްހަމަނު-"
"މައިރާ…" އިވާން އަކުރުތަކަށް ދަމައިލަމުން މައިރާގެ ވާހަކަ މެދު ކަނޑައިލި އެވެ. "އާދެބަ އެތެރެއަށް. ވާހަކަ ދައްކާލަން" އެ އަޑުގައިވަނީ މަޑުމައިތިރި ކަމެވެ. މައިރާއަށް އެއީ ހަގީގަތެއްކަން ވަކިކުރަން ނޭނގިފައި ހުއްޓައި އިވާން ލަސްހަރަކާތަކާއެކު މައިރާގެ އަތުގައި އޮތް ފައިވާން ނަގައި ބިންމައްޗަށް ވައްޓައިލި އެވެ.
-ނުނިމޭ-
