މެމްބަރުން ހަމަކުރުމަށް އިލެކްޝަންސް ކޮމިޝަނުން ދީފައި އޮތް މުއްދަތުގެ ތެރޭގައި މަދުވެގެން 3000 މެމްބަރުން ހަމަކުރެވޭނެކަމުގެ ޔަގީންކަން އެބަ އޮތް ކަމަށް އުވާލާނެކަމުގެ އިންޒާރު ލިބުނު ސިޔާސީ ޕާޓީތަކުން ބުނެފި އެވެ.
އީސީން ވަނީ 3،000 މެމްބަރުން ހަމަނުވާ ހަތަރު ޕާޓީއަކަށް ނޯޓިސް ދިނުމަށް ނިންމައިފަ އެވެ. އެ ހަތަރު ޕާޓީއަކީ މޯލްޑިވްސް ރިފޯމް މޫވްމެންޓް (އެމްއާރުއެމް)، މޯލްޑިވްސް ތާޑްވޭ ޑިމޮކްރެޓްސް (އެމްޓީޑީ)، ދިވެހި ރައްޔިތުންގެ ޕާޓީ (ޑީއާރުޕީ) އަދި މޯލްޑިވްސް ލޭބާ އެންޑް ސޯޝަލް ޑިމޮކްރެޓިކް ޕާޓީ (އެމްއެލްއެސްޑީޕީ) އެވެ. އެ ތިން މަސް ދުވަހުގެ ތެރޭގައި މެމްބަރުންގެ އަދަދު ފުރިހަމަނުކޮށްފިނަމަ، އެ ޕާޓީތައް އުވާލެވޭނެ އެވެ.
އީސީގެ ނޯޓިހާ ގުޅިގެން ސަރުކާރު ހިންގާ ކޯލިޝަނުގައި ހިމެނޭ އެމްއާރުއެމްގެ ސެކްރެޓަރީ ޖެނެރަލް އަބްދުﷲ އަލީމް ވިދާޅުވީ މިހާރު ވެސް އެޕާޓީން ދަނީ 1،000 މެމްބަރުން އެޕާޓީއަށް އިތުރުކުރުމުގެ މަސައްކަތް ކުރަމުން ކަމަށެވެ. އަދި އީސީން ފޯމުތައް ޕްރޮސެސް ކުރުމުގަައި ލަސްތަކެއް ހުރުމުން އެ ޕާޓީގެ ގިނަ ފޯމުތައް ޕްރޮސެސް ނުވެ ހުރި ކަމަށް އޭނާ ވިދާޅުވި އެވެ.
"އިއްޔެ ލިބުނީ ނޯޓިސް. ނޯޓިސް ދިނަސް ޕާޓީ އުވިދާނެކަމުގެ އެއްވެސް ބިރެއް ނެތް. އަޅުގަނޑުމެން މިދަނީ މެމްބަރުން އިތުރުކުރުމުގެ މަސައްކަތް ކުރަމުން. ހަމަކުރެވޭނެކަމުގެ ޔަގީންކަން އެބަ އޮތް،" އަލީމް ވިދާޅުވި އެވެ.
އަލީމް ވިދާޅުވީ ޕާޓީގެ ދަފްތަރުގައި މީގެ ކުރިން 3،000 މެމްބަރުން ތިބޭނެ ކަމަށެވެ. ނަމަވެސް މޯލްޑިވްސް ނެޝަނަލް ޕާޓީ (އެމްއެންޕީ) އުފެއްދުމާއެކު އެމްއާރުއެމްގެ ވަރަށް ގިނަ މެމްބަރުން އެމްއެންޕީއަށް ސޮއިކުރިކަމަށް އީސީގައި އޮންނަ ޕާޓީ ދަފްތަރުން ދައްކާކަމަށް އޭނާ ވިދާޅުވި އެވެ.
"800 އެއްހާ މީހުން އުޅޭ އެހެން. އަޅުގަނޑުމެން ގުޅިން އެ މެމްބަރުންނަށް. އެމީހުންނަށް އެނގިގެން ވީ ކަމެއް ނޫން އެއީ. އެމީހުން ބުނި ސޮއި ނުކުރަމޭ. ދެން އޭގެ ދެބައިކުޅަ އެއްބައި މިހާރު ވެސް އަލުން އެމްއާރުއެމްއާ ގުޅެން ފޯމު ފުރާފަ ވަނީ،" އަލީމް ވިދާޅުވި އެވެ.
އޭނާ ވިދާޅުވީ މެމްބަރުން އެހެން ޕާޓީއަކަށް ގެންދިޔައީ ކިހިނެތް ކަމެއް އެމްއާރުއެމަށް ހޯދިފައިނުވާ ކަމަށެވެ. އަދި އީސީން އެފަދަ މައްސަލަ ބެލުމުގެ އުސޫލެއް ވެސް ނުގެންގުޅޭކަމުގެ މައުލޫމާތުދީފައިވާ ކަމަށް އޭނާ ވިދާޅުވި އެވެ.
އީސީގެ ނޯޓިހާ ގުޅިގެން ކުރީގެ ނައިބު ރައީސް އަހުމަދު އަދީބް އިސްވެ ހުންނަވައި އުފެއްދެވި މޯލްޑިވްސް ތާޑްވޭ ޑިމޮކްރެޓްސް (އެމްޓީޑީ) އިން ވެސް ބުނީ އެ ޕާޓީންވެސް 1،000 ފޯމު އީސީއަށް ހުށަހަޅަން ތައްޔާރުވަމުންދާ ކަމަށެވެ. އެޕާޓީގެ ސެކްރެޓަރީ ޖެނެރަލް އަހުމަދު އަޝްރަފު ވިދާޅުވީ އެމްޓީޑީއަށް މެމްބަރުންގެ އަދަދު ހަމަކުރެވޭނެކަމުގެ ޔަގީންކަން އެބަ އޮތް ކަމަށެވެ.
"އެމްޓީޑީން މިހާރުވެސް އިތުރު ފޯމްތައް ހުށަހަޅަން މިދަނީ ތައްޔާރުވަމުން، މެމްބަރުންގެ އަދަދު ފުރިހަމަކޮށް ކުރިއަށް ދާނީ. އުވިއެއް ނުދާނެ މި ފިކުރެއް،" އަޝްރަފް ވިދާޅުވި އެވެ.
ސިޔާސީ ޕާޓީތަކުގެ އަދަދުތައް ދައްކައިދޭ ޗާޓެެއް. ފޮޓޯ: އަދަދު
ޑީއާރުޕީގެ ލީޑަރު އަދި ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރު ވިދާޅުވީ އީސީން އެ ނޯޓިސް ދިނީ ޑީއާރުޕީ އެއީ މާ ބޮޑު އަދި ވަރުގަދަ ޕާޓީއަކަށްވާތީ ކަމަށެވެ. އަދި ޑީއާރުޕީ އުވިގެން ނުދާނެކަމަށް ވެސް ޖާބިރު ވިދާޅުވި އެވެ.
"މިހާރު އުޅޭނެ 2،800 ކޮންމެވެސް ވަރަކަށް މެމްބަރުން. ފޯމުތައް ލަމުން މިދަނީ. އިރުކޮޅަކުން ބުނާނެ މާ ގިނަ ވެއްޖެއޭ. އަދި 150 ވަރަކަށް ފޯމު ކަންނޭނގެ ލާން ޖެހޭނީ. އާ މެމްބަރުން ހޯދުމުގެ މަސައްކަތް މި ކުރަނީ" ޖާބިރު ވިދާޅުވި އެވެ.
ޑީއާރުޕީއަކީ ރާއްޖޭގައި ސިޔާސީ ޕާޓީތައް އުފައްދަން ފެށިއިރު އެމްޑީޕީއާއެކު ދެން އެންމެ މެމްބަރުން ގިނަ ޕާޓީކަން ފާހަގަކުރެވެ އެވެ. އެޕާޓީ އެންމެ ފުރަތަމަ އުފައްދައިގެން އުޅުނު ދުވަސްވަރު އެޕާޓީގައި 30،000 މެމްބަރުން ތިއްބެވެ.
