"މޯލްޑިވްސް ސްޕޯޓްސް އެވޯޑްސް 2022" އަށް ރާއްޖެ އައި ޓޭބަލް ޓެނިސްގެ ކުރީގެ ދުނިޔޭގެ ޗެމްޕިއަން ކްރޮއޭޝިއާގެ ޒޯރާން ޕްރިމޯރަކް ރާއްޖޭގެ ޓޭބަލް ޓެނިސް ކުޅުންތެރިންނާ ބައްދަލުކޮށް، މުހިންމު ތަޖުރިބާތަކެއް ހިއްސާކޮށްދީފި އެވެ.
ސްޕޯޓްސް އެވޯޑްސް އައި ދުނިޔޭގެ ކުޅިވަރުގެ ތަރިންވަނީ ރާއްޖޭގެ ކުޅިވަރު އެސޯސިއޭޝަންތަކަށް ޒިޔާރަތްކޮށް ކުޅުންތެރިންނާއި ބައްދަލުކޮށް އެ ކުޅުންތެރިންނަށް ހިތްވަރު ދީފަ އެވެ. އެވޯޑަށް އައި ތަރިންގެ ތެރެއިން ސްވިޑެންގެ ކާމިޔާބު ފެތުންތެރިޔާ ސާރާ ހޮޔޯސްޓްރޯމް، ދުނިޔޭގެ ބިލިއާޑް ޗެމްޕިއަން އަލްބިން އޫޝާން، ލަންކާގެ ގައުމީ ނެޓްބޯޅަ ޓީމްގެ ކުރީގެ ކެޕްޓަން ތަރިޖިނީ ސިވަލިންގަމް އަދި ވޮލީ ޗެމްޕިއަން ގިލްބާޓޯ ގޮޑޯއި (ގީބާ)ވެސް ވަނީ ރާއްޖޭގެ އެތުލީޓުންނާ އެކު ވަގުތުކޮޅެއް ހޭދަކޮށް ތަޖުރިބާ ހިއްސާ ކޮށްފަ އެވެ.
ރާއްޖޭގެ ޓީޓީ ކުޅުންތެރިންނާއި، ދުނިޔޭގެ ޓީޓީ ތަރި ޒޯރާން ބައްދަލުކުރުން އޮތީ ހުޅުމާލޭ ޓީޓީ ހޯލުގަ އެވެ.
ޓީޓީ ވޯލްޑް ކަޕްގެ ޗެމްޕިއަންކަން ދެ ފަހަރު ހޯދާފައިވާ ޒޯރާން ވަނީ އޭނާގެ ކުޅުމުގެ ތަޖުރިބާ ރާއްޖޭގެ ކުޅުންތެރިންނާއި ހިއްސާކޮށް ކުޅުންތެރިންގެ ސުވާލުތަކަށް ވެސް ޖަވާބު ދީފަ އެވެ. މީގެ ތެރޭގައި ކެރިއަރުގައި ބޭނުންހިފޭނެ މުހިންމު ކަންތައްތަކާ ގުޅޭ ސުވާލުތަކަށް ވެސް ޒޯރާން ވަނީ ޖަވާބު ދީފަ އެވެ
މީގެ އިތުރުން ރާއްޖޭގެ ގައުމީ ޓީމްގެ ބައެއް ކުޅުންތެރިންނާ އެކު ކުރު ޓްރެއިނިން ސެޝަނެއް ވެސް ކުރިއަށް ގެންދިޔަ އެވެ.
މިސެޝަންގައި ގައުމީ ޓީމުގެ މުހިންމު ގިނަ ކުޅުންތެރިން ބައިވެރިވި އެވެ. އޭގެ ތެރޭގައި މިވަގުތު ރާއްޖެ އައިސްހުރި އަންހެން ޓީޓީ ޗެމްޕިއަން ފާތިމަތު ދީމާ އަލީ، ޒުވާން ތަރި، ރަފާ ނާޒިމް، ފިރިހެން ޗެމްޕިއަން މޫސާ މުންސިފް އަދި ޝައްފާން އިސްމާއިލް ހިމެނެ އެވެ.
މި އިވެންޓަށް ފަހު ޓޭބަލް ޓެނިސް އެސޯސިއޭޝަންގެ އިސްވެރިންނާ އެކު މަޝްވަރާ ބައްދަލުވުމެއް ވެސް ބޭއްވި އެވެ.
ކުޅިވަރާބެހޭ ވަޒީރު އަހުމަދު މަހުލޫފް ވެސް ހިމެނި ވަޑައިގަންނަވާ ގޮތަށް މާގިރި ހޮޓަލްގައި ކުރިއަށްދިޔަ މި ބައްދަލުވުމުގައި ރާއްޖޭގެ ޓީޓީގެ ކުރިއެރުމަށް ކުރެވޭނެ ކަންތައްތަކާއި ގުޅޭގޮތުން މަޝްވަރާ ކުރެވުނެވެ.
ޒޯރާން، 52 އަކީ ހަތް އޮލިމްޕިކްސް އިވެންޓްގައި ވާދަކުރި މަދު އެތުލީޓުންގެ ތެރެއިން އެކަކެވެ. އޭނާ ވަނީ 1998 ވަނަ އަހަރު ޓޭބަލް ޓެނިސްގެ ދުނިޔޭގެ ރޭންކިންގެ ދެ ވަނަ އަށް ޖެހިލައިފަ އެވެ. ކާމިޔާބު ކެރިއަރުގައި 25 އަށް ވުރެ ގިނަ މެޑަލް ހޯދި ޒޯރާން އަކީ ޓީޓީގެ ލެޖެންޑެކެވެ.
ކެރިއަރު ނިންމާލުމަށް ފަހު ވެސް ޓީޓީ އަށް އެކި ހިދުމަތްތައް ކޮށްދެމުން އަންނަ ޒޯރާން ވަނީ 2018 ވަނަ އަހަރު އިންޓަނޭޝަނަލް ޓީޓީ ފެޑެރޭޝަންގެ އެތުލީޓްސް ކޮމިޝަންގެ ޗެއާ އަކަށް އިންތިހާބުވެފަ އެވެ.
