މިލާން (މާޗް 20) - އިޓާލިއަން ލީގުގައި ރޭ އޭސީ މިލާނުން 1-0 އިން ކަލިއަރީ ބަލިކޮށް އެއް ވަނަ މަގާމު ދެމެހެއްޓިއިރު، އެންމެ ފަހުގެ ޗެމްޕިއަން އިންޓަ މިލާން ކުޅުނު މެޗުގައި ފިއޮރެންޓީނާއާ 1-1 އިން އެއްވަރުވެ، ލީގުގެ ރޭހުގައި ފަހަތަށް ދިއުމުގެ ޕްރެޝަރު ބޮޑުވެއްޖެ އެވެ.
މިލާން އެއް ވަނައިގައި އޮތީ 30 މެޗުން 66 ޕޮއިންޓާ އެކު އެވެ. ދެ ވަނައިިގައި އޮތީ ރޭ 2-1 އިން އުދިނޭޒީ ބަލިކުރި ނަޕޯލީ އެވެ. ނަޕޯލީ އަށް 30 މެޗުން ވަނީ 63 ޕޮއިންޓް ލިބިފަ އެވެ. އިންޓަ ތިން ވަނައިގައި އޮތީ 29 މެޗުން 63 ޕޮއިންޓާ އެކު އެވެ.
ރޭ ކަލިއަރީ ދަނޑުގައި މިލާން ކުުޅުނު މި މެޗުގައި މިލާންގެ ހަމައެކަނި ގޯލު ޖެހީ 59 ވަނަ މިނިޓްގައި އަލްޖީރިއާގެ މިޑްފީލްޑަރު އިސްމާއިލް ބެނަސެއާ އެވެ. މިލާންގެ ޑަވިޑޭ ކަލަބްރިއާ އަށް އެ ޓީމުގެ ލީޑުފުޅާކޮށްދޭން ރަނގަޅު ފުރުސަތެއް ލިބުނުއިރު، ކަލިއަރީގެ ލެއޮނާޑޯ ޕަވެލޮޓީ ވަނީ ގޯލެއް ޖެހުމާ ގާތަށް ޖެހިލައިފަ އެވެ.
ލީގުގައި މިލާނުން ބަލިނުވެ، އަށް މެޗު ހަމަކުރިއިރު، ރޭގެ މޮޅަކީ ޖެހިޖެހިގެން ލީގުގައި މޮޅުވި ތިން ވަނަ މެޗެވެ. މިލާނުން މަސައްކަތްކުރަމުން އަންނަނީ 2011 ވަނަ އަހަރަށް ފަހު ފުރަތަމަ ފަހަރަށް އިޓާލިއަން ލީގު ކާމިޔާބު ކުރުމަށެވެ.
ރޭގެ މެޗުގައި މިލާންގެ އިނގިރޭސި ޑިފެންޑަރު ފިކާޔޯ ޓޮމޯރީއާ ކަލިއަރީގެ ސަޕޯޓަރުން ނަސްލީ ގޮތުން ދިމާކޮށްލި މައްސަލައެއް ރެފްރީ ރިޕޯޓްގައި ހިމަނާފައިވާއިރު، އެ މައްސަލަ ބަލާނެ އެވެ.
އިންޓަ ދަނޑުގައި ރޭ ކުޅުނު މެޗުގައި ފިއޮރެންޓީނާ އިން ވަނީ މެޗުގެ 50 ވަނަ މިނިޓްގައި ލޫކަސް ޓޮރޭރާ ޖެހި ގޯލުން ލީޑުނަގައިފަ އެވެ. އޭގެ ފަސް މިނިޓް ފަހުން އިންޓަގެ ޑެންޒެލް ޑަމްފްރީސް ގޯލެއް ޖަހައި، އެއްވަރުކުރި އެވެ. މިއީ އިވާން ޕެރިސިޗް ދިން ބޯޅައަކުން ޖެހި ގޯލެކެވެ. އިންޓަ އިން މި މެޗުން މޮޅުވާން ކުރި މަސައްކަތް ނާކާމިޔާބުވިއިރު، ލީގުގައި އެންމެ ފަހުން ކުޅުނު ހަތް މެޗުގެ ތެރެއިން އިންޓަ މޮޅުވީ އެންމެ މެޗަކުންނެވެ.
ނަޕޯލީ ދަނޑުގައި ރޭ ކުޅުނު މެޗުގައި ޖެރާޑް ޑެލޮފޭއުގެ ގޯލުން އުދިނޭޒީ ފުރަތަމަ ހާފުގައި ލީޑުނެގި އެވެ. އެކަމަކު، ދެ ވަނަ ހާފުގައި ނަޕޯލީން ވަނީ ވިކްޓަ އޮސީމޭންގެ ދެ ގޯލުން ނަތީޖާ އަނބުރާލައިފަ އެވެ. އުދިނޭޒީން މެޗު ނިންމާލީ ކުޅުންތެރިއަކު މަދުކޮށެވެ. އެއީ އުދިނޭޒީގެ ފަހަަތަށް ކުޅޭ ޕަބްލޯ މަރީ އަށް ރަތް ކާޑެއް ދެއްކުމުންނެވެ.
ނަޕޯލީން ވެސް މި ފަހަރުގެ ލީގަށް ވާދަކުރަމުން އަންނައިރު، އެ ޓީމުން މަސައްކަތް ކުރަމުން އަންނަނީ 1990 އަށް ފަހު ފުރަތަމަ ފަހަރަށް އެ ކާމިޔާބީ ހާސިލްކުރުމަށެވެ.
