އުރީދޫ ދިވެހި ޕްރިމިއާ ލީގުގައި މިއަދު ހަވީރު ކުޅުނު މެޗުން ޔުނައިޓެޑް ވިކްޓްރީ (ޔޫވީ) އާއި ޓީސީ ސްޕޯޓްސް ކްލަބް 3-3 އިން އެއްވަރުވެއްޖެ އެވެ.
މި ނަތީޖާއާ އެކު މި ދެ ޓީމަށް ފުރަތަމަ ބުރުގެ މެޗުތައް ނިމިފައިވާއިރު، ޓީސީ އަށް ވަނީ މި ބުރުގައި ގަދަ ހަތަރެއް ޔަގީންވެފަ އެވެ. ޓީސީ ހަތަރު ވަނައިގައި އޮތީ ހަތް މެޗުން 10 ޕޮއިންޓް ހަމަކޮށްގެންނެވެ. ޔުނައިޓެޑް ވިކްޓްރީ ފަސް ވަނައިގައި އޮތީ ހަތް މެޗުން ނުވަ ޕޮއިންޓް ހޯދައިގެންނެވެ.
ޔުނައިޓެޑް ވިކްޓްރީ އިން ވަނީ މިއަދު ހަވީރު ކުޅުނު މެޗު ފަށައިގެން ނުވަ ވަނަ މިނިޓްގައި ގޯލެއް ޖަހައިފަ އެވެ. ޔުނައިޓެޑް ވިކްޓްރީގެ އަލީ ހަމްދާން (އައްޔަ) ގޯލު ކުރިމައްްޗަށް ހުރަސްކޮށްލި ބޯޅަ މުސައްނިފު އަހުމަދު ގޯލަށް ފޮނުވާލި ނަމަވެސް ރެފްރީ ވަނީ އޮފްސައިޑް ކަމަށް ނިންމައިފަ އެވެ.
އޭގެ ތިން މިނިޓް ފަހުން ޓީސީން ލީޑުނެގި އެވެ. އޭރިއާބޭރުން ހަމްދޫން އަބްދުލް ލަތީފް ފޮނުވާލި ބޯޅަ ގޯލަށް ވަނީ ޔުނައިޓެޑް ވިކްޓްރީގެ ކީޕަރު އަނަފް ޒަރިޔަންދު ބޯމަތިން ގޮހެވެ.
މެޗުގެ 21 ވަނަ މިނިޓްގައި ޔުނައިޓެޑް ވިކްޓްރީން އެއްވަރުކުރި އެވެ. މިއީ ޓީސީ އޭރިއާތެރެއިން އައްޔަ ހުސްކޮށްލާފައި ދިން ބޯޅައަކުން އެ ޓީމުގެ ބެލަރޫސް ފޯވާޑް އިވާން ވެރާސް ޖެހި ގޯލެކެވެ. ވެރާސް ވަނީ ބޯޅަ ލިބުމުން ހަމަޖެހިލާފައި ގޯލަށް ފޮނުވާލައިފަ އެވެ.
ޓީސީ އަށް މެޗުގައި ދެ ވަނަ ފަހަރަށް ލީޑުނަގައިދޭން އެެ ޓީމުގެ މިސްރު ފޯވާޑް އޮމަރު ހޮސާމް ސަލާހު ފޮނުވާލި ބޯޅަތައް ދިޔައީ ގޯލާ ސީދާ ނުވެ އެެވެ. ރެފްރީ ހަސަން މުހައްމަދުގެ ނިންމުންތަކާ ދެ ޓީމުގެ ބެންޗުން ވެސް ހިތްހަމަނުޖެހުން ފާޅުކުރަމުންދިޔައިރު، ޓީސީގެ އޮފިޝަލަކަށް ވަނީ ރީނދޫ ކާޑު ދައްކައިފަ އެވެ.
ފުރަތަމަ ހާފު ނިމުމުގެ ކުރިން ޔުނައިޓެޑް ވިކްޓްރީން ވަނީ އަލުން ލީޑުނަގައިފަ އެވެ. ފުރަތަމަ ހާފުގެ އިތުރު ވަގުުތުގައި އޭރިއާތެރެއަށް ހިލޭ ޖެހުމަކުން ހުރަސްވި ބޯޅަ އިވާން ބޮލުން ޖައްސާލުމުން އޭރިއާތެެރެއިން ހުސްކޮށް އަރައި އަލީ ހައިޝަމް (ޗުމްޕު) ވަނީ ބޮލުން ގޯލަށް ފޮނުވާލައިފަ އެވެ.
ޓީސީން އެއްވަރުކުރީ މެޗުގެ 63 ވަނަ މިނިޓްގައި ޒަޔާން ނަސީރު (ޒައްޔު) ޖެހި ގޯލުންނެވެ. ޓީސީ ޓީމުގެ ސަލާހު ދިން ބޯޅައަކުން ޒައްޔު ފޮނުވާލި ބޯޅަ ގޯލަށް ވަނީ ކީޕަރު އަނަފް އަތުގައި ޖެހިފަ އެވެ. ޓީސީން އޭގެ ފަހުން ދިޔައީ ކައުންޓަ އެޓޭކުގައި ލިބޭ ޖާގަތަކުގައި އެޓޭކްކުރެވޭތޯ ބަލަމުންނެވެ. އޭގެއިން ބޯޅައެއްގައި މެޗުގެ 80 ވަނަ މިނިޓްގައި ސަލާހު ވަނީ އެ ޓީމަށް މެޗުގައި ފުރަތަމަ ފަހަރަށް ލީޑުނަގައިދީފަ އެވެ. ބަދަލު ކުޅުންތެރިއެއްގެ ގޮތުގައި ކުޅެން އެރި ފަހުމާން އަބްދުލް ހަމީދު ދިން ބޯޅަ ސަލާހު ވަނީ އޭރިއާ ބޭރުން ކީޕަރު އަނަފް އަތްމަތިން ގޯލުގެ މަތީ ކަނަށް ފޮނުވާލައިފަ އެވެ.
އެކަމަކު، މި ލީޑު ހިފަހައްޓައިލެވުނީ ތިން މިނިޓް ވަންދެނެވެ. އޭރިއާތެރެއަށް ހުރަސްވި ބޯޅައެއް ބޮލުން ގޯލަށް ވައްދާލައި އިވާން ވަނީ ޔުނައިޓެޑް ވިކްޓްރީ އަށް އެއްވަރުކޮށްދީފަ އެވެ. އަލުން ޓީސީ އަށް ކުރި ހޯދައިދޭން ފަހުމާން ދިން ބޯޅައަކުން ސަލާހު ފޮނުވާލި ހަމަލާ ދިޔައީ ހުރަސްދަނޑިމަތިންނެވެ.
ލީގުގައި މިރޭ ކުޅޭ މެޗުން ދަ ގްރާންޑޭ ސްޕޯޓްސް ކްލަބް ނުކުންނާނީ ސުޕަ ޔުނައިޓެޑް ސްޕޯޓްސް (ސަސް)އާ ދެކޮޅަށެވެ. މެޗު ފަށާނީ 9 ޖަހާއިރު އެވެ.
