މެޗުގެ އިތުރު ވަގުތުގެ ތެރޭގައި ޕްރިންސް ބޯޑޫ ޖެހި ގޯލުން 1-0 އިން ކްލަބް ވެލެންސިއާ ބަލިކޮށް ދިރާގު ދިވެހި ޕްރިމިއާ ލީގުގައި ޓީސީ ސްޕޯޓްސް ކްލަބުން މުހިންމު މޮޅެއް ހޯދައިފި އެވެ.
މި ފަހަރުގެ ލީގު ފޯމެޓް ރޭވިފައި އޮތް ގޮތުން، ލީގުގެ ފުލަށް ދާ ދެ ޓީމެއް ރެލިގޭޓްވާނެ އެވެ. އެހެންކަމުން، ރެލިގޭޝަނުން ސަލާމަތްވާން ލީގުގެ ފަހު މެޗުތަކަށް ދާއިރު، ހަތަރު ޓީމަކުން އަންނަނީ މަސައްކަތް ކުރަމުންނެވެ.
ރޭގެ ނަތީޖާއާ އެކު، ޓީސީ ހަތް ވަނައިގައި އޮތީ 16 މެޗުން 15 ޕޮއިންޓް ހޯދައިގެންނެވެ. އަށް ވަނައިގައި އޮތް ކްލަބް ގްރީން ސްޓްރީޓްސް އަށް 16 މެޗުން 11 ޕޮއިންޓް ލިބިފައިވާއިރު، ނުވަ ވަަނައިގައި އޮތް ވެލެންސިއާ އަށް 16 މެޗުން ލިބިފައި އޮތީ އަށް ޕޮއިންޓެވެ. އަދި، އެންމެ ފުލުގައި 16 މެޗުން ހަތް ޕޮއިންޓާ އެކު އޮތީ ޔުނައިޓެޑް ވިކްޓަރީ އެވެ.
ގަލޮޅު ދަނޑުގައި ރޭ ކުޅުނު މެޗުގައި، މުހައްމަދު އާތިފް (އާތީ)ގެ ކޯޗުކަމުގައި ރަނގަޅު ކުޅުމެއް މިހާރު ދައްކަމުން އަންނަ ޓީސީން މޮޅުވީ، އިތުރު ވަގުތުގެ އަށް ވަނަ މިނިޓްގައި ޕްރިންސް ޖެހި ގޯލުންނެވެ. މިއީ ކޯނަރެއްގައި ވެލެންސިއާ އޭރިއާތެރެއިން ލިބުނު ބޯޅައަކުން ޕްރިންސް ޖެހި ލަނޑެކެވެ.
