ރާއްޖޭގެ މަސްވެރިކަމުގެ ސިނާއަތް އިތުރަށް ކުރިއަރުވައި ތަރައްގީކުރުމަށްޓަކައި ސީފުޑް އެކްސްޕޯއެއްގައި ބައިވެރިވެވަޑައިގަތުމަށް ފިޝަރީޒް މިނިސްޓަރު ޑރ. ހުސެއިން ރަޝީދު ހަސަން އެމެރިކާއަށް ވަޑައިގެންފި އެވެ.
އެ ދަތުރުފުޅުގައި މިނިސްޓަރު ހަސަން އެމެރިކާގެ ބޮސްޓޮންގައި އޮންނަ ސީފުޑް އެކްސްޕޯއެއްގައި ބައިވެރިވެވަޑައިގެންނެވިއިރު، އެގައުމުގެ ކެލިފޯނިއާގެ ސެންޓަ ބާބަރާ ޔުނިވާސިޓީގެ ސައިންސްވެރިންނާއިވެސް މިނިސްޓަރު ހަސަން ބައްދަލުކުރައްވާނޭކަމަށް ފިޝަރީޒް މިނިސްޓްރީން ބުނެ އެވެ.
މި ހިނގާ މާޗު މަހުގެ 13-15 އަށް ބޮސްޓޮންގައި އޮތް ސީފުޑް އެކްސްޕޯގައި މިނިސްޓަރު ހަސަން ބައިވެރިވެވަޑައިގަތްއިރު، ރާއްޖޭގެ މަސްވެރިކަމުގެ މާކެޓުގައި ބައިވެރިވާ ގިނަ ކުންފުނިތަކަކުން ވެސް އެ އެކްސްޕޯގައި ބައިވެރިވިކަމަށް ފިޝަރީޒް މިނިސްޓްރީން މައުލޫމާތު ދެ އެވެ.
އެ އެކްސްޕޯގައި ރާއްޖޭގެ މަސްވެރިކަމުގެ އުފެއްދުންތައް ބޭރުގެ ބާޒާރުތަކަށް އިޝްތިހާރުކޮށް މާކެޓްކުރުމުގެ ފުރުސަތު ލިބިގެންދިޔަކަމަށް ފިޝަރީޒް މިނިސްޓްރީން ބުނެ އެވެ.
އަދި ރާއްޖެއިން އެކްސްޕޯޓުކުރާ މަހުގެ ބާވަތްތަކަށް ބޭރުގެ މާކެޓްތަކުން އޮތް ފުރުސަތުތައް ދެނެގަނެވި އިތުރު މާކެޓްތައް ރާއްޖޭގެ އުފެއްދުންތަކަށް ހުޅުވިގެންދިޔަކަމަށް ވެސް މިނިސްޓްރީން އިތުރަށް ބުންޏެވެ.
އެ ދަތުރުފުޅުގައި އެމެރިކާގެ ޔުނިވާސިޓީ އޮފް ސެންޓަ ބާބަރާގެ ސައިންސްވެރިންނާއި މިނިސްޓަރު ހަސަން ބައްދަލުކުރައްވަން ހަމަޖެހިފައިވާއިރު، އެ ބައްދަލުވުމުގައި ހިމާޔަތްކުރެވިފައިވާ ތަންތަނާއި ދެމެހެއްޓެނިވި ގޮތެއްގައި މަސްވެރިކަން ތަރައްގީކުރާނެ ގޮތްތަކާއި ގުޅޭ ގޮތުން މިނިސްޓަރު ހަސަން އެ ސައިންސްވެރިންނާ މަޝްވަރާކުރުމަށް ހަމަޖެހިފައިވާކަމަށް މިނިސްޓްރީން ބުނެ އެވެ.
ހަސަންގެ އެ ދަތުރުފުޅަކީ ރާއްޖޭގެ މަސްވެރިން ބާނާ މަހުގެ ހަމަ އަގު ހޯދައިދިނުމަށް ސަރުކާރުން ކުރާ މަސައްކަތް އިތުރަށް މަގުފަހިކުރުމަށް ކުރައްވާ ދަތުރުފުޅެއްކަމަށް ވެސް ފިޝަރީޒް މިނިސްޓްރީން ބުނެ އެވެ.
