މޯލްޑިވްސް ސްޕޯޓްސް އެވޯޑްސްގައި ބައިވެރިވުމަށް ބްރެޒިލްގެ ވޮލީ ޗެމްޕިއަން ގިލްބާޓޯ ގޮޑޯއި (ގީބާ)، ސެނެގާލްގެ ކުރިގެ ފުޓްބޯޅަ ތަރި ހަލީލޫ ފަޑީގާ، ޕްރޮފެޝަނަލް ވީލް ޗެއާ ޓެނިސް އެތުލީޓް ގޯޑަން ރީޑް އަދި ސްރީ ލަންކާގެ ނެޓްބޯޅަ ލެޖެންޑް ތަރްޖިނީ ސިވަލިންގަމް ރާއްޖެ އަތުވެއްޖެ އެވެ.
ރާއްޖޭގެ ކުޅިވަރު އެތުލީޓުންނާއި ކުޅިވަރުގެ އެކި ފަރާތްތަކުގެ އަގުވަޒަންކުރުމުގެ ގޮތުން ދޭ މޯލްޑިވްސް ސްޕޯޓްސް އެވޯޑުގެ ހަފްލާ އޮންނާނީ އަންނަ ބުރާސްފަތި ދުވަހުގެ ރޭ މާލޭ ކުޅިވަރު އެކުވެނީގަ އެވެ. މި އެވޯޑަށް ދުނިޔޭގެ ކުޅިވަރުގެ މަގުބޫލު ސަހުސިއްޔަތުންނާއި ރާއްޖޭގެ ކުޅިވަރާ ގާތްގުޅުމެއް ބަހައްޓަވައި، ދިވެހި ކުޅިވަރަށް ފުރުސަތުތައް ފަހިކޮށްދެއްވުމަށް އެހީތެރިވެދޭ ބައެއް ގައުމުތަކުގެ ކުޅިވަރު ވުޒާރާގެ ވެރިން ވެސް ބައިވެރިވެ ވަޑައިގަންނަވާނެ އެވެ.
ސެނެގާލްގެ ކުރިގެ ފުޓްބޯޅަ ތަރި ހަލީލޫ ފަޑީގާ ވެލާނާ އިންޓަނޭޝަނަލް އެއާޕޯޓްގައި ހުރެ ސެލްފީއެއް ނަގަނީ.-- ފޮޓޯ: އަބްދުﷲ އިޔާން/ އަދަދު
މި ގޮތުން ހަފްލާގައި ބައިވެރިވުމަށް ސްވިޑެންގެ ކާމިޔާބު ފެތުންތެރިޔާ ސާރާ ހޮޔޯސްޓްރޯމް، ޕޫލް ބިލިއާޑްގެ ދުނިޔޭގެ ޗެމްޕިއަން އޮސްޓްރިއާގެ އަލްބިން އޫޝާން އަދި ކުރީގެ ދުނިޔޭގެ އެންމެ މޮޅު ރެފްރީ ޖަރުމަނުގެ މާކަސް މާކް އިއްޔެ ވަނީ ރާއްޖެ އަތުވެފަ އެވެ.
މިއަދު ހެނދުނު ރާއްޖެ އައި ތަރިންނަކީ ބްރެޒިލްގެ ވޮލީ ޗެމްޕިއަން ގިލްބާޓޯ ގޮޑޯއި (ގީބާ)، ސެނެގާލްގެ ކުރިގެ ފުޓްބޯޅަ ތަރި ހަލީލޫ ފަޑީގާ، ޕްރޮފެޝަނަލް ވީލް ޗެއާ ޓެނިސް އެތުލީޓް ރީޑް އަދި ސްރީ ލަންކާގެ ނެޓްބޯޅަ ލެޖެންޑް ތަރްޖިނީ ސިވަލިންގަމް އެވެ.
މި ތަރިންގެ ތެރެއިން ވޮލީބޯޅައިން އޮލިމްޕިކްސް ރަން މެޑަލް ހޯދާފައިވާ ޗެމްޕިއަން ގީބާ ވަނީ ރާއްޖޭގެ ވޮލީބޯޅަ ކުރިއެރުވުމަށް މި ދަތުރުގައި އޭނާގެ އެހީތެރިކަން ދެއްވާނެ ކަމަށް ބުނެފަ އެވެ. ގީބާ އަކީ ދުނިޔޭގެ ވޮލީބޯޅަ ފެޑެރޭޝަން، އެފްއައިވީބީގެ އެތުލީޓްސް ކޮމިޝަންގެ ސެކްރެޓަރީ އެވެ.
މިއަދު ހެނދުނު ގީބާ މީޑިއާ އަށް އިންޓަވިއު ދެނީ.-- ފޮޓޯ: އަބްދުﷲ އިޔާން/ އަދަދު
ގީބާ ބުނީ މި ފުރުސަތަކީ ރާއްޖޭގެ ކުޅިވަރާއި ވަކިން ހާއްސަކޮށް ވޮލީބޯޅަ ކުޅުންތެރިންނަށް އޭނާގެ ހިޔާލާއި ހުނަރު ހިއްސާކޮށްލަން ލިބޭ ރަނގަޅު ފުރުސަތެއްކަމަށެވެ.
ސެނެގާލްގެ ކުރީގެ ފުޓްބޯޅަ ތަރި ފަޑީގާ ވަނީ އަލަށް ރާއްޖެ އާދެވުމުން އެކަމާއި ހިތްހަމަޖެހުން ފާޅުކޮށްފަ އެވެ. އައި މިނިސްޓަރު މަހުލޫފުގެ އިސްނެންގެވުމާ އެކު މި ބާއްވާ އެވޯޑުގެ ސަބަބުން ރާއްޖޭގެ ކުޅިވަރަށް ކުރިއެރުން އަންނާނެކަމަށް އޭނާ ވަނީ ބުނެފަ އެވެ. އަދި މީގެ އިތުރުން ދުނިޔޭގެ އެކި ގައުމުތަކުގެ ލެޖެންޑުން މި ހަފްލާގައި ބައިވެރިވުމަކީ ކުޅިވަރު އެތުލީޓުންނަށް ލިބޭނެ ހިތްވަރެއް ކަމަށް ވެސް އޭނާ ވަނީ ބުނެފަ އެވެ.
ސްރީ ލަންކާގެ ނެޓްބޯޅަ ލެޖެންޑް ތަރްޖިނީ އަކީ ރާއްޖޭގެ ނެޓްބޯޅައާ ގުޅުން ބޮޑު މޫނެކެވެ. އޭނާ ވަނީ މީގެ ކުރިން ރާއްޖޭގެ ބައެއް މުބާރާތްތަކުގައި ކުޅެފަ އެވެ. އެހެން ކަމުން އޭނާ އަކީ ދިވެހިންނަށް ފަރިތަ މޫނަކަށްވާނެ އެވެ.
ވީލް ޗެއާ ޓެނިސް ޗެމްޕިއަން ގޯޑަން ރީޑް ބުނީ ދިވެހިރާއްޖޭގެ ކުޅުންތެރިންނަށް ކުޅިވަރުގައި ކުރިއަށްދިޔުމަށް ހިތްވަރުދޭން ތައްޔާރަށް ހުރި ކަމަށެވެ، ކުޅިވަރުގައި އެކި މަރުހަލާތައް އޭނާ ކަޑައްތުކުރި ގޮތް ހިއްސާކޮށްލަން ކެތްމަދުވެފައި ހުރިކަމަށް ވެސް ބުނެފައިވެ އެވެ.
ވީލް ޗެއާ އެތުލީޓް ރީޑް އަށް މަރުހަބާ ކިޔަން ކުޑަކުއްޖަކު މާބޮނޑިއެއް ހަވާލުކުރަނީ.-- ފޮޓޯ: އަބްދުﷲ އިޔާން/ އަދަދު
އަންނަ ބުރާސްފަތި ދުވަހުގެ ރޭ އޮންނަ ރަސްމިއްޔާތުގެ ކުރިން އިތުރު ކުޅިވަރު ލެޖެންޑުނެއް ރާއްޖެ އަންނާނެ އެވެ. އޭގެ ތެރޭގައި އޭގެ ތެރޭގައި ޓީޓީ ތަރި ޒޯރާން ޕްރިމޯރަކް އާއި ސްރީލަންކާގެ ކްރިކެޓް ލެޖެންޑް ސަނަތު ޖަޔަސޫރިޔާ އާއި އިންޑިއާގެ ކްރިކެޓް ލެޖެންޑް ސުރޭޝް ރައިނާގެ އިތުރުން ބްރެޒިލްގެ ފުޓްބޯޅަ ތަރި ރޮބާޓޯ ކާލޯސް، ނެދަލެންޑްގެސް ކުރީގެ ފުޓްބޯޅަ ތަރި އެޑްގާ ޑާވިޑްސް އަދި ސްޕެއިނުގެ ފުޓްބޯޅަ ލެޖެންޑް މިކޭލް ސަލްގާޑޯގެ އިތުރުން އިނގިރޭސިވިލާތަށް އުފަން، ވީލްޗެއާ ޓެނިސް ތަރި ލޫސީ ސުކާ ހިމެނެ އެވެ.
މީގެ އިތުރުން މޯލްޑިވްސް ސްޕޯޓްސް އެވޯޑްގައި ބައިވެރިވެވަޑައި ގެންނެވުމަށް ސްރީ ލަންކާގެ ކުޅިވަރާބެހޭ ވަޒީރު ނަމާލް ރާޖަޕަކްސަ އާއި ބަންގްލަދޭޝްގެ ކުޅިވަރު މިނިސްޓަރު ޒާހިދު އަހްސަން ރަސަލް އަދި ސައުދީ އަރަބިއްޔާގެ ކުޅިވަރުގެ ވައިސް މިނިސްޓަރު ބަދޭރް އަލްހާދީ އާއި އިންޑިއާގެ ޔޫތު މިނިސްޓަރު އަނުރާގް ތާކުރް ވެސް ރާއްޖެ ވަޑައިގަންނަވާނެ އެވެ.
