ރައްޔިތުންގެ މަޖިލީހުގެ ސޯޝަލް ކްލަބާއި ޑަޔަބެޓިކްސް ސޮސައިޓީ އޮފް މޯލްޑިވްސް ގުޅިގެން ކުރިއަށް ގެންދާ ހެލްތު ސްކްރީނިން ޕްރޮގްރާމެއް މަޖިލީހުގައި ކުރިއަށް ދާ ވާހަކަ އަކީ އަސްލުގައި މަޖިލީހުގެ ރިޔާސަތުން އިއުލާނު ނުކުރެއްވިޔަސް އަންގައިލެވޭ ކަހަލަ ކަމެކެވެ. އެހެން ނަމަވެސް މަޖިލީހުގެ ރައީސް މުހައްމަދު ނަޝީދު އެ ވާހަކަ ހިމެނުއްވީ މަޖިލީހުގެ ޖަލްސާގެ އެޖެންޑާގައި މުޅިން ހުޅުވާލާފައި އޮންނަ ހަމަ އެކަނި އައިޓަމް ކަމަށްވާ "ރިޔާސަތުން އަންގާ އެންގުން" މި ބައިގަ އެވެ.
އެމަނިކުފާނު ވިދާޅުވި ގޮތުގައި މެމްބަރުން ހެލްތު ސްކްރީން ހެއްދެވުމަކީ އެމަނިކުފާނު "ވަރަށް ބޮޑަށް ލަފާ އަރުވާ ކަމެއް" ކަމަށެވެ. ހެނދުނު ހެނދުނާ ވަޑައިގެން އެމަނިކުފާނު ސްކްރީން ކުރައްވާފައިވާ ކަމަށް ވެސް ވިދާޅުވި އެވެ. ހެލްތު ސްކްރީނިން ޕްރޮގްރާމްގައި ބަލާ ކަންތައްތަކުގެ ތަފްސީލު ވެސް ދެއްވި އެވެ.
"އަޅުގަނޑު ހިތުން މިމައުލޫމާތު ތިޔަ ބޭފުޅުން ކޮންމެހެނަކުން ބޭނުމެއް ނުވާނެ،" އަމިއްލަފުޅު ތަފްސީލްތައް ދެއްވަން ފެށްޓެވުމުގެ ކުރިން ނަޝީދު ވިދާޅުވި އެވެ.
ނަޝީދުގެ ތަފްސީލް
- އުމުރު: 55
- އިސްކޮޅު: 153 ސެންޓިމީޓަރު
- ބަރުދަން: 63.1 ކިލޯ
- ހަކުރު ބައްޔެއް ނެތް
- ކެއުމުގެ ކުރިންނާއި ފަހުން ވެސް ހަކުުރުގެ މިންވަރު ރަނގަޅު
- ބީއެމްއައި: ރަނގަޅުކުރަން ޖެހޭ (ބަރު)
- ލޭގެ ޕްރެޝަރު: ރަނގަޅު
- ސަރުބީގެ ނިސްބަތް: ރަނގަޅު
މަޖިލީހުގައި ކުރިއަށް ގެންދާ ހެލްތު ސްކްރީނިން ޕްރޮގްރާމްގައި ސްކްރީން ކުރުމަށް ފަހު މާހިރުންގެ ލަފާ ދިނުން ވެސް އޮވެ އެވެ. އެގޮތުން ނަޝީދަށް ދެއްވި ލަފާގެ ތަފްސީލް ވެސް އެމަނިކުފާނު ރަސްމީކޮށް މެމްބަެރުންނަށް ދެއްވި އެވެ. އެއް ލަފަޔަކީ ހަފްތާއަކު 150 މިނެޓް ކަސްރަތުކުރެއްވުމަށާއި އެ ގޮތުން ކުރައްވާ ކަސްރަތުގެ ތެރޭގައި އެރޯބިކް ކަސްރަތެއް ހިމެނުއްވުމެވެ. އަނެއް ލަފަޔަކީ ފަރިއްކުޅުއްވާއިރު ހަށިގަނޑަށް ބޭނުންވާ މުހިއްމު ބައިތައް ހިމެނުއްވުމެވެ.
މެމްބަރުންނަށް އެއީ އުނދަގޫ ކަމަށް ވާނެކަން ވެސް އެނގިވަޑައިގަންނަވާ ކަމަށާއި އެހެން ނަމަވެސް އެ މެމްބަރުންގެ ސިއްހީ ހަގީގަތްތައް އެނގިވަޑައިގެން ތިއްބެވުން ބޭނުންތެރިކަމަށް ވެސް ނަޝީދު ވިދާޅުވި އެވެ. އެއީ ސްކްރީނިން ގައި ބައިވެރިވެވަޑައިގެންނެވުމަށް ބާރު އެޅުއްވުމަށެވެ.
