ޕެރިސް (މާޗް 12) - ފްރާންސް ފުޓްބޯލް މެގަޒިންގެ ފަރާތުން މީގެ ކުރިން ކަލަންޑަރު އަހަރަކު އެއްފަހަރު ދެމުން އައި ބެލޮންޑިއޯ އެވޯޑް ސީޒަނަކު އެއްފަހަރު ދޭ ގޮތަށް އެވޯޑްގެ ފޯމެޓް ބަދަލުކޮށްފި އެވެ.
ބެލޮންޑިއޯ އެވޯޑްގެ ފޯމެޓް ބަދަލުކުރަން ފްރާންސް ފުޓްބޯލް އިން ނިންމާފައިވަނީ ޖަޖުންގެ އަދަދު ވެސް މަދު ކުރުމަށް ފަހު އެވެ. މީގެ ކުރިން 170 ޖަޖުންގެ މެދުގައި އެންމެ މޮޅު ފިރިހެން ފުޓްބޯޅަ ކުޅުންތެރިޔާ ހޮވި ނަމަވެސް ދެން އެ އެވޯޑަށް އިންސާފުކުރާނީ 100 ޖަޖުން/ނޫސްވެރިންގެ ޕެނަލުންނެވެ. އަދި އަންހެން ފުޓްބޯޅަ ކުޅުންތެރިޔާ ހޮވުމުގައި ކުރިން 100 ޖަޖުން ވޯޓުލި ނަމަވެސް މިހާރު އޮތްގޮތުން އެ އަދަދު ވަނީ 50 އަށް ކުޑަކޮށްފަ އެވެ.
މި ބަދަލާ އެކު މި އަހަރުގެ ބެލޮންޑިއޯ ހަފްލާ އޮންނާނީ ސެޕްޓެމްބަރު ނޫނީ އޮކްޓޫބަރުގަ އެވެ. އެވޯޑަށް ކުޅުންތެރިން ރޭންކް ކުރާނީ މި އަހަރުގެ ޖުލައިގެ ނިޔަލަށް ބަލައިގެންނެވެ. އެއީ ފިރިހެން ފުޓްބޯޅަ ސީޒަނާއި އަންހެން ޔޫރޯ ފުޓްބޯޅަ މުބާރާތުގެ ރޭންކިންތަކަށް ބަލައިގެންނެވެ. މާނަ އަކީ މި އަހަރުގެ ނޮވެމްބަރާއި ޑިސެމްބަރުގައި ގަތަރުގައި ބާއްވާ ފީފާ ވޯލްޑް ކަޕްގެ ކުރިން ބެލޮންޑިއޯ ލިބޭނެ ކުޅުންތެރިން ކަނޑައެޅިގެންދާނެ އެވެ.
ފުޓްބޯޅައިގެ އެންމެ ދުވަސްވީ އަދި ޝަރަފްވެރި އެއް އެވޯޑް ކަމަށްވާ ބެލޮންޑިއޯ އަކީ 1956 ވަނަ އަހަރުން ފެށިގެން ދެމުން އަންނަ އެވޯޑެކެވެ. މި އެވޯޑް 1995 ވަނަ އަހަރާ ހަމަޔަށް ދިނީ ހަމައެކަނި ޔޫރަޕް ކުޅުންތެރިންނަށެވެ. އެކަމަކު، އޭގެ ފަހުން ވަނީ ޔޫރަޕުގެ ކްލަބަކަށް ކުޅޭ ދުނިޔޭގެ ކޮންމެ ކުޅުންތެރިޔަކަށް ވެސް ލިބޭ ގޮތަށް ބަދަލުކޮށްފަ އެވެ. އަދި ފަހުން 2007 ގައި ވަނީ ދުނިޔޭގެ ކޮންމެ ގައުމެއްގައި ކުޅޭ ޕްރޮފެޝަނަލް ކުޅުންތެރިންނަށް ވެސް ހުޅުވާލައިފަ އެވެ.
ބެލޮންޑިއޯ އެވޯޑް 2010-2015 އަށް ދިނީ ފީފާ އެވޯޑާ އެއްކޮށްލައިގެން ފީފާ ބެލޮންޑިއޯގެ ގޮތުގަ އެވެ. ކޮވިޑް-19 ގެ ސަބަބުން 2020 ވަަނަ އަހަރު ބެލޮންޑިއޯ ހަފްލާ ނުބާއްވަ އެވެ. މިއީ ފްރާންސް ފުޓްބޯލް އިން އެކްރެޑިޓްކުރާ ނޫސްވެރިންނާއި ފުޓްބޯޅަ ކޯޗުން ވޯޓު ދީގެން ހޮވާ އެންމެ މޮޅު ކުޅުންތެރިއަކަށް ދޭ އެވޯޑެކެވެ. މި ފަހަރު ބެލޮންޑިއޯ އެވޯޑަށް ގެނައި ބަދަލުގެ ސަބަބުން މި ބްރޭންޑް އިތުރަށް ވަރުގަދަވާނެ ކަމަށް އެވޯޑް އިންތިޒާމްކުރާ ފްރާންސް ފުޓްބޯލް އިން ބުނެ އެވެ.
