މި މަހު 17 ވަނަ ދުވަހު ރާއްޖޭގައި ބާއްވާ "މޯލްޑިވްސް ސްޕޯޓްސް އެވޯޑްސް 2022" އަށް ޓޭބަލް ޓެނިސްގެ ރެކޯޑް ތަރިއެއް ކަމަށްވާ ކްރޮއޭޝިއާގެ ޒޯރާން ޕްރިމޯރަކް ރާއްޖެ އަންނަ ގޮތަށް ހަމަޖެހިއްޖެ އެވެ.
ކުޅިވަރު އެކުވެނި އެއް ނަމްބަރު ދަނޑު، މާލެ ސިންތެޓިކް ޓްރެކްގައި ބާއްވާ އެވޯޑް ހަފްލާގައި ޒޯރާންގެ އިތުރުން ދުނިޔޭގެ ލެވަލްގެ މަޝްހޫރު ގިނަ ކުޅިވަރު ސަހުސިއްޔަތުން ބައިވެރިވާނެ އެވެ. ރާއްޖޭގެ ކުޅިވަރާބެހޭ މިނިސްޓަރު އަހުމަދު މަހުލޫފް ވިދާޅުވީ މި ހަފްލާ އަކީ ރާއްޖޭގައި މިހާތަނަށް ބާއްވާ އެންމެ ބޮޑު އެވޯޑް ހަފްލާއަށް ވެގެންދާނެ ކަމަށެވެ.
ރާއްޖެ އަންނަ ގޮތަށް ހަަމަޖެހުނު ޒޯރާން، 52، އަކީ ޓީޓީ ވޯލްޑް ކަޕްގެ ޗެމްޕިއަންކަން ދެ ފަހަރު ހޯދާފައިވާ ކުޅުންތެރިއެކެވެ. އެއީ 1993 އާއި 1997 ވަނަ އަހަރު އެވެ. ޒޯރާން އަކީ ހަތް އޮލިމްޕިކްސް އިވެންޓްގައި ވާދަކުރި މަދު އެތުލީޓުންގެ ތެރެއިން އެކަކެވެ. އޭނާ ވަނީ 1998 ވަނަ އަހަރު ޓޭބަލް ޓެނިސްގެ ދުނިޔޭގެ ރޭންކިންގެ ދެ ވަނަ އަށް ޖެހިލައިފަ އެވެ. ކާމިޔާބު ކެރިއަރުގައި 25 އަށް ވުރެ ގިނަ މެޑަލް ހޯދި ޒޯރާން އަކީ ޓީޓީގެ ލެޖެންޑެކެވެ.
ކެރިއަރު ނިންމާލުމަށް ފަހު ވެސް ޓީޓީ އަށް އެކި ހިދުމަތްތައް ކޮށްދެމުން އަންނަ ޒޯރާން ވަނީ 2018 ވަނަ އަހަރު އިންޓަނޭޝަނަލް ޓީޓީ ފެޑެރޭޝަންގެ އެތުލީޓްސް ކޮމިޝަންގެ ޗެއާ އަކަށް އިންތިހާބުވެފަ އެވެ.
މިނިސްޓަރު މަހުލޫފް އިއުލާނުކުރައްވާފައިވާ ގޮތުން، ޒޯރާން އާއި ސްރީލަންކާގެ ކްރިކެޓް ލެޖެންޑް ސަނަތު ޖަޔަސޫރިޔާގެ އިތުރުން ޕޫލް ބިލިއާޑްގެ ދުނިޔޭގެ ޗެމްޕިއަނެއް އޮސްޓްރިއާގެ އަލްބިން އޮސްކަން، ބްރެޒިލްގެ ފުޓްބޯޅަ ތަރި ރޮބާޓޯ ކާލޯސް، ވޮލީ ޗެމްޕިއަން ގިލްބާޓޯ ގޮޑޯއި (ގީބާ)، ޕްރޮފެޝަނަލް ވީލް ޗެއާ ޓެނިސް އެތުލީޓް ރީޑް، ސްޕެއިނުގެ ފުޓްބޯޅަ ލެޖެންޑް މިކޭލް ސަލްގާޑޯ، އިނގިރޭސިވިލާތަށް އުފަން، ވީލްޗެއާ ޓެނިސް ތަރި ލޫސީ ސުކާ އަދި ސްވިޑެންގެ ކާމިޔާބު ފެތުންތެރިޔާ ސާރާ ހޮޔޯސްޓްރޯމް ސްޕޯޓްސް އެވޯޑަށް ރާއްޖެ އަންނާނެ އެވެ.
މީގެ އިތުރުން އެވޯޑް ހަފްލާގައި ބައިވެރިވެވަޑައި ގެންނެވުމަށް ސްރީ ލަންކާގެ ކުޅިވަރާބެހޭ ވަޒީރު ނަމާލް ރާޖަޕަކްސަ އާއި ބަންގްލަދޭޝްގެ ކުޅިވަރު މިނިސްޓަރު ޒާހިދު އަހްސަން ރަސަލް އަދި ސައުދީ އަރަބިއްޔާގެ ކުޅިވަރުގެ ވައިސް މިނިސްޓަރު ބަދޭރް އަލްހާދީ ރާއްޖެ ވަޑައިގަންނަވާނެ އެވެ.
މޯލްޑިވްސް ސްޕޯޓްސް އެވޯޑްސް ހަފްލާގައި 550 އަށް ވުރެ ގިނަ މީހުން ބައިވެރިވާއިރު، މި ހަފްލާ ބާއްވަން ކުޅިވަރު އެކުވެނި އެއް ނަމްބަރު ދަނޑުގެ ސިންތެޓިކް ސަރަހައްދުގައި ހަދާ ސްޓޭޖާއި އެހެނިހެން ތައްޔާރީތަކަށް މިއަދުން ފެށިގެން މި މަހު 19 އަށް އެ ޓްރެކް ބަންދުވާނެ އެވެ. މިނިސްޓަރު މަހުލޫފް ވިދާޅުވީ ސިންތެޓިކް ޓްރެކް ބަންދުކުރަނީ އެކަން ކުރެވޭނެ އެންމެ ކުޑަ މުއްދަތަށް ކަމަށެވެ.
