މި މަހު 17 ވަނަ ދުވަހު ރާއްޖޭގައި ބާއްވާ މޯލްޑިވްސް ސްޕޯޓްސް އެވޯޑްސް އަށް ސްރީ ލަންކާގެ އިތުރުން މުޅި ދުނިޔޭގެ ލެވަލްގައި ވެސް މަގުބޫލު ކްރިކެޓް ލެޖެންޑް، ސަނަތު ޖަޔަސޫރިޔާ ރާއްޖެ އަންނަ ގޮތަށް ހަމަޖެހިއްޖެ އެވެ.
ކުޅިވަރު އެކުވެނި އެއް ނަމްބަރު ދަނޑު، މާލެ ސިންތެޓިކް ޓްރެކްގައި ބާއްވާ އެވޯޑް ހަފްލާގައި ދުނިޔޭގެ ލެވަލްގެ މަޝްހޫރު ކުޅިވަރު ސަހުސިއްޔަތުން ބައިވެރިވާނެ އެވެ. މީގެ އިތުރުން އެކި ގައުމުތަކުގެ ކުޅިވަރާ ބެހޭ ވުޒާރާތަކުގެ އިސްވެރިން ވެސް ބައިވެރިވާނެ އެވެ.
ޔޫތު މިނިސްޓަރު އަހުމަދު މަހުލޫފް މިއަދު ވަނީ ޖަޔަސޫރިޔާ ރާއްޖެ އަންނަ ގޮތަށް ހަމަޖެހިފައިވާކަން އިއުލާނުކޮށްފަ އެވެ.
ލަންކާގެ ކްރިކެޓް ޓީމުގެ ކެޕްޓަންކަން 1989 އިން 2007 ވަނަ އަހަރާ ހަމައަށް ކުރި ޖަޔަސޫރިޔާ އަކީ ކްރިކެޓްގެ ހުރިހާ ފޯމެޓެއްގެ މެޗުތަކާއި މުބާރާތްތަކުގައި ވެސް ފެންވަރު ސާބިތުކޮށްފައިވާ ދުނިޔޭގެ ކްރިކެޓްގެ ވެސް ބްރޭންޑެކެވެ. އޭނާ ވަނީ ވަން ޑޭ އިންޓަނޭޝަނަލް ކްރިކެޓް (އޯޑީއައި)ގައި 10،000 ލަނޑު އެއްކޮށް، 300 ވިކެޓް ނަގައިފަ އެވެ. ލަންކާ އިން 1996 ވަނަ އަހަރު ކްރިކެޓް ވޯލްޑް ކަޕް ކާމިޔާބު ކުރިއިރު، އެންމެ މޮޅު ކުޅުންތެރިއަކަށް ހޮވުނީ ޖަޔަސޫރިޔާ އެވެ. ކްރިކެޓްގައި ޖަޔަސޫރިޔާ އަތުގައި ބޮޑު ރެކޯޑްތަކެއް އޮތްއިރު، އޭނާ އަކީ 50 އަށް ވުރެ މަދު ބޯޅައިން ސަތޭކަ ލަނޑު ހަމަކުރި ފުރަތަމަ ކުޅުންތެރިޔާ އެވެ.
މިނިސްޓަރު މަހުލޫފް އިއުލާނުކުރައްވާފައިވާ ގޮތުން، ޖަޔަސޫރިޔާގެ އިތުރުން ޕޫލް ބިލިއާޑްގެ ދުނިޔޭގެ ޗެމްޕިއަނެއް އޮސްޓްރިއާގެ އަލްބިން އޮސްކަން، ބްރެޒިލްގެ ފުޓްބޯޅަ ތަރި ރޮބާޓޯ ކާލޯސް، ވޮލީ ޗެމްޕިއަން ގިލްބާޓޯ ގޮޑޯއި (ގީބާ)، ޕްރޮފެޝަނަލް ވީލް ޗެއާ ޓެނިސް އެތުލީޓް ރީޑް، ސްޕެއިނުގެ ފުޓްބޯޅަ ލެޖެންޑް މިކޭލް ސަލްގާޑޯ، އިނގިރޭސިވިލާތަށް އުފަން، ވީލްޗެއާ ޓެނިސް ތަރި ލޫސީ ސުކާ އަދި ސްވިޑެންގެ ކާމިޔާބު ފެތުންތެރިޔާ ސާރާ ހޮޔޯސްޓްރޯމް ސްޕޯޓްސް އެވޯޑަށް ރާއްޖެ އަންނާނެ އެވެ.
މީގެ އިތުރުން އެވޯޑް ހަފްލާގައި ބައިވެރިވެވަޑައި ގެންނެވުމަށް ސްރީ ލަންކާގެ ކުޅިވަރާބެހޭ ވަޒީރު ނަމާލް ރާޖަޕަކްސަ އާއި ބަންގްލަދޭޝްގެ ކުޅިވަރު މިނިސްޓަރު ޒާހިދު އަހްސަން ރަސަލް އަދި ސައުދީ އަރަބިއްޔާގެ ކުޅިވަރުގެ ވައިސް މިނިސްޓަރު ބަދޭރް އަލްހާދީ ރާއްޖެ ވަޑައިގަންނަވާނެ އެވެ.
