ދުނިޔެ އާއި ރާއްޖޭގެ ވެސް ތެލުގެ ބާޒާރުގައި އަގުތަކަށް މިފަހުން އައި ބަދަލުތަކުގެ އަސަރު ރާއްޖޭގެ އެތެރޭގައި އޮޕަރޭޓްކުރަމުންދާ ލޯންޗު ފެރީތަކާއި ޕްރައިވެޓް ލޯންޗު ދަތުރުތަކުގެ އަގުތައް މައްޗަށް ދާ ކަމަށް "އަދަދު" އިން ރިޕޯޓްކުރީ އިއްޔެ އެވެ.

ރާއްޖޭގެ އެކި ސަރަހައްދުތަކަށް ލޯންޗު އޮޕަރޭޓްކުރާ ގިނަ ކުންފުނިތަކަކުން ތެޔޮ އަގުބޮޑުވުމާއެކު ޓިކެޓް ވިއްކާ އަގުތަކަށް ވެސް ބަދަލުތަކެއް ގެނައުމަށް ވަނީ މަޖުބޫރުވެފަ އެވެ. ގިނަ ލޯންޗު ކުންފުނިތަކާއި ލޯންޗުތަކުން ވެސް އެވަރެޖްކޮށް 50-100ރ. ޓިކެޓް އަގުތަކަށް އިތުރުކޮށްފައިވާކަން ވަނީ ފާހަގަކުރެވިފަ އެވެ.

ބ. އަތޮޅުގެ އޮމަދޫ އަދި އޭދަފުށި ކަހަލަ ރަށްރަށަށް އޮޕަރޭޓްކުރާ ލޯންޗުތަކުގެ އަގުތައް މިހާރު އުޅެނީ 400-450ރ. އާ ދެމެދުގެ އަގެއްގަ އެވެ. އެއީ ކުރިން 350 އަށް ދަތުރުކުރަމުން އައި ރަށްރަށެވެ.

މާލެ އާއި ތ. އަތޮޅާ ދެމެދުގައި ދަތުރުކުރާ ލޯންޗެއްގެ އޮޕަރޭޓަރެއް ވެސް ބުނީ މިހާރު އެ ލޯންޗުން އާންމުކޮށް ދަތުރުކުރަނީ 800ރ. އަށް ކަމަށެވެ. ތިން ގަޑިއިރުގެ އެ ދަތުރު މީގެ ކުރިން ކުރަމުން އައީ 700-600 އަށް ކަމަށް އޭނާ އިއްޔެ ބުނި އެވެ.

ކުރަންޖެހޭ ދުރު ރާސްތާ ދަތުރުގެ ސަބަބުން ލ. އަތޮޅާއި މާލެއާ ދޭތެރޭ އޮޕަރޭޓްކުރާ މާ ގިނަ ލޯންޗުތަކެއް ނެތް ނަމަވެސް، އެ ސަރަހައްދުގައި ކުލީ ދަތުރު ނަގައިގެން އޮޕަރޭޓްކުރާ ލޯންޗުތައް ގިނަ އެވެ. އެގޮތަށް ކުއްޔަށް ނަގާ ލޯންޗުތަކުގެ އަގުތައް ހާހުގައި އުޅޭއިރު، ލ. އަތޮޅުން ލިބެން ހުންނަ ބައެއް ކަހަލަ ހިދުމަތްތައް ހޯދުމަށްޓަކައި ކައިރި އަތޮޅުތަކުން ގިނަ ބަޔަކު ލ. އަތޮޅަށް ދަތުރުކުރެ އެވެ.

އެފަދަ ދަތުރުތައް އާންމުކޮށް 5،000ރ. ގައި އުޅޭއިރު، އެ ދަތުރުތަކުގެ އަގުތައް ވެސް މިހާރު 5،500ރ. އަށް އިތުރުވެފައިވާ ކަމަށް ކުއްޔަށް ލޯންޗު ދަތުރުކުރާ ފަރާތެއް އިއްޔެ ބުންޏެވެ.

އދ. އަތޮޅަށް އޮޕަރޭޓްކުރާ ލޯންޗެއްގެ އިސްވެރިޔަކު އިއްޔެ ބުނީ އެ ލޯންޗުގެ އަގުތަކަށް އަދި ބަދަލެއް ނުގެންނަ ކަމަށެވެ. ނަމަވެސް ތެލަށް އައި ބަދަލުތަކާ ހެދި އަގުތަކަށް ބަދަލުގެނައުމުގެ މަޝްވަރާ ކުރަމުންދާ ކަމަށް އޭނާ ބުންޏެވެ. އދ. ގެ ތިން ރަށަކަށް އޮޕަރޭޓްކުރާ އެ ލޯންޗުގެ އަގުތައް އުޅެނީ 300ރ. ގަ އެވެ.

ތެލުގެ އަގުތަކަށް ބަދަލު އައިސްފައިވާއިރު، މިހާރު މާލެ ސަރަހައްދުގައި ޓެކްސީ ކުރާ ފަރާތްތަކުން ވެސް ވަނީ ޓެކްސީ ދަތުރުތަކުގެ އަގުބޮޑުކުރަން ޓްރާންސްޕޯޓު މިނިސްޓްރީއަށް ހުށަހަޅާފަ އެވެ.

ތެލުގެ އަގަށް އައި ބަދަލު

ފިއުލް ސަޕްލައި މޯލްޑިވްސް (އެފްއެސްއެމް)ގެ ޝެޑްތަކުން ޑީސަލް ލީޓަރެއް ވިއްކަނީ 14.80ރ. އަށެވެ. ޑީސަލް ލީޓަރަކުން 2.36ރ. ވަނީ ބޮޑުކޮށްފަ އެވެ. ކުރިން ޑީސަލް ލީޓަރެއް ވިއްކީ 12.44 ރ. އަށެވެ.

އެންމެފަހުން އެސްޓީއޯ އިން ތެލުގެ އަގު ބޮޑުކުރީ މާޗް 5، ގަ އެވެ.

އެ ބަދަލު އެ ކުންފުނިން ގެނައީ ދުނިޔޭގެ ބާޒާރުގައި ތެލުގެ އަގު ހިފެހެއްޓުމުގެ ނެތި އުފުލެމުން ދަނިކޮށް، ފެބްރުއަރީ މަހު ފަހުކޮޅު ރަޝިޔާ އާއި ޔޫކްރެއިން އާ ދެމެދު ފެށި ހަނގުރާމަ އާ ގުޅިގެން ތެލުގެ އަގު މައްޗަށްދާ ނިސްބަތް ހަލުވި ވުމުންނެވެ.

އެސްޓީއޯގެ އިތުރުން ރާއްޖޭގައި ޑީސަލް ވިއްކާ މިފްކޯ އިން ވެސް ވަނީ ޑީސަލްގެ އަގު ބޮޑުކޮށްފަ އެވެ. އެ ކުންފުނިން އާންމުންނަށް ޑީސަލް ލީޓަރެއް ވިއްކަނީ 17.10ރ. އަށެވެ. ދުނިޔޭގެ ބާޒާރުގައި ސާފުނުކުރާ ތެޔޮ ފީފާއެއް އުޅެނީ 110 ޑޮލަރަށްވުރެ މަތީގަ އެވެ.

ބައެއް މުހިންމު ހަބަރުތައް

• ރިސޯޓެއްގައި ހިންގާ ޕްރޮޖެކްޓަކަށް ކަމަށް ބުނެ އޮޅުވާލައިގެން ކޯޓާ ހޯދި މައްސަލަ ފުލުހުންނަށް ހުށަހެޅީ އިމިގްރޭޝަނުން ނޫން ކަމަށާއި އެ މައްސަލަ ފުލުހުންނަށް ހުށަހެޅީ އިކޮނޮމިކް މިނިސްޓްރީން ކަމަށް މިނިސްޓަރު ފައްޔާޒް އިސްމާއީލް ވިދާޅުވީ އިއްޔެ އެވެ.

• ރަށްރަށުގެ މަސްލަހަތު ހިމެނޭ މައްސަލަތަކުގައި ވެސް ދައުލަތް ތަމްސީލު ކުރަން ޖެހޭނީ ލޯކަލް ކައުންސިލްތަކުގެ ބަދަލުގައި ބަންޑާރަ ނައިބުގެ އޮފީހުން ކަމަށް ހައިކޯޓުން ނިންމި ނިންމުން ސުޕްރީމް ކޯޓުން ބާތިލްކުރުމާ އެކު ބަންޑާރަ ނައިބުގެ އޮފީހުން އެފަދަ މައްސަލަތަކުން ބޭރުވީ އިއްޔެ އެވެ.

• ޓޫރިޒަމް މިނިސްޓްރީގެ ސްޓޭޓް މިނިސްޓަރު ޑރ. އަހުމަދު ސޯލިހުގެ މައްޗަށް އުފުލި ރަސްމީ ހައިސިއްޔަތު ނަހަމަ ގޮތުގައި ބޭނުން ކުރުމުގެ ދައުވާގައި ހުކުމްކުރުން މި މަހުގެ 29 ވަނަ ދުވަހަށް ތާވަލްކުރީ އިއްޔެއެވެ.

ދުވަހުގެ ކޯޓޭޝަން

ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު އެ ޕާޓީން އެއްކައިރިކޮށް އެހެން އެމްޑީޕީއެއް އުފެއްދުމުގެ މަސައްކަތް ކުރަމުންދާ ކަމަށް ތުހުމަތު ކުރައްވަމުން އިއްޔެގެ ރައްޔިތުންގެ މަޖިލީހުގެ ޖަލްސާގައި:

"ވަރަށް ސާފުކޮށް އަޅުގަނޑަށް މިއަދު އެނގޭ، ބޭނުންވެގެން މި އުޅެނީ ސަރުކާރު ޖަވާބުދާރީ ކުރުވާތީ ސަރުކާރުގެ ތެރޭގައި ނާޖާއިޒު ފައިދާ ނަގަން ތިބި މީހުން އެކުރާ ކަންކަން ހުއްޓުވަން ރައީސް ނަޝީދު މަސައްކަތްކުރާތީ، އެމްޑީޕީން އެއްކައިރިކޮށް އެހެން އެމްޑީޕީއެއް އުފެއްދުމުގެ މަސައްކަތް،"

ދުވަހުގެ ފޮޓޯ

ނަފުސާނީ ދުޅަހެޔޮކަމާ ގުޅޭ ގޮތުން ނޫސްވެރިޔާ އަހުމަދު ސާއިލް އަލީ ލިޔެފައިވާ ފޮތް, "އެ ދުވަސް ގެނެވޭނެ". ރާދާ ބުކްޝޮޕުން ފޮތް ގަންނަން ލިބޭނެ -- ފޮޓޯ: މުހައްމަދު ޝާބިން/އަދަދު

ދިރާސާތަކުން ކިޔާލުމަށް

"މޯލްޑިވްސް: އޮވާކަމިން ދަ ޗެލެންޖަސް އޮފް އަ ސްމޯލް އައިލެންޑް ސްޓޭޓް"

މިއީ 2015 ވަނަ އަހަރު އޭޝިއާ ޑިވެލޮޕްމަންޓް ބޭންކް (އޭޑީބީ) އިން ޝާއިއުކޮށްފައިވާ ދިރާސާއެކެވެ. މި ދިރާސާގައި ވަނީ ރާއްޖޭގެ އިގްތިސާދީ ކަންކަން އެނަލައިޒްކޮށް ޕްލޭން ކުރުމަށް އެހީތެރިކަން ފޯރުކޮށްދިނުމަށް ކަންތައްތަކެއް ހުށަހަޅާފަ އެވެ. މިއީ ދިރާސާގައި ވަނީ ސަރުކާރުގެ މުއައްސަސާތަކާއި، މަދަނީ ޖަމްއިއްޔާ ޖަމާއަތްތަކާއި ޕްރައިވެޓް ސެކްޓަރުގައި ހަރަކާތްތެރިވާ ކުންފުނިތަކުގެ ކޮންސަލްޓަންސީ ހޯދާފަ އެވެ.