ރަށްރަށުގެ މަސްލަހަތު ހިމެނޭ މައްސަލަތަކުގައި ވެސް ދައުލަތް ތަމްސީލު ކުރަން ޖެހޭނީ ލޯކަލް ކައުންސިލްތަކުގެ ބަދަލުގައި ބަންޑާރަ ނައިބުގެ އޮފީހުން ކަމަށް ހައިކޯޓުން ނިންމި ނިންމުން ސުޕްރީމް ކޯޓުން ބާތިލްކުރީ އިއްޔެ އެވެ.
ހައިކޯޓުން އެ ގޮތަށް ނިންމީ އދ. ފެންފުށީ ބަންޑާރަ ބިމަކާ ގުޅޭ ގޮތުން އައްބާސް އަލީކަލޭގެފާނު ކިޔާ މީހަކު 1987 ވަނަ އަހަރު, ހުށަހެޅި ޝަކުވާއަކާ ގުޅޭ މައްސަލައެއްގަ އެވެ.
މައްސަލަ ހައިކޯޓަށް ހުށަހަޅާފައިވަނީ ދައުވާ ރައްދުވާ ފަރާތެއްގެ ގޮތުގައި ދިވެހި ދައުލަތް ހިމަނައިގެންނެވެ. ނަމަވެސް, ދައުވާ ލިބިގަތުމުގެ ގާނޫނީ ބާރު ލިބޭ މުއައްސަސާތަކުން ކޯޓުގައި ތަމްސީލުކުރަނީ ސީދާ އެ މުއައްސަސާއަކުން ކަމަށް ސުޕްރީމް ކޯޓުން ކަނޑައަޅާފައި އޮތުމުން އދ. ފެންފުށީ ކައުންސިލަށް ޖަވާބުދާރީވާން އެންގި އެވެ.
އެކަމަކު, އެ ކައުންސިލުން ބުނީ މައްސަލާގައި ޖަވާބުދާރީވާނީ ދިވެހި ދައުލަތުގެ ހައިސިއްޔަތުން ބަންޑާރަ ނައިބު ކަމެވެ. އަދި, އެ ކައުންސިލަށް ހައިކޯޓުގައި ޖަވާބުދާރީވުމުގެ ފަންނީ އަދި ގާބިލްކަން ލިބިފައިނުވާ ކަމަށެވެ. ގާނޫނީ ވަކީލެއް, ލީގަލް އޮފިސަރެއް ވެސް ނެތެވެ.
އެހެންވެ, ހައިކޯޓުން ބަންޑާރަ ނައިބުގެ އޮފީހަށް އެކަން އެންގުމުން އެ އޮފީހުން ހައިކޯޓުގައި ފެންފުށީ ކައުންސިލް ތަމްސީލުކޮށް ބަންޑާރަ ނައިބަށް ވަކާލާތު ކުރެވިދާނެ ކަމަށް ނުފެންނަ ކަމަށެވެ.
ނަމަވެސް, ހައިކޯޓުގެ އެ ގާނޫނީ މާނަކުރުން ރާއްޖެ, ލާމަރުކަޒު އުސޫލުން ހިންގުމުގެ ނިޒާމާ ހިލާފު ކަމަށް ބުނެ ބަންޑާރަ ނައިބުގެ އޮފީހުން ސުޕްރީމް ކޯޓުގައި އިސްތިއުނާފްކުރި އެވެ.
މައްސަލާގެ އަޑުއެހުމުގައި ބަންޑާރަ ނައިބުގެ އޮފީހުން ހައިކޯޓުގެ މާނަކުރުން ގޯސްކަމަށް ވަކާލާތުކުރިއިރު ފެންފުށީ ކައުންސިލުން ސުޕްރީމް ކޯޓުގައި ވަކާލާތުކޮށްފައެއް ނުވެ އެވެ. އެ ކައުންސިލުން ބުނަމުން ދިޔައީ ސުޕްރީމް ކޯޓުގައި ގާނޫނީ ގޮތުން ވާހަކަ ދެއްކުމުގެ ވަސީލަތެއް އެ ކައުންސިލްގައި ނެތް ކަމަށެވެ.
މައްސަލާގައި ސުޕްރީމް ކޯޓުގައި އެއް އަޑުއެހުން ބޭއްވުމަށްފަހު, އިއްޔެ ވަނީ ހުކުމް އިއްވާފަ އެވެ. ބެންޗުގެ ރިޔާސަތު ބެލެހެއްޓެވި ފަނޑިޔާރު ހުސްނުއްސުއޫދު އިއްވެވި ހުކުމްގައިވާ ގޮތުން, ލޯކަލް ކައުންސިލްތަކަކީ ސަރުކާރާ ވަކިން ދައުލަތުގެ ތެރޭގައި ހިންގާ މިނިވަން, މުސްތަގިއްލު މުއައްސަސާތަކެވެ. އެއީ, ދައުވާ ކުރުމާއި ދައުވާ ލިބިގަތުމާ އެކު އަމިއްލަ ސިއްކައަކާއެކު ހިންގާ ތަންތަނެވެ.
އެހެންކަމުން, ކައުންސިލްތަކުން ކުރާ ދައުވާތަކާއި ކައުންސިލްތަކަށް ރައްދުވާ ދައުވާތަކާ ގުޅިގެން ވަކީލެއްގެ އެހީތެރިކަމާއެކު ނުވަތަ އެހީއާ ނުލާ ނަމަވެސް, ކޯޓުގައި ތަމްސީލް ވާން ޖެހޭނީ އެ ކައުންސިލެއް އަމިއްލައަށް ކަމަށެވެ. އެހެން ނޫންނަމަ, ކައުންސިލްތަކުގެ މިނިވަންކަމަށް ހުރަސްއެޅިގެން ދާނެ ކަމަށް ފަނޑިޔާރު އިއްޔެ ވިދާޅުވި އެވެ.
"ބަންޑާރަ ނައިބަކީ ސަރުކާރުގެ އިސް ގާނޫނީ ވަކީލު ކަމުގައިވާތީވެ ކޯޓުތަކުގައި ކައުންސިލްތައް ބަންޑާރަ ނައިބު ތަމްސީލް ކުރުމަކީ ކައުންސިލްތަކުގެ މިނިވަންކަމަށް ހުރަސްއެޅި އަދި ބައެއް ފަހަރު ދެ ފަރާތުގެ މަސްލަހަތު ވެސް ފުށުއަރައިފާނެ ކަމެއް," އިއްޔެ ނެރުނު ހުކުމްގައިވެ އެވެ.
ބައެއް މުހިންމު ހަބަރުތައް
- ސަރުކާރުގެ އިދާރާތަކުގެ މެދުގައި އިންޓެލިޖެންސް މައުލޫމާތު ބަދަލުކުރާ މިންވަރުގެ ތަފާސްހިސާބުގެ ރިޕޯޓު ރައީސުލްޖުމްހޫރިއްޔާ އަށް ވެސް އަރުވަންޖެހޭ ގޮތަށް ގަވާއިދަށް އިސްލާހު ގެނައީ އިއްޔެ އެވެ.
- މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ޗެއާޕާސަންގެ އިންތިހާބު ހިމެނޭހެން އެޕްރީލް 16، ގައި ބާއްވަން ތާވަލްކޮށްފައިވާ އިންތިހާބުތައް މެއި 14، ގައި ބޭއްވުމަށް އެ ޕާޓީގެ ގައުމީ މަޖިލީހުން ފާސްކުރީ އިއްޔެ އެވެ.
- ފިނޭންސް މިނިސްޓްރީއިން އެންމެފަހުން ނެރުނު މާލީއްޔަތާއި ބެހޭ ސާކިއުލާއާ އެއްގޮތަށް، ޕްރޮސެކިއުޓާ ޖެނެރަލް އޮފީހުގެ ހަރުމުދަލުގެ ދަފްތަރު ބެލެހެއްޓުމަށް އޮޑިޓާ ޖެނެރަލް އޮފީހުން ލަފާދިނީ އިއްޔެ އެވެ.
ދުވަހުގެ ކޯޓޭޝަން
ބައިނަލްއަގްވާމީ އަންހެނުންގެ ދުވަހުގެ މުނާސަބަތުގައި ދެއްވި ހިތޯބްގައި ޖެންޑާ މިނިސްޓަރު އައިޝަތު މުހައްމަދު ދީދީ ވިދާޅުވީ:
"އަންހެނުންނަކީ އަޅުގަނޑުމެންގެ އާބާދީގެ ދެބައިކުޅަ އެއްބައި. މުޖުތަމައެއްގެ ވިސްނުމާއި، ހިޔާލުތަކާއި، ހައްލުތަކާއި، ތަޖުރިބާތަކުގެ ދެބައިކުޅަ އެއްބައި ހިއްސާކުރާ ފަރާތްތައް. އެހެންކަމުން، ދެމެހެއްޓެނިވި މާދަމާއެއް ނުވަތަ މުސްތަގުބަލެއް ބިނާކުރަން އަޅުގަނޑުމެން މަސައްކަތްކުރާއިރު، އެ މަސައްކަތްތަކުގައި އަންހެނުންގެ ފުރިހަމަ ބައިވެރިވުމާއި ހިއްސާ އޮންނަން ޖެހޭ،"
ދުވަހުގެ ފޮޓޯ
އެމްޑީޕީ ގައުމީ މަޖިލީހުގެ ޖަލްސާގައި އައްޑޫ މަރަދޫ ދާއިރާގެ މެމްބަރު މަވޯޓާ ޝަރީފް ވާހަކަ ދައްކަވަނީ. އިންތިހާބު ތާރީހު ބަދަލުކުރުމަށް ބޭއްވި ޖަލްސާގައި ބޮޑު ޒުވާބެއް ހިނގި. އިންތިހާބު އެޕްރީލް 16 އިން މެއި 14 އަށް ލަސްކުރަން ވަނީ ފާސްކޮށްފައި. -- ފޮޓޯ: އަބްދުﷲ އިޔާން/އަދަދު
ދިރާސާތަކުން ކިޔާލުމަށް
"ރިފްލެކްޓިން 15 އިޔާސް. ދަ ރައިޓްސް ސައިޑް އޮފް ލައިފް 2020"
މިއީ ޔޫއެންޑީޕީން ރާއްޖޭގެ ފެމިލީ ޕްރޮޓެކްޝަން އޮތޯރިޓީ އާ ގުޅިގެން ކޮށްފައިވާ ދިރާސާއެކެވެ. މި ދިރާސާގައި ވަނީ ރާއްޖޭގައި ހުރި އެކިއެކި އިންސާނީ ހައްގުތަކަށް އުނިކަން ލިބޭ ކަންކަމަށް އަލިއަޅުވާލައި އެކަންކަން ހައްލުކުރަން ގޮތްތަކެއް ހުށަހަޅާފަ އެވެ.
