ހަމައެކަނި ދިވެހި ކުންފުނިތަކުން އިންޝުއަރެންސް ޕޮލިސީތައް ނެގެން އޮންނާތީ ހުރަސްތައް ކުރިމަތިވާ ކަމަށް ބުނެ އިންޝުއަރެންސް ހިދުމަތުގެ ވިޔަފާރި ބޭރު ކުންފުނިތަކަށް ހުޅުވާލަން އެމްއޭސީއެލް އާއި އައިލެންޑް އޭވިއޭޝަނުން އެދިއްޖެ އެވެ.
މިހާރު އަމަލުކުރަމުން އަންނަ އިންޝުއަރެންސް އިންޑަސްޓްރީ ރެގިއުލޭޝަނާއި އެސްއޯއީ ކޮމިޓީން ދިރާސާކުރަމުންދާ އިންޝުއަރެންސާ ބެހޭ ބިލުގައި ވެސް، މަރުކަޒީ ބޭންކު އެމްއެމްއޭގެ ލައިސަންސެއް ނެތް އިންޝުއަރެންސް ވިޔަފާރިތަކާއި ބްރޯކަރުންނާއި ރީއިންޝުއަރެންސް ވިޔަފާރިތަކުން ހިދުމަތް ހޯދުމަކީ މަނާ ކަމަކެވެ.
އެހެންކަމުން ދިވެހި ވިޔަފާރިތަކުން ނޫނީ އެމްއެމްއޭން ލައިސެންސް ލިބިފައިވާ ބޭރު ވިޔަފާރިތަކުން މެނުވީ އިންޝުއަރެންސް ހިދުމަތް ހޯދުމުގެ ފުރުސަތު ރާއްޖޭގައި ނޯވެ އެވެ.
އެސްއޯއީ ކޮމިޓީން އެއާލައިން އިންޑަސްޓްރީ އާއެކު އިއްޔެ ބޭއްވި ބައްދަލުވުމުގައި އެމްއޭސީއެލް އާއި އައިލެންޑް އޭވިއޭޝަނުން ވެސް ބުނީ އޭގެ ސަބަބުން އެއާޕޯޓާއި އެއާލައިންތަކުގެ އެއާކްރާފްޓުތައް އިންޝުއަރެންސް ކުރަން ހުރަސްތައް ކުރިމަތިވާ ކަމަށެވެ.
ދެ ކުންފުނީގެ ވެސް މައިގަނޑު ކަންބޮޑުވުމަކަށްވީ ގިނަ ދިވެހި ކުންފުނިތަކުގައި އެ ކެޕޭސިޓި ނެތުމެވެ.
އެގޮތުން، އެމްއޭސީއެލްގެ މަންދޫބު ވިދާޅުވީ އެއާޕޯޓުން ގެންގުޅޭ އިންޝުއަރެންސް ޕޮލިސީތައް ދޭން ގިނަ ފަހަރު ކުރިމަތިލަނީ މަދު ކުންފުނިތަކަކުން ކަމަށެވެ. މި ކުންފުނިތަކުން ވެސް ބޭރު ކުންފުނިތަކުން ރީއިންޝުއަރަންސް ހިދުމަތް ހޯދަން ޖެހޭ އިރު، ބައެއް ފަހަރު އެކަން ނުވެގެން ދެވަނަ ފުރުސަތެއް ވެސް ދޭން ޖެހިފައި އެބަހުރި ކަމަށް އޭނާ ވިދާޅުވި އެވެ.
"ބައެއް ރިސްކުތައް ކަވާކުރަން ނަގަން ޖެހޭ ޕޮލިސީ، މިސާލަކަށް އޭވިއޭޝަން ޕޮލިސީ. އޭވިއޭޝަން ޕޮލިސީއަކީ ވަރަށް ސްޕެސިފިކަލީ އޭވިއޭޝަނަށް އިންނަ ޕޮލިސީއެއް. ނެގުމުގައި އެ ޕޮލިސީއަށް ބޭނުންވާ ރީއިންޝުއަރަންސް ހޯދުމަށް ބައެއް ލޯކަލް ޕާޓީސްތަކަށް ވަރަށް އުނދަގޫވާކަން (ފާހަގަވޭ)"
އޭގެ އިތުރުން އެއާޕޯޓްސް ކުންފުނީގައި 15 ބިލިއަން ރުފިޔާގެ އަގުހުރި އެސެޓު ހުރި އިރު، ދިވެހި އިންޝުއަރެންސް މާކެޓުގައި އެ އެސެޓުތަކަށް ބޭނުންވާ އިންޝުއަރެންސް ކަވަރޭޖު ދެވޭ ވަރުގެ ކެޕޭސިޓީއެއް އެބަހުރިތޯ އޭނާ ސުވާލު އުފެއްދި އެވެ.
"އަޅުގަނޑުމެންގެ އިންޝުއަރެންސް މާކެޓުގައި ކެޕޭސިޓީ އެބަހުރިބާއޭ އެމްއޭސީއެލް ކަހަލަ ވީއައިއޭ ކަހަލަ މޭޖާ ރިސްކުތައް ކަވާ [ކުރެވޭ] ވަރުގެ،"
އެމްއޭސީއެލްއިން ފާހަގަކުރި ގޮތަށް އައިލެންޑް އޭވިއޭޝަނުގެ މަންދޫބު ވެސް ވިދާޅުވީ ދިވެހި ކުންފުނިތަކަށް ލިމިޓުވެފައި އޮތުމަކީ "ޗެލެންޖެއް" ކަމަށެވެ. އަދި، މިހެން ދިމާވަނި ކަވާ ކުރަން ޖެހޭ އަދަދު ބޮޑުކަމުން ކަމަށް އޭނާ ވެސް ވިދާޅުވި އެވެ.
"އައިލެންޑް އޭވިއޭޝަނަށް ވެސް މިވަގުތު ޗެލެންޖަކަށް މިދިމާވަނީ އޭވިއޭޝަން ލަޔަބިލިިޓީ. އެ ބުނުއްވިހެން ކަވާކުރަން ޖެހޭ ވެލިއުތައް ބޮޑުވުމުގެ ސަބަބުން މިކޮޅުގެ ލޯކަލް އެޖެންޓުންނަށް ކަވާ ދިނުމުގައި ދަތިތަކެއް ހުރޭ"
މި ކަންބޮޑުވުންތަކާއި ގުޅިގެން ކޮމިޓީގެ މުގައްރިރު މުހައްމަދު ނާޝިޒް ވިދާޅުވީ ކަމާގުޅޭ އިންޑަސްޓްރީގެ ބައިވެރިން ކޮމިޓީއަށް ހާޒިރުކޮށް މަޝްވަރާކުރުމުގެ ބޭނުމަކީ އެކަންކަމަށް ރިއާޔަތްކުރެވިގެން ބިލުގެ މަސައްކަތް ނިންމުން ކަމަށެވެ. އެހެންކަމުން، މި ބިލު ތަޅުމަށް ހުށަހެޅިގެން ދާއިރު ހުރި ކަންބޮޑުވުންތަކަށް ހައްލެއް ލިބޭނެ ކަމަށް އޭނާ ވިދާޅުވި އެވެ.
މިކަމުގައި ހައްލަކަށް ކޮމިޓީގައި މަޝްވަރާ ކުރެވުނީ ބިލުގައި އިސްތިސްނާ ހާލަތްތަކެއް ހިމެނުމަށެވެ.
މިހާރު ޑްރާފްޓުކޮށްފައިވާ ގާނޫނުގައި ވެސް އެމްއެމްއޭން ލައިސަންސް ނުނަގާ އިންޝުއަރެންސް ހިދުމަތް ހޯދޭނެ ފަރާތްތަކާއި ވިޔަފާރިތައް، ގަވާއިދަކުން ކަނޑައެޅުމުގެ ބާރު އެ އޮތޯރިޓީއަށް ލިބެ އެވެ.
މި ބައްދަލުވުމުގައި ބައިވެރިވި އަނެއް ދެ ކުންފުނި ޓްރާންސް މޯލްޑިވިއަން އެއާވޭސް (ޓީއެމްއޭ) އާއި ވިލާ އެއާ އިން މި މައްސަލައިގައި މާބޮޑު ކަންބޮޑުވުންތަކެއް ފާޅުކޮށްފައެއް ނުވެ އެވެ. އެކަމަކު ވިލާ އެއާގެ މަންދޫބުން ވަނީ ސީދާ ބޭރުން ޕޮލިސީ ގަނެވޭ ގޮތަށް ވުމަކި ފަސޭހައަކަށް ވެގެން ދާނެ ކަމަށް ބުނެ އެކަމަށް ތާއީދުކޮށްފަ އެވެ.
އިންޝުއަރެންސާ ބެހޭ ބިލަކީ މިހާރު އަމަލުކުރަމުންދާ އިންޝުއަރެންސް އިންޑަސްޓްރީ ރެގިއުލޭޝަނަށް ބެލެނިވެރިކަން ދިނުމަށް ބޭނުންވާ ގާނޫނީ އޮނިގަނޑު ގާއިމުކޮށް، އިންޝުއަރެންސް ވިޔަަފާރި ރެގިއުލޭޓު ކުރުމުގެ މަގުސަދުގައި ސަރުކާރުން މަޖިލީހަށް ހުށަހެޅި ބިލެކެވެ.
މި ބިލަކީ 2020 ވަނަ އަހަރުގެ ތިންވަނަ ދައުރަށް ހުށަހެޅި ބިލެކެވެ. މިހާރު ކޮމިޓީގައި މި ބިލު އޮންނަތާ ދޮޅު އަހަރާ ގާތްވަނީ އެވެ.
