މި މަހު 17 ވަނަ ދުވަހު ކުޅިވަރު އެކުވެނި އެއް ނަމްބަރު ދަނޑުގައި ބާއްވާ މޯލްޑިވްސް ސްޕޯޓްސް އެވޯޑްސް ހަފްލާ އަށް އިނގިރޭސިވިލާތަށް އުފަން، ވީލްޗެއާ ޓެނިސް ތަރި ލޫސީ ސުކާ އަންނަ ގޮތަށް ހަމަޖެހިއްޖެ އެވެ.
ރާއްޖޭގައި މިހާތަނަށް ބޭއްވޭ އެންމެ ޝަރަފްވެރި ކުޅިވަރު އެވޯޑް ހަފްލާގައި ދުނިޔޭގެ ލެވަލްގެ މަޝްހޫރު ގިނަ އެތުލީޓުންނެއް ބައިވެރިވާނެ އެވެ. މިހާތަނަށް ޔޫތު މިނިސްޓަރު އަހުމަދު މަހުލޫފް އިއުލާނުކުރައްވާފައިވާ ގޮތުން، ބްރެޒިލްގެ ފުޓްބޯޅަ ތަރި ރޮބާޓޯ ކާލޯސް އާއި ވޮލީ ޗެމްޕިއަން ގިލްބާޓޯ ގޮޑޯއި (ގީބާ) އަދި ޕްރޮފެޝަނަލް ވީލް ޗެއާ ޓެނިސް އެތުލީޓް ރީޑް، ސްޕެއިނުގެ ފުޓްބޯޅަ ލެޖެންޑް މިކޭލް ސަލްގާޑޯ، އަދި ސްވިޑެންގެ ކާމިޔާބު ފެތުންތެރިޔާ ސާރާ ހޮޔޯސްޓްރޯމް ސްޕޯޓްސް އެވޯޑަށް ރާއްޖެ އަންނާނެ އެވެ.
އުމުރުން 41 އަހަރުގެ ލޫސީ ޕްރޮފެޝަނަލްކޮށް ޕެރަލިމްޕިކް ޓެނިހުގައި ވާދަކުރަން ފެށީ 2002 ވަނަ އަހަރު އެވެ. އޭނާ ވަނީ ޕެރަލިމްޕިކް ޓެނިސް އިވެންޓްގައި އެއް ރިހި މެޑަލާއި ދެ ލޯ މެޑަލް ހޯދައިފަ އެވެ. މިއީ އެންމެ ފަހުން ބޭއްވި ޓޯކިޔޯ، ރިޔޯ އަދި ލަންޑަން އޮލިމްޕިކްސްގައި އޭނާ ހާސިލްކޮށްފައިވާ ކާމިޔާބީތަކެކެވެ.
ލޫސީގެ އެހެން ކާމިޔާބީތަކަށް ބަލާއިރު، ކެރިއަރުގައި މިހާތަނަށް 100 އަށް ވުރެ ގިނަ ތަށި ހޯދާފައިވާއިރު، އޭނާ ވަނީ މީގެ ކުރިން ދުނިޔޭގެ ރޭންކިންގައި ސިންގަލްސް ބައިން ފަސް ވަނަ އަށް އަދި ޑަބަލްސް ބައިން ތިން ވަނަ އަށް އަރައިފަ އެވެ. ލޫސީ އަކީ ޓެނިހުގެ ގްރޭންޑް ސްލޭމް މުބާރާތްތަކުގައި ވެސް ވިދުންގަދަ ތަރިއެކެވެ.
މޯލްޑިވްސް ސްޕޯޓްސް އެވޯޑަށް ރާއްޖެ އަންނަ މަޝްހޫރު ފަރާތްތައް ރާއްޖޭގައި ތިބޭނީ އެވޯޑްސްގެ ހޮސްޕިޓާލިޓީ ޕާޓްނަރު، ކްރޮސްރޯޑްސްގަ އެވެ. މި އެވޯޑްގެ އޮންލައިން މީޑިއާ ޕާޓްނަރަކީ "އަދަދު" އެވެ. ސްޕޯޓްސް އެވޯޑް ހަފްލާ ބާއްވަން ނިންމާފައިވަނީ ކުޅިވަރު އެކުވެނި އެއް ނަމްބަރު ދަނޑުގައި ކަމަށްވާތީ މި މަހު 11-19 އަށް އެ ތަން އާންމުންނަށް ބަންދުވާނެ ކަމަށް ޔޫތު މިނިސްޓްރީން ވަނީ އިއުލާނުކޮށްފަ އެވެ.
