މި މަހު 17 ވަނަ ދުވަހު ރާއްޖޭގައި ބާއްވާ މޯލްޑިވްސް ސްޕޯޓްސް އެވޯޑްސް އަށް ޕޫލް ބިލިއާޑްގެ ދުނިޔޭގެ ޗެމްޕިއަނެއް އޮސްޓްރިއާގެ އަލްބިން އޮސްކަން ރާއްޖެ އަންނަ ގޮތަށް ހަމަޖެހިއްޖެ އެވެ.
ރާއްޖޭގައި މިހާތަނަށް ބޭއްވޭ އެންމެ ޝަރަފްވެރި ކުޅިވަރު އެވޯޑް ހަފްލާގައި ދުނިޔޭގެ ލެވަލްގެ މަޝްހޫރު ގިނަ އެތުލީޓުންނެއް ބައިވެރިވާނެ އެވެ. މިހާތަނަށް ޔޫތު މިނިސްޓަރު އަހުމަދު މަހުލޫފް އިއުލާނުކުރައްވާފައިވާ ގޮތުން، ބްރެޒިލްގެ ފުޓްބޯޅަ ތަރި ރޮބާޓޯ ކާލޯސް އާއި ވޮލީ ޗެމްޕިއަން ގިލްބާޓޯ ގޮޑޯއި (ގީބާ) އަދި ޕްރޮފެޝަނަލް ވީލް ޗެއާ ޓެނިސް އެތުލީޓް ރީޑް، ސްޕެއިނުގެ ފުޓްބޯޅަ ލެޖެންޑް މިކޭލް ސަލްގާޑޯ، އިނގިރޭސިވިލާތަށް އުފަން، ވީލްޗެއާ ޓެނިސް ތަރި ލޫސީ ސުކާ އަދި ސްވިޑެންގެ ކާމިޔާބު ފެތުންތެރިޔާ ސާރާ ހޮޔޯސްޓްރޯމް ސްޕޯޓްސް އެވޯޑަށް ރާއްޖެ އަންނާނެ އެވެ.
މީގެ އިތުރުން ވެސް ގައުމީ ސްޕޯޓްސް އެވޯޑްސް ހަފުލާ އަށް ގިނަ މެހެމާނުންތަކެއް އަންނަ ގޮތަށް ވަނީ ހަމަޖެހިފަ އެވެ.
ދުނިޔޭގެ ރޭންކިން އެއް ވަނައިގައި އޮތް އަލްބިން އަކީ 9 ބޯލްގެ 2016 އާއި 2021 ވަނަ އަހަރުގެ ދުނިޔޭގެ ޗެމްޕިއަނެވެ. އަދި ދެ ފަހަރެއްގެ މަތިން ޕޫލް ވޯލްޑް ކަޕްގެ ޗެމްޕިއަންކަން ހޯދާފައިވާ އުމުރުން 31 އަހަރުގެ އަލްބިން ވަނީ މިދިޔަ އަހަރުގެ އެންމެ މޮޅު ކުޅުންތެރިޔާގެ މަގާމުގެ އިތުރުން ޗައިނާ އޯޕަން ކާމިޔާބުކޮށްފަ އެވެ.
ޕްރޮފެޝަނަލްކޮށް 2006 ވަނަ އަހަރު ބިލިއާޑް ކުޅެން ފެށި އަލްބިން އަކީ ޔޫރޯ ޓޫއާގައި ވެސް ކާމިޔާބު ކުޅުންތެރިއެކެވެ. އޭނާގެ ރެކޯޑާ ހަމަކުރެވޭނެ ތިބީ މަދު ކުޅުންތެރިންނެވެ.
މޯލްޑިވްސް ސްޕޯޓްސް އެވޯޑަށް ރާއްޖެ އަންނަ މަޝްހޫރު ފަރާތްތައް ރާއްޖޭގައި ތިބޭނީ އެވޯޑްސްގެ ހޮސްޕިޓާލިޓީ ޕާޓްނަރު، ކްރޮސްރޯޑްސްގަ އެވެ. މި އެވޯޑްގެ އޮންލައިން މީޑިއާ ޕާޓްނަރަކީ "އަދަދު" އެވެ. ސްޕޯޓްސް އެވޯޑް ހަފްލާ ބާއްވަން ނިންމާފައިވަނީ ކުޅިވަރު އެކުވެނި އެއް ނަމްބަރު ދަނޑުގައި ކަމަށްވާތީ މި މަހު 11-19 އަށް އެ ތަން އާންމުންނަށް ބަންދުވާނެ ކަމަށް ޔޫތު މިނިސްޓްރީން ވަނީ އިއުލާނުކޮށްފަ އެވެ.
