ރައްޔިތުންގެ މަޖިލީހުގައި އަންހެން މެމްބަރުންގެ އަދަދު އިތުރުކުރުމަކީ އުއްމީދެއް ކަމަށް އެ މަޖިލީހުގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
މިއަދަކީ ބައިނަލް އަގުވާމީ ގޮތުން ފާހަގަކުރާ އަންހެނުންގެ ދުވަސްކަމަށް ވާތީ މަޖިލީހުގެ މިއަދުގެ ޖަލްސާ ފަށްޓަވަމުން އެމަނިކުފާނު ވިދާޅުވީ އަންހެނުންގެ ދުވަސް ފާހަގަ ކުރުމަށްޓަކައި ކުރަންވީ ކަމަކީ މަލާއި ކޭކު ފަދަ އެއްޗިހި ދިނުމާއި ރަތްދޫލަ އެޅުން ފަދަ ކަންތައްތައް ނޫން ކަމަށް (ޖެންޑާ) މިނިސްޓްރީން އިރުޝާދުދީފައިވާ ކަމަށެވެ.
އޭގެ ބަދަލުގައި ކުރަންވީ ކަމަކީ މާނަވީ ގޮތެއްގައި އަންހެނުންނާ ގުޅޭ ކަންކަމަށް ބަދަލު ގެނައުމަށް ނިޔަތްގަނެ، އެގޮތަށް މަސައްކަތްކުރުން ކަމަށް ވެސް އެމަނިކުފާނު ވިދާޅުވި އެވެ.
"އަޅުގަނޑުމެންގެ އުއްމީދެއް އެއީ ރައްޔިތުންގެ މަޖިލީހުގެ މެމްބަރުންގެ ގޮތުގައި ވެސް އަންހެނުންގެ އަދަދު ގިނަކުރުން،" ނަޝީދު ވިދާޅުވި އެވެ.
އަންހެނުން ބާރުވެރިކުރުމަށް މަޖިލީހުން ކޮށްފައިވާ މުހިއްމު އެއް ކަމަކީ އެމަނިކުފާނު ވިދާޅުވިގޮތުގައި ލޯކަލް ކައުންސިލްތަކުން އަންހެނުންނަށް ގޮނޑި ހާއްސަަކުރަން ގާނޫނަށް ގެނައި ބަދަލެވެ. އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް ގެނައި އެ އިސްލާހުގެ ސަބަބުން ރަށްރަށުގެ ހިންގުމުގެ ދާއިރާގައި އަންހެނުންގެ ބައިވެރިވުން ބޮޑުވެފައިވާ ކަމަށް ވެސް އެމަނިކުފާނު ވިދާޅުވި އެވެ.
"އަންހެނުންނަށް ގޮނޑި ހާއްސަކުރަން ޖެހޭ"
އެމްޑީޕީގެ ޕާލަމެންޓްރީ ގްރޫޕްގެ ލީޑަރު މުހައްމަދު އަސްލަމް. މަޖިލީހުގައި އަންހެނުންނަށް ގޮނޑި ހާއްސަކުރަން ޖެހޭ ކަމަށް އޭނާ ކުރިން ވިދާޅުވި.
ލޯކަލް ކައުންސިލްތަކުގެ 33 ޕަސެންޓް ގޮނޑި އަންހެނުންނަށް ހާއްސަކޮށްފައި އޮންނަ ގޮތަށް ރައްޔިތުންގެ މަޖިލީހުގެ ޖާގަ ވެސް ހާއްސަކުރަން ޖެހޭ ކަމަށް ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ މެމްބަރު އަދި އެމްޑީޕީގެ ޕާލަމެންޓްރީ ގްރޫޕްގެ ލީޑަރު މުހަައްމަދު އަސްލަމް މީގެ ކުރިން ވަނީ ވިދާޅުވެފަ އެވެ.
ރާއްޖޭގައި އަންހެނުންނާ މެދު ގެންގުޅޭ ތަފާތުކުރުންތައް ދެނެގަނެ، އެކަންތައްތައް ހުއްޓުވަން ކުރަންވީ ކަންތައްތައް ދެނެގަތުމަށް ރައްޔިތުންގެ މަޖިލީހުން ކުރިއަށް ގެންދިޔަ އިންކުއަރީގެ ރިޕޯޓަށް، ނޮވެމްބަރު 17، ގައި މަޖިލީހުގައި ކުރި ބަހުސްގައި އަސްލަމް ވިދާޅުވީ މަޖިލީހުގައި ގާނޫނު ހެދުމާއި ނިންމުންތައް ނިންމުގައި އަންހެނުންގެ ބައިވެެރިވުން އޮންނަން ޖެހޭ ކަމަށާއި ނަަމަވެސް އެކަން މިޙާރު އެގޮތަށް ނުވާ ކަމަށެވެ. މިސާލެއްގެ ގޮތުގައި އޭނާ ވިދާޅުވީ ދައުލަތުގެ ބަޖެޓް ދިރާސާކުރާ އިރު ޖެންޑާ ރެސްޕޮންސިވްކޮށް އެ މަސައްކަތް ނުކުރެވުމެވެ. އެކަން އެގޮތަށް ނުކުރެވެނީ އޭނާ ވިދާޅުވި ގޮތުގައި މަޖިލީހުގެ މާލިއްޔަތު ކޮމިޓީގައި އަންހެން މެމްބަރަކު ނެތުުމުންނެވެ.
"މަޖިލީހުގެ އަދަދަށް ބަލައިލާ އިރު އަޅުގަނޑު ހަމަ ދަންނަވަން ބޭނުން ވީ، ލޯކަލް ކައުންސިލްތަކުގެ އިންތިހާބުގައި ތެއްތިރީސް ޕަސެންޓް، ތިންބައިކުޅަ އެއްބައި [ގޮނޑި] އަންހެނުން ތަމްސީލުކުރާ ގޮތަށް އޮންނަ އޮތުން، ރައްޔިތުންގެ މަޖިލީހަށް ވެސް ހަމަޖައްސަަން އެބަ ޖެހޭ، ގާނޫނު އަސާސިއަށް ނުވަތަ ގާނޫނުތަށް ގެނެވޭ ބަދަލެއްގެ ތެރެއިން ވިޔަސް،" އަސްްލަމް ވިދާޅުވި އެވެ.
އެހެން ނަމަވެސް މަޖިލީހުގައި އަންހެނުންނަށް ވަކި އަދަދެއްގެ ގޮނޑި ހާއްސަކުރާ ގޮތަށް ގާނޫނު ބަދަލުކުރަން އޭނާ އަދި ބިލެއް ހުށަހަޅުއްވައިފައެއް ނުވެ އެވެ.
