ކުރީގައި އަމަލުކުރަމުން އައި ނޫ ގާނޫނުއަސާސީގެ ދަށުން ފުލުހުން ހިފެހެއްޓި ފައިސާތަކެއް ހޯދުމުގެ މައްސަލަ ސުޕްރީމް ކޯޓުގައި ވެސް ނާކާމިޔާބުވެއްޖެ އެވެ.
މި ދައުވާއަކީ ނޮވެމްބަރު 8، 1999، ގައި ކޫލް މޯލްޑިވްސް އާއި އޭއޭއޭ ކިޔާ ކުންފުންޏަކާ ދެމެދު ވީ އެއްބައްވުމެއް ހައްލު ކުރުމަށް ފުލުހުންގެ އިދާރާއަށް މައްސަލަ ހުށަހަޅައިގެން އުޅުމުގެ ތެރޭގައި އުފަންވި މައްސަލައެކެެވެ. ޑިފެންސް މިނިސްޓްރީގެ ދަށުގައި އޮތް ފުލުހަށް އޭރު މަދަނީ މައްސަލަތައް ބެލުމުގެ އިހްތިސޯސްވެސް ލިބިގެންވެ އެވެ.
އެގޮތުން ކޫލް މޯލްޑިވްސްއިން އޭއޭއޭއަށް ބާޖެއް ކުއްޔަށް ދޫކޮށްގެން ލިބެން ޖެހޭ ފައިސާ ހޯދުމަށް ފުލުހަށް ދިއުމުން އެ މައްސަލައިގެ ތަހުގީގު ކުރިއަށް ގެންދިއުމަށް އޭއޭއޭ އަތުން ދެލައްކަ އަށްޑިހަ ފަސްހާސް ރުފިޔާގެ ސެކިއުރިޓީ ޑިޕޮސިޓެއް ފުލުހުން ނެގި އެވެ.
އޭރު އަމަލުކުރަމުންދާ އުސޫލުގެ ދަށުން ފުލުހުން ނެގި ފައިސާ ހޯދުމަށް އޭއޭއޭއިން 2015 ވަނަ އަހަރު ސިވިލް ކޯޓަށް ދިޔައީ އެދެމެދުގައި ހޭދަވި 13 އަހަރަށްވާ ގެއްލުމުގެ ބަދަލުގެ ގޮތުގައި ޖުމްލަ ހަލައްކަ ހަތްދިހަ ދެ ހާސް ރުފިޔާ ނަގައިދިނުމަށް އެދި އެވެ. ނަމަވެސް ސިވިލް ކޯޓުން އެ ބަދަލު ނަގައި ނުދެވޭނެ ކަމަށް ކަނޑައެޅީ އެ ފައިސާ ހުރީ ފުލުހުންގެ ބެލުމުގެ ދަށުގައި ކަމަށް ނުވާތީ އެވެ.
މެއި 25، 2000 ވަނަ އަހަރު ކޫލް މޯލްޑިވްސްއިން، އޭއޭއޭ ކުންފުންޏަށް ދޫކުރި ބާޖަށްވާ ހަތްލައްކަ ފަންސާސް ހަތް ހާސް ރުފިޔާ ހޯދުމަށް ސިވިލް ކޯޓުގައި އެދުމުން، އެ ކޯޓުން ކުރި ހުކުމުގައި އޮތީ އޭއޭއޭއިން ފުލުހުންގެ އިދާރާގައި ބެހެއްޓި ސެކިއުރިޓީ ޑިޕޮސިޓްގެ އަދަދު އުނި ކުރުމަށްފަހު ހަތަރުލައްކަ ހަތްދިހަ ދެ ހާސް ރުފިޔާ އެ ކުންފުންޏަށް ދައްކާ ހަލާސްކުރުމަށެވެ. ފުލުހުންގެ އިދާރާއިން އެ ފައިސާ އޭއޭއޭ ކުންފުންޏަށް ދެއްކުމަށްޓަަކައި ހަވާލުކުރީ ކޫލްމޯލްޑިވްސް ކުންފުންޏާ އެވެ.
އެހެންވެ އޭއޭއޭއިން ފުލުހުންނާ ދެކޮޅަށް ކުރި ދައުވާގައި ހޯދަން އެދުނު ފައިސާ، ޑިފެެންސް މިނިސްޓްރީ މެދުވެރިކޮށް ކޫލް މޯލްޑިވްސްއާ ހަވާލުކުރެވިފައިވާތީ އެ މައްސަލަ ކުރިއަށް ނުގެންދެވޭނެ ކަމަށް ސިވިލް ކޯޓުން އޭރު ނިންމި އެވެ. އެ ނިންމުން ހައިކޯޓުގައި އިސްތިއުނާފް ކުރުމުން ސިވިލް ކޯޓުގައި ކުރި އެ ދައުވާ ފުލުހުންނާ ދެކޮޅަށް ކުރިއަށް ނުގެންދެވޭނެ ކަމަށް ހައިކޯޓުން ވެސް ނިންމި އެވެ. ހައިކޯޓުން ބުނެފައި ވަނީ އެ ފައިސާ ހޯދުމަށް ދައުވާ ކުރަން ޖެހޭނީ ކޫލް މޯލްޑިވްސް ކުންފުނީގެ މައްޗަށް ކަމަށެވެ.
އެ ނިންމުމާމެދު ހިތްހަމަނުޖެހިގެން އޭއޭއޭއިން ސުޕްރީމް ކޯޓުގައި އެ މައްސަލަ އިސްތިއުނާފު ކުރީ ސެކިއުރިޓީ ޑިޕޮސިޓްގެ ގޮތުގައި ބެހެއްޓި ފައިސާއިން ދައުލަތަށް ނުހައްގު މުއްސަނދިކަމެއް ލިބިފައިވާ ކަމަށް ބުނެ އެވެ.
އަދި ހައިކޯޓުގެ ނިންމުމުން ފުލުހުންނާއި، އޭއޭއޭއާ ދެމެދު ވީ އެއްބަސްވުމުގެ ދަށުން އުފަންވި ދެބަސްވުމަށް ހައްލެއް ނުލިބުނު ކަމަށް ބުނެ އެވެ.
ނަމަވެސް ސުޕްރީމް ކޯޓުން، ބެންޗުގައި ހިމެނިވަޑައިގަންނަވާ އެހެން ފަނޑިޔާރުންގެ ތާއީދާ އެކު، ޑރ. މުހައްމަދު އިބްރާހިމް އިއްވެވި ހުކުމްގައި ވަނީ ހައިކޯޓުގެ ނިންމުމަށް ބަދަލު ގެންނަން ނުޖެހޭ ކަމަށް ކަނޑައަޅުއްވާ އެ މައްސަލަ ނިންމަވާފަ އެވެ.
"...ދައުލަތުގެ ބެލުމުގެ ދަށުގައި ސެކިއުރިޓީ ޑިޕޮޒިޓް ފައިސާ 08 ނޮވެންބަރު 1999 އިން 01 ސެޕްޓެންބަރު 2014 އަށް ބަހައްޓާފައިވާ ކަމަށް އިސްތިއުނާފު ކުރާ ފަރާތުން ބުނި ކަމުގައިވިޔަސް އެއީ ހަގީގަތެއް ނޫން ކަމާއި، އެ ފައިސާ ދައުލަތުގެ ބެލުމުގެ ދަށުގައި ނެތްކަން މަދަނީ ކޯޓުގެ ނަންބަރު 2000/MC/1026 ގަޒިއްޔާގެ ޝަރީއަތް ނިމުނު ގޮތުގެ ރިޕޯޓު ބޭލުމުން އެނގެ އެވެ." ފަނޑިޔާރު ޑރ.މުހައްމަދު އިބްރާހީމްގެ ރައުޔުގައި ވިދާޅުވި އެވެ.
އެެހެންވެ ސުޕްރީމް ކޯޓުން ނިންމީ އެ މައްސަލާގައި ދައުލަތުގެ މައްޗަށް ދައުވާ ކުރުމުގެ ހައިސިއްޔަތެއް އެ ކުންފުންޏަށް ލިބިގެން ނުވާ ކަމަށެވެ. އަދި 13 އަހަރަށްފަހު އެ ފައިސާ ހޯދުމަށް ވަކާލާތު ކުރުމުގެ ޖާގައެއް އޮތް ކަމުގައި ގަބޫލުނުކުރައްވާ ކަމަށް ވެސް ފަނޑިޔާރު ހުކުމުގައި ވިދާޅުވި އެވެ.
