އެސްޓީއޯއިން ރާއްޖެއަށް އެތެރެކުރާ މުދާ ރަށްރަށުގައި ވިއްކަން ޕީޕަލްސް ޗޮއިސް އެޖެންޓުން އެ ކުންފުނިން ތައާރަފުކޮށްފި އެވެ.
މިއީ އެ ކުންފުނީގެ ކާޑު އެޖެންޓުންނާއި ކޮންސްޓްރަކްޝަން އެޖެންޓުން މޮޑެލްއާ އެއްގޮތަށް ފަރުމާކުރެވިފައިވާ ވިޔަފާރި މޮޑެލްއެކެވެ. މި މޮޑެލްގެ ދަށުން އެޖެންޓުކަން ނަގާ ވިޔަފާރިތަކަށް އެސްޓީއޯއިން ވިއްކާ މުދާ ރަށްރަށުގައި ވިއްކުމުގެ މަގުފަހި ވެގެން ދާނެ އެވެ.
އިއްޔެ ބޭއްވި ރަސްމިއްޔާތެއްގައި 136 ވިޔަފާރިއަކަށް އެޖެންޓުކަމުގެ ލިޔުން ހަވާލުކޮށްފައިވާއިރު، އެސްޓީއޯއިން ބުނީ މިކަމަށް ވިޔަފާރިވެރިންގެ ފަރާތުން ވަރަށް ބޮޑު ތަރުހީބެއް ލިބެމުން އަންނަ ކަމަށެވެ. އަދިވެސް އެޖެންޓުކަން ބޭނުންވާ ބަޔަކަށް އެ ފުރުސަތު އެބައޮތް ކަމަށް ވެސް އެ ކުންފުނިން ބުންޏެވެ.
އެގޮތުން މިހާރު ވެސް އެސްޓީއޯގެ ކާޑު ނޫނީ ކޮންސްޓްރަކްޝަން އެޖެންޓުންގެ ގޮތުގައި ތިބި ވިޔަފާރިތަކަށް ވެސް އެ ފުރުސަތު އެބައޮތެވެ.
އެސްޓީއޯ ޕީޕަލްސް ޗޮއިސްގެ ޖެނެރަލް މެނޭޖަރު އަހުމަދު ޝިފާން ޕީޕަލްސް ޗޮއިސް އެޖެންޓުކަމުގެ ލިޔުން ހަވާލުކުރަނީ. -- ފޮޓޯ: އަބްދުﷲ އިޔާން/އަދަދު
މިއީ އެސްޓީއޯއިން ވިޔަފާރިކުރާ ގޮތް ބަދަލުކޮށް، ހުރިހާ ރަށެއްގައި ގާއިމުވުމުގެ ބަދަލުގައި އެ ރަށްރަށުގެ ކުދި ވިޔަފާރިތަކާ ގުޅިގެން އެސްޓީއޯގެ މުދަލާއި ހިދުމަތްތައް ރައްޔިތުންނަށް ފޯރުކޮށްދިނުމުގެ މަގުސަދުގައި އެސްޓީއޯއިން ފެށި ކަމެކެވެ.
އަދި، ކާޑު އެޖެންޓުންނާއި ކޮންސްޓްރަކްޝަން އެޖެންޓުންގެ ކާމިޔާބީއަށް ބަލާއިރު، ޕީޕަލްސް ޗޮއިސް އެޖެންޓުކަން ވެސް ކާމިޔާބު ވާނެ ކަމަށް އެ ކުންފުނިން ބުނެ އެވެ.
