ބިލިއާޑްގެ 8 ބޯލް އެސޯސިއޭޝަން ކަޕްގެ ފައިނަލުގައި އިސްމާއިލް ޖީހާން (މައިލޯ) 6-9 ފްރޭމުން ބަލިކޮށް ހަސަން ޝާޒް މުހައްމަދު ޗެމްޕިއަންކަން ހޯދައިފި އެވެ.
މޯލްޑިވްސް ޕޫލް ބިލިއާޑް އެސޯސިއޭޝަން (އެމްޕީބީއޭ)ގެ ފުރަތަމަ މުބާރާތުގެ ޗެމްޕިއަންކަން ރާއްޖޭގެ އެއް ވަނަ ކުޅުންތެރިޔާ ޝާޒް ހޯދީ ފޯރިގަދަ ފައިނަލް މެޗަކަށް ފަހުގަ އެވެ. ފައިނަލް މެޗުގެ ކުރީކޮޅު ކުރީގައި އޮތީ މައިލޯ އެވެ. ނަމަވެސް ޝާޒް ވަނީ ފަހަތުން އަރާ މެޗު ކާމިޔާބުކޮށްފަ އެވެ.
ބިލިއާޑްގެ 8 ބޯލް އެސޯސިއޭޝަން ކަޕުގައި މި އަހަރު 76 ކުޅުންތެރިން ވާދަކުރި އެވެ. މުބާރާތުގައި ފުރަތަމަ ކުޅުނީ ހުރިހާ ކުޅުންތެރިން 16 ގްރޫޕަކަށް ބަހާލައިގެންނެވެ. އޭގެ ފަހުން ކޮންމެ ގްރޫޕަކުން އެންމެ މޮޅު ދެ ކުޅުންތެރިން ނޮކްއައުޓް ބުރަށް ދަތުރުކޮށް ނޮކްއައުޓް ބުރުގެ މެޗުތައް ކުރިއަށް ގެންދިޔައީ އެވެ. މި އަހަރުގެ މުބާރާތުގައި ޖުމްލަ 175 މެޗުވަނީ ކުޅެފައެވެ.
ރޭ ކުރިއަށްދިޔަ 8 ބޯލް އެސޯސިއޭޝަން ކަޕުގެ ފައިނަލް މެޗަށް ފަހު ބޭއްވި އިނާމް ދިނުމުގެ ރަސްމިއްޔާތުގައި ރާއްޖޭގެ ގައުމީ ޓީމްގެ ކުޅުންތެރިންނާއި އޮފިޝަލުންނަށް ވަނީ ޖޯޒީ ހަވާލުކޮށްފަ އެވެ.
ގައުމީ ބިލިއާޑް ފިރިހެން ޓީމްގައި ހިމެނޭ 8 ކުޅުންތެރިން
ފިރިހެން ގައުމީ ޓީމްގައި ހިމެނޭ 8 ކުޅުންތެރިންނަކީ ޝާޒް، ހުސައިން ފަޔާޒް، މުހައްމަދު ޝަރީފް، ހަސަން ޝަފްރާޒް، އިސްމާއިލް ސުވެއިދު، މުހައްމަދު ސާހިލް، އަލީ ފަޔާޒް އަދި އިސްމާއިލް ޖީހާން އެވެ. ފިރިހެން ޓީމްގެ ދެ އޮފިޝަލުންނަކީ ހުސައިން ސަނީފު އާއި ޝާޒީޏް ސަމަދު އެވެ.
އަންހެން ގައުމީ ޓީމްގައި ހިމެނެނީ ހަތަރު ކުޅުންތެރިންނެވެ. އެއީ އާމިނަތު ފާތީ، ދީނާ އަހުމަދު، އައިމިނަތު އަޒްރާ އަދި ފަސްނާ މޫސާ އެވެ. މި ޓީމްގެ ދެ އޮފިޝަލުންނަކީ މުހައްމަދު އަކްސަމް ވަހީދު އާއި އަހުމަދު ޒިޔާން އެވެ.
ގައުމީ ބިލިއާޑް ޓީމްގައި ހިމެނޭ އަންހެން 4 ކުޅުންތެރިން
އެމްޕީބީއޭ އިން މި އަހަރަށް ރާވާފައިހުރި ހަރަކާތްތަކަށް ބަލާއިރު 10 މުބާރާތެއް ވަނީ ތާވަލްކޮށްފަ އެވެ. އެ ގޮތުން މި މަހު ކުރިއަށްދާ 8 ބޯލް އެސޯސިއޭޝަން ކަޕަށް ފަހު އަންނަ މަހު އޮންނާނީ 8 ބޯލް ޗެމްޕިއަންޝިޕެވެ.
އޭގެ ފަހުން މެއި މަހު އިންޓަ އޮފީސް ބިލިއާޑް މުބާރާތް އޮންނާނެ އެވެ. ޖޫން މަހު މޯލްޑިވްސް އޯޕަންގެ ނަމުގައި ބައިނަލްއަގްވާމީ މުބާރާތެއް ބާއްވަން ތާވަލްކޮށްފައިވާއިރު، އޮގަސްޓް މަހު އޮންނާނީ 10 ބޯލް އެސޯސިއޭޝަން ކަޕެވެ. އޭގެ ފަހުން 10 ބޯލް ޗެމްޕިއަންޝިޕް އޮންނާނެ އެވެ.
އަހަރުގެ އެންމެ ފަހު ހަތަރު މުބާރާތްތަކަކީ ސެޕްޓެމްބަރު މަހު އޮންނަ 9 ބޯލް އެސޯސިއޭޝަން ކަޕާއި، 9 ބޯލް ޗެމްޕިއަންޝިޕްގެ އިތުރުން އޮކްޓޯބަރު މަހު އޮންނަ ގައުމީ ބިލިއާޑް މުބާރާތާއި ނޮވެމްބަރު މަހު އޮންނަ އިންޓަ އެޓޯލް ބިލިއާޑް މުބާރާތެވެ.
