ދިވެހިރާއްޖޭގައި މާލީ ބައިވެރިވުން (ފައިނޭންޝަލް އިންކްލޫޝަން) އޮތް މިންވަރު ދެނެގަތުމުގެ މަގުސަދުގައި މަރުކަޒީ ބޭންކް، މޯލްޑިވްސް މަނިޓަރީ އޮތޯރިޓީ (އެމްއެމްއޭ)އިން ދިރާސާއެއް ކުރަން ނިންމައިފި އެވެ.
މި މަސައްކަތަކީ ރާއްޖޭގެ މާލީ ދާއިރާ ހަރުދަނާކުރަން އެމްއެމްއޭއިން ފަށާފައިވާ މަސައްކަތުގެ ދަށުން ކުރެވޭ ކަމެކެވެ. އަދި މި ދިރާސާ ބޭނުންކުރެވިގެން ދާނީ "ނެޝަނަލް ފައިނޭންޝަލް އިންކްލޫޝަން ސްޓްރެޓެޖީ" އެކުލަވާލުމަށެވެ.
އެމްއެމްއޭއިން ބުނެފައިވާ ގޮތުގައި ފައިނޭންޝަލް އިންކްލޫޝަން ސާވޭއިން ލިބޭ މައުލޫމާތުން ރާއްޖޭގެ މާލީ ބައިވެރިވުން އޮތް މިންވަރު ދެނެގަތުމުގެ އިތުރުން، މާލީ ހިދުމަތްތަކަށް ހޭލުންތެރިކަން ހުރި މިންވަރު ދެނެގަނެވޭނެ އެވެ. ހަމައެހެންމެ މާލީ ބައިވެރިވުމަށް ހުރި ގޮންޖެހުންތައް ވެސް ދެނެގަނެވޭނެ އެވެ.
ފައިނޭންޝަލް އިންކްލޫޝަން ސާވޭ އޮންނާނީ މި މަހުގެ ފުރަތަމަ ހަފުތާއިން ފެށިގެން އޭޕްރިލް މަހުގެ ނިޔަލަށެވެ. މި ސާވޭ ކުރިޔަށް ގެންދާނީ ތަރުތީބެއް ނެތި ހޮވާލެވޭ 63 ރަށަކުން، 1500 މީހުން ބައިވެރިކޮށްގެނެވެ.
މި ދިރާސާ ކުރިޔަށް ގެންދާނީ އެފްޖޭއެސް ކޮންސަލްޓިން ޕްރިއިވެޓް ލިމިޓެޑުންނެވެ. އެފްޖޭއެސް އަކީ މިފަދަ ދިރާސާތައް ކުރުމުގެ ފަންނާއި ތަޖުރިބާ ލިބިފައިވާ ކުންފުންޏެކެވެ.
އެމްއެމްއޭއިން ބުނީ މި ދިރާސާގައި މާލީ ބައިވެރިވުން އޮތް މިންވަރު ދެނެގަންނާނީ ތިން ގޮތަކުން ކަމަށެވެ. އެއީ މާލީ ހިދުމަތްތަކަށް ހުރި "އެކްސެސް" ނުވަތަ މާލީ އިދާރާތަކުގެ ހިދުމަތްތައް ހޯދާ ގޮތާއި، "ޔޫސޭޖު" ނުވަތަ މާލީ ހިދުމަތްތައް ބޭނުންކުރާ މިންވަރާއި، "ކޮލިޓީ" ނުވަތަ ހިދުމަތް ހޯދާ މީހުންގެ ތަޖުރިބާ އެވެ.
މި ދިރާސާ ނިމުމުން މާލީ ހިދުމަތްތައް ހޯދަން ހުރި ގޮންޖެހުންތަކާ އެކު، މާލީ ހިދުމަތްތައް ނުހޯދާ މީހުން އެ ހިދުމަތް ނުހޯދާ ސަބަބު ދެނެގަނެވޭނެ ކަމަށް ވެސް އެ އިދާރާއިން ބުންޏެވެ.
އެމްއެމްއޭން ވަނީ މި ދިރާސާގެ ހޯދުންތައް ކަށަވަރު ކުރަން ދިރާސާއަށް ހޮވޭ މީހުން މި މަސައްކަތަށް އެއްބާރުލުން ދޭން އެދިފަ އެވެ.
