ކުރިއަށް އޮތް ތިން ހަތަރު އަހަރެއްގެ ތެރޭގައި ރާއްޖޭގެ ހުރިހާ ރަށަކުން ކަނޑަށް ނަޖިސް ބޭރުވާނެ ކަމަށާއި އެއީ ޓްރީޓްނުކުރާ ނަޖިހަށް ވެއްޖެ ނަމަ އެކަމުން ނުކުންނާނެ ނަތީޖާ (ސަރުކާރަށް) މިހާރު އެނގެންވާނެ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
ފެނާއި ނަރުދަމާގެ ގާނޫނަށް ބަދަލުތަކެއް ގެންނަން ސަރުކާރުން ހުށަހަޅާފައިވާ ބިލަށް މަޖިލީހުގެ މިއަދުގެ ޖަލްސާގައި ކުރި ބަހުސްގައި މެމްބަރުންނަށް ފުރުސަތު ދެއްވުމުގެ ކުރިން އެމަނިކުފާނު ވިދާޅުވީ ކަނޑަށް ބޭރުކުރާ ނަޖިސް ޓްރީޓްކުރުމަކީ ވަރަށް ބޭނުންތެރިކަމެއް ކަމަށެވެ. އެގޮތަށް ކަންތައް ނުކުރާ ނަމަ މަސްވެރިކަމަށް ބަދަލުތައް އަންނާނެ ކަަމަަށް ވެސް އެމަނިކުފާނު ވިދާޅުވި އެވެ. އެކަމުން ފަރުތަކަށް އަންނާނެ ބަދަލަކީ ވެސް މިހާރު އެނގެންވާނެ ކަމެއް ކަަމަށް ވެސް އެމަނިކުފާނު ވިދާޅުވި އެވެ.
"އެއީ މާލެއަށް ދިމާވެފައި މިއޮތް ގޮތުން، އަޅުގަނޑުމެނަށް މިހާރު އެކަން ތަސައްވަރުކުރެވި، އެކަމާ ގުޅޭ ގޮތުން ވިސްނުން ގެންގުޅެން އެނގެންވާނެ ކަމެއް،" ނަޝީދު ވިދާޅުވި އެވެ.
ފެނާއި ނަރުދަމާގެ ނިޒާމުގެ ގާނޫނަށް ބަދަލުގެންނަން ސަރުކާރުގެ ފަރާތުން މަތިވެެރި ދާއިރާގެ މެމްބަރު ހަސަން ޒަރީރު ހުށަހެޅުއްވި ބިލުގައިވާ މުހިންމު އެއް ކަމަކީ ފެނާއި ނަރުދަމާގެ ނިޒާމު ގާއިމުކުރަން ބޭނުންކުރާ ސާމާނު ޓެސްޓްކޮށް ސެޓިފައިކުރާނެ ގަވައިދެއް ހަދަން ކަމާ ބެހޭ އިދާރާތަކަށް ލާޒިމުކުރުމެވެ. ފެނާއި ނަރުދަމާގެ ނިޒާމުތައް ގާއިމުކުރުމާއި އެނިޒާމުތަކުން ހިދުމަތްދޭނެ މިންގަނޑުތަކެއް އެކުލަވައިލަން ވެސް އެބިލުގައި އެބަ އޮތެވެ.
އެ ބިލުގައި ހުރި ގިނަ ކަންތައްތަކަކީ އެހެން ނަމަވެސް، މައިގަނޑު ގޮތެއްގައި އިދާރީ ބަދަލުތަކެކެވެ.
މިހާތަނަށް ކޮށްފައިވާ ތިމާވެށީގެ ބައެއް ދިރާސާތަކުން ދައްކާ ގޮތުގައި ޓްރީޓްނުކުރާ ނަަޖިސް ކޯރުތަކާއި ކަނޑުތަކަށް ބޭރުކުރުމުން ކުރިމަތިވާ އެންމެ ބޮޑު މައްސަލައަކީ ފެނުގެ ފިނިހޫމުނިން މައްޗަށް ދިއުމެވެ. އެއީ ކޯރެއްގައި ނުވަތަ މޫދުގައިވާ ދިރުންތަކަށް އޭގެ ނުބައި އަސަރުކުރާނެ ކަމެކެވެ.
