ކޮންމެ އަހަރެއްގެ ރޯދަ މަހާ ދިމާކޮށް ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އިން ކުރިއަށް ގެންދާ ޕްރޮމޯޝަންތަކުގެ ތެރެއިން ހޯލްސޭލް ވިޔަފާރިކުރާ ކަސްޓަމަރުންނަށް ހާއްސަ ޕްރޮމޯޝަނެއް މިއަދު ފައްޓައިފި އެވެ.
އެސްޓީއޯ ހޯލްސޭލް ޕްރޮމޯޝަން ކުރިޔަށް ދާނީ މިއަދުން ފެށިގެން އަންނަ އޭޕްރީލް މަހުގެ ނިޔަލަށެވެ.
މި ޕްރޮމޯޝަނުގެ ދަށުން އެސްޓީއޯއިން އެތެރެކޮށްގެން ހޯލްސޭލްކުރާ ކެއިންބުއިމާއި އާންމު ދިރިއުޅުމުގައި ބޭނުންކުރާ ބައެއް ސާމާނު ހެޔޮ އަގުތަކުގައި ކަސްޓަމަރުންނަށް ލިބޭނެ އެވެ. ބައެއް ކަހަލަ ބާވަތްތަކުގެ ދެ ކޭސް ގަތުމުން އިތުރު ކޭހެއް ހިލޭ ލިބޭނެ ކަމަށް ވެސް އެސްޓީއޯއިން ބުންޏެވެ.
އެސްޓީއޯ ހޯލްސޭލް ސެންޓަރުގައި ކުރިއަށްދާ މި ޕްރޮމޯޝަނާ ގުޅިގެން އެ ކުންފުނިން ބުނީ މިފަހަރު ޕްރޮމޯޝަން ކުރިޔަށް ގެންދަނީ ނަސީބުވެރި ތިން ފަރާތަކަށް ރަށު ޕިކަޕެއް ލިބޭ ގޮތަށް ކަމަށެވެ.
އިނާމެއްގެ ގޮތުގައި ރަށު ޕިކަޕުތައް ދޭން އެސްޓީއޯއިން ނިންމީ އަތޮޅުތެރޭގެ ގިނަ ކަސްޓަމަރުން މުދާ އުފުލާށާއި ޑެލިވަރީއަށް އެކަހަލަ ޕިކަޕް ބޭނުން ކުރާތީ ކަމަށް ބުންޏެވެ.
ހޯލްސޭލް ޕްރޮމޯޝަނުގެ އިތުރުން އެސްޓީއޯއިން ވަނީ ކޮންމެ އަހަރެއްގެ ރޯދަ މަހު ބާއްވާ ރަމަޒާން ބާޒާރު ވެސް ފަށާފަ އެވެ.
