ރަޝިއާއިން ޔޫކްރެއިނަށް ހަމަލާ ދޭން ފެށުމާ އެކު ޔޫކްރެއިންގެ ވައިގެ ސަރަހައްދު އާއްމު ދަތުރުތަކަށް ބަންދުކޮށް، ރަޝިއާގެ ދެކުނުގެ ސިޓީތަކުން ކުރާ ފްލައިޓް ދަތުރުތައް ވެސް ކެންސަލްކޮށްފި އެވެ.
ޔޫކްރެއިންގައި އަސްކަރީ އޮޕަރޭޝަނެއް ފެށިކަން ރަޝިއާގެ ރައީސް ލެޑިމިއަ ޕުޓިން އިއުލާނު ކުރެއްވުމާ އެކު ބުރާސްފަތި ދުވަހުގެ ފަތިހުން ފެށިގެން ދަނީ ހުރިހާ ބޮޑެތި ސިޓީތަކަށް އެއް ވަގުތެއްގައި ހަމަލާ ދެމުންނެވެ.
ދެކުނު ރަޝިއާގެ 11 އެއާޕޯޓަކުން ކުރާ ދަތުރާއި ރަޝިއާއިން ހިފައިގެން އުޅޭ ކްރައިމިއާގެ އެއާޕޯޓަކުން ކުރާ ދަތުރުތައް މިހާރު ވަނީ ކެންސަލްކޮށްފައި ކަމަށް ރަޝިއާގެ އޭވިއޭޝަން އޮތޯރިޓީން ނެރުނު ބަޔާނެއްގައި ބުންޏެވެ.
ފްލައިޓްތައް ކެންސަލް ކުރި ބައެއް ބޮޑެތި ސިޓީތަކުގެ ތެރޭގައި ސޯޗީ، ކްރަސްނޮޑާރް އަދި އަނަޕާ ފާހަގަކުރެވެ އެވެ. އޭވިއޭޝަން އޮތޯރިޓީން ބުނީ މާޗް ދެ ވަނަ ދުވަހާ ހަމައަށް އެ ތަންތަނުން އެއްވެސް ފްލައިޓް ދަތުރެއް ނުކުރާނެ ކަމަށެވެ.
"ރަޝިއާގެ އޭވިއޭޝަން އޮތޯރިޓީން ލަފާދެނީ ކުރިއަށް އޮތް ފްލައިޓްތަކުގެ ޕަސެންޖަރުން އެއާޕޯޓަށް ނުދިޔުމަށް،" ރޮސެވިއެޓްސިއާއިން ނެރުނު ބަޔާނުގައި ބުންޏެވެ.
ޔޫކްރެއިންގެ މަޝްރަހު ގޯސްވެ، ހަނގުރާމައެއް ފަށައިފި ނަމަ ރާއްޖޭގެ ފަތުރުވެރިކަމަށް ކުރާނެ އަސަރާ މެދު ކުރީގެ ރައީސް އަދި ރައްޔިތުންގެ މަިލީހުގެ ރައީސް މުހައްމަދު ނަޝީދު މީގެ ކުރިން ކަންބޮޑުވުން ފާޅުކުރެއްވި އެވެ. އެގޮތުން ރާއްޖެއަށް އެންމެ ގިނަ އަދަދަކަށް ޒިޔާރަތް ކުރާ ފަތުރުވެރިންގެ ތެރޭގައި ޔޫކްރެއިނާއި ރަޝިއާގެ ރައްޔިތުން ހިމެނޭކަން އެމަނިކުފާނު ފާހަގަކުރެއްވި އެވެ.
ރަޝިއާ އަކީ މިއަހަރު ރާއްޖެއަށް އެންމެ ގިނަ ޓޫރިސްޓުން ފޮނުވި ގައުމެވެ. އަހަރުގެ މިހާތަނަށް އެގައުމުން 28،468 ފަތުރުވެރިން ރާއްޖެ އައިސްފައިވެ އެވެ. އަދި ޔޫކްރެއިން އޮތީ 6،503 ޓޫރިސްޓުންނާއެކު މި ލިސްޓުގެ ހަތްވަނައިގަ އެވެ.
މިދިޔަ އަހަރު ޝާއިއުކުރި ފަތުރުވެރިކަމާ ބެހޭ އަހަރާ ރިޕޯޓުގައިވާ ގޮތުން ފާއިތުވި 10 އަހަރު ވެސް ރާއްޖެ ޒިޔާރަތް ކުރާ ރަޝިއާ ފަތުރުވެރިންގެ އަދަދު ދިޔައީ އިތުރުވަމުންނެވެ. އެގޮތުން ފާއިތުވި ފަސް އަހަރު ވެސް ރަޝިއާއިން ރާއްޖެ އަންނަ މީހުންގެ އަދަދު އުޅުނީ 60،000 އިން މަތީގަ އެވެ.
"ރަޝިއާގެ މާކެޓަކީ ރާއްޖެއަށް އަންނަ ބަދަލުތަކަށް ނުގުޑާ ފަދަ މާކެޓެއް. 2020 ވަނަ އަހަރު ފަދަ ގޮންޖެހުންތައް ގިނަ އަހަރެއްގައި ވެސް ރާއްޖޭގެ ބޯޑަރު ބަންދު ކުރުމާ ހަމައަށް ވެސް ރަޝިއާގެ ފަތުރުވެރިން ހުއްޓުމެއް ނެތި ޒިޔާރަތް ކުރި. އަލުން ބޯޑަރުތައް ހުޅުވުމާ އެކު ފަތުރުވެރިކަން ރިކަވާ ކުރުމަށް ވެސް ރަޝިއާއިން ބޮޑު ދައުރެއް އަދާކުރި،" އެ ރިޕޯޓުގައިވެ އެވެ.
ރާއްޖެއަށް އެންމެ ގިނަ ފަތުރުވެރިން ޒިޔާރަތް ކުރާ 10 ގައުމުގެ ލިސްޓަށް ޔޫކްރެއިން ފުރަތަމަ ފަހަރަށް އެރީ 2020 ވަނަ އަހަރު އެވެ. ކޮވިޑާ ގުޅިގެން ބޯޑަރު ބަންދު ކުރުމަށް ފަހު އަލުން ހުޅުވާލުމާ އެކު ޔޫކްރެއިން ފާހަގަވީ މުޅިން އަލަށް ފުޅާވަމުން ދިޔަ މާކެޓެއްގެ ގޮތުގަ އެވެ.
