ގެވެށި އަނިޔާ ލިބިގެން ޖެންޑާ މިނިސްޓްރީއަށް މައްސަލަ ރިޕޯޓު ކުރި ނަމަވެސް މައްސަލަ ކުރިއަށް ނުގެންދެވެނީ މައްސަލަ ހުށަހެޅި ފަރާތުން މައްސަލަ އަނބުރާ ނަގާތީ ކަމަށް ޖެންޑާ މިނިސްޓަރުު އާއިޝަތު މުހައްމަދުދީދީ ވިދާޅުވެއްޖެ އެވެ.
ޖެންޑާ މިނިސްޓްރީގެ ތަފާސްހިސާބުތަކުން ދައްކާގޮތުގައި އެއް އަހަރުން އަނެއް އަހަރަށް ގެވެށި އަނިޔާ ލިބޭ މީހުންގެ އަދަދަ އިތުރުވަމުން އަންނަނީ ކަންބޮޑުވާ މިންވަރަށެވެ. އޭގެ ތެރޭގައި ގިނައީ އަންހެނުން ނަމަވެސް ފިރިހެނުންނަށް އަނިޔާ ލިބޭ މިންވަރުވެސް ދަނީ އިތުރުވަމުންނެވެ.
އެގޮތުން 2018ވަނަ އަހަރު 383 ކޭސް ރިޕޯޓުކޮށްފައިވާއިރު 2019ވަނަ އަހަރު 433 ކޭސް ވަނީ ރިޕޯޓުކޮށްފަ އެވެ. އަދި 2020 ވަނަ އަހަރު 419 ކޭސް ރިޕޯޓުކޮށްފައިވާއިރު މިދިޔަ އަހަރު ނޮވެމްބަރު މަހުގެ ނިޔަލަށް ޖުމްލަ 446 ކޭސް ރިޕޯޓުކޮށްފައި ވެއެވެ.
"ސާސްތުރަ" މަޖައްލާ ނެރެދެއްވުމަށް ބޭއްވި ރަސްމިއްޔާތުގައި ވާހަކަ ދައްކަވަމުން މިނިސްޓަރު ވިދާޅުވީ މިދިޔަ އަހަރު މިނިސްޓްރީއަށް ހުށަހެޅުނު މައްސަލަތަކަކީ މިދިޔަ ފަސް އަހަރުތެރޭ އެންމެ ގިނަ އަދަދަަކަށް މައްސަލަ ހުށަހެޅުނު އަހަަރު ކަމަށެވެ.
މިނިސްޓަރު ވިދާޅުވީ އެ މައްސަލަތަކުގެ ތެރެއިން އިންސާފު ހޯދައިދެވެނީ 30 ޕަސެންޓް މައްސަލަތަކަށް ކަމަށެވެ.
"ގިނަ ފަހަރަށް ހުށަހަޅާ މައްސަލަތަކަކީ ވަކި ހިސާބަކަށް ދާއިރަށް ރިޕޯޓު ކުރާ ފަރާތް މައްސަލަ އަނބުރާ ނަގަނީ. މިއީ މައްސަލަ ކުރިއަށް ނުގެންދެވެން އެންމެ ބޮޑަށް ދިމާވާ މައްސަލަ. ގެވެށި އަނިޔާގެ މައްސަލަތަކުގައި ރިޕޯޓު ކުރަން ކެރުނު ނަމަވެސް މައްސަލަ ކުރިއަށް ދާއިރު ތަހަންމަލް ކުރަން ޖެހޭ އުނދަގޫތަކާއި ދަތިތަކާއި ތަކުލީފުތައް ބޮޑުކަމުން ރިޕޯޓު ކުރި ފަރާތް އަނބުރާ މައްސަލަ ގެންދޭ،" މިނިސްޓަރު ވިދާޅުވި އެވެ.
ގެވެށި އަނިޔާގެ މައްސަލަތައް ހުއްޓުވުމަށް ރާއްޖޭގެ އެކި ކަންކޮޅުތަކުގައި ގިނަ މަސައްކަތްތަކެއް ކުރެވެމުންދާކަން ފާހަގަ ކުރައްވަމުން މިނިސްޓަރު ވިދާޅުވީ މިއަދު މަސައްކަތް ކޮށްގެން ނޫނީ މިހާރު މި މުޖުތަމައު ތެރޭގައި ހިނގާ ނޭދެވޭ ކަންކަން މަދު ނުކުރެވޭނެ ކަމަށެވެ.
ހޭލުންތެރި ކުރުމަކީ ގެވެށިހުއްޓުވުމަށް އެޅޭ ވަރަށް މުހިންމު ފިޔަވަޅެއް ކަމަށައި އޭގެ ނަތީޖާ އަކަށް ވަނީ ގެވެށި އަނިޔާ ފަދަ އިޖުތިމާއީ ބޮޑެތި މައްސަލަތަކާމެދު ކަންބޮޑުވާ މީހުން މުޖުތަމައުގައި އިތުރުވެ އެ ކަންކަން ތަކުރާރުވުމަށް ޖާގަ ދޭން ބޭނުން ނުވާ މީހުންގެ އަދަދު ގިނަވުން ކަމަށްވެސް މިނިސްޓަރު ވިދާޅުވި އެވެ.
އަދި ހަމަ އެއާއެކު މުޖުތަމައުގައި އަނިޔާ ތަހަންމަލު ކުރާ ފަރާތްތަކަށް އެހީތެރިކަން ފޯރުކޮށްދޭން ބޭނުންވާ މީހުންގެ އަދަދު އިތުރުވެގެންދާނެކަން މިނިސްޓަރު ފާހަގަ ކުރެއްވި އެވެ.
"އެކަމާމެެދު އަޅުގަނޑުމެން ވިސްނަން ޖެހޭ. ކީއްވެގެންކަން ގެވެށި އަނިޔާގެ މައްސަލަތަކަށް އިންސާފު ހޯދުމަށް މި ކުރާ މަސައްކަތުގައި އިންސާފަކާ ހަމައަށް މިހާ މަދު އަދަދެއް މި ދަނީ ކީއްވެކަން އަޅުގަނޑުމެން ވިސްނާ ފިކުރުކޮށް ބަދަލުތަކެއް ގެންނަންވެސް މި ޖެހެނީ މިކަމަށް ހޭލުންތެރިކޮށްގެން،" މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ މައްސަލަ އަބުރާ ނަގަނީ ކީއްވެ ކަމާމެދު ފުންކޮށް ވިސްނައި އެ މަސައްކަތް ކުރާ ހުރިހާ ފަރާތްތަކެއް ގުޅިގެން އިތުރު ހިތްވަރެއް ލާން އެބަ ޖެހޭ ކަމަށެވެ. އެގޮތުން ރިޕޯޓު ކުރާ މީހުން އެ ކުރި ކުރުމުން އިންސާފު ލިބެން ޖެހޭނެކަން ގަބޫލު ކޮށްގެން ކަމަށްވެސް މިނިސްޓަރު ވިދާޅުވި އެވެ.
