ނ. ލަންދޫގައި އާދަޔާހިލާފަށް ހުމެއް ފެތުރެން ފަށައިފި އެވެ.
އެ ރަށުގެ ސިއްހީ މަރުކަޒުގެ އޮފިޝަލަކު އަދަދު ނޫހަށް ބުނީ އެ ހުން ފެތުރެން ފެށީ މިދިޔަ އީދު ބަންދު ތެރޭގައި ކަމަށެވެ. އެއަށްފަހު ކޮންމެ ދުވަހަކު ވެސް ހުން އައިސްގެން 40 އަށްވުރެ ގިނަ މީހުން ޑޮކްޓަރަށް ދައްކަމުންދާ ކަމަށް އޭނާ ބުންޏެވެ.
"ކޮންމެ ދުވަހަކު ވެސް 45 ވަރަކަށް މީހުން އެބަ ދައްކާ ޑޮކްޓަރަށް، މިއަދު އެކަނި ވެސް އެއް އަހަރާއި 17 އަހަރާ ދެމެދުގެ ކުޑަކުދިންގެ ތެރެއިން 19 ކުދިން ދައްކައިފި ޑޮކްޓަރަށް،" އެ ރަށު ސިއްހީ މަރުކަޒުގެ އޮފިޝަލް ބުންޏެވެ.
އެންމެ 600 އެއްހާ މީހުން ދިރިއުޅޭ އެ ރަށުގައި އެވަރުގެ ވަރުގަދަ ހުމެއް ފެތުރި، ގިނަ އަދަދެއްގެ ކުޑަކުދިންނަށް އެ ބަލި ޖެހެމުންދާއިރު، އަދި އެ ރަށުގެ ސްކޫލް ބަންދުކޮށްފައި ނުވާ ކަމަށް އޭނާ ބުންޏެވެ.
"އެޑިއުކޭޝަން މިނިސްޓްރީން ހުއްދަ ނުލިބޭތީ އަދި ބަންދެއް ނުކުރޭ މިކޮޅު ސްކޫލެއް، ބަލި މި ވަނީ ހުން އައިސް ހޮޑުލާ ރޯގާ ޖެހުން. ދެން ބައެއް ކުދިން ބޭރަށް ވެސް އެބަ ހިންގާ،" އޭނާ ބުންޏެވެ.
އާދަޔާ ހިލާފަށް އެރަށުގައި ހުމެއް ފެތުރި އެތައް ބަޔަކު ބަލިވަމުންދާއިރު، އަދި އަމަލު ކުރާނެ ވަކި ގޮތެއް ހެލްތު މިނިސްޓްރީން އަންގާފައި ނުވާ ކަމަށް އޭނާ ބުންޏެވެ.
އެ ވަރުގަދަ ހުން ފެތުރެން ފެށުމާއެކު އެ ރަށުން ބޭސް ވެސް ހުސްވި ކަމަށް އޭނާ ބުންޏެވެ. ނަމަވެސް، ބޭހުގެ އައު ސްޓޮކެއް މިހާރު ރަށަށް ލިބިފައިވާ ކަމަށް އޭނާ ބުންޏެވެ.
