ކިންގް ސަލްމާން މިސްކިތް އަންނަ އަހަރު ރޯދަ މަހު ރަސްމީކޮށް ނުހުޅުވި ނަމަވެސް, ނަމާދު ކުރުމަށް ހުޅުވާލާނެ ކަމަށް އިސްލާމިކް މިނިސްޓްރީން ބުނެފި އެވެ.
ކުރީގެ ސަރުކާރުގައި އާޓިފިޝަލް ބީޗާ ޖެހިގެން އޮތް ބިމުގައި އަޅަން ފެށި މިސްކިތް ނުހުޅުވި ލަސްވެފައިވާތީ ފާޑުކިއުން ވަނީ އަމާޒުވެފަ އެވެ. މިދިޔަ އަހަރު ރޯދައަށް ވަގުތީ ގޮތުން މިސްކިތް ހުޅުވަން ނިންމި ނަމަވެސް, ކޮވިޑްގެ ހާލަތު މާލޭގައި ގޯސްވެ މިސްކިތް ހުޅުވާފައެއް ނުވެ އެވެ.
އިސްލާމިކް މިނިސްޓަރު ޑރ. އަހުމަދު ޒާހިރު "އަދަދު"އަަށް ވިދާޅުވީ މި އަހަރުގެ ރޯދަ މަހަށް މިސްކިތް ރަސްމީކޮށް ނުހުޅުވުނު ނަމަވެސް, ނަމާދު ކުރުމަށް މިސްކިތް ހުޅުވާނެ ކަމަށެވެ.
"ރޯދައަށް އެ މިސްކިތުގައި ނަމާދު ކުރަން ފެށުމުގެ ވިސްނުމެއްގައި މި ތިބީ. އެއީ ރަސްމީކޮށް ހުޅުވުން ލަސްވިޔަސް ނަމާދު ކުރެވޭނެ ގޮތްތަކެއް ވޭތޯ މި ބަލަނީ،" މިނިސްޓަރު ވިދާޅުވި އެވެ.
މިސްކިތް ހުޅުވުމާ ބެހޭ ގޮތުން ސަރުކާރުން ވަނީ މީގެ ކުރިން ސައުދީން ރާއްޖެ ވަޑައިގެންނެވި ވަފުދަކާ މަޝްވަރާ ވެސް ކޮށްފަ އެވެ. އަދި މިސްކިތް ހުޅުވުމަށް ދެ މިލިއަން އެމެރިކާ ޑޮލަރު ސައުދީން ދޭނެ ކަމަށް ރާއްޖޭގެ ފޮރިން މިނިސްޓްރީން ބުނެފައިވާ ކަމަށް ވެސް މިނިސްޓްރީން ބުނެފައި ވެއެވެ.
ކިންގް ސަލްމާން މިސްކިތަކީ ސައޫދީ ރަސްގެފާނުގެ އެހީގައި އިމާރާތްކޮށްފައިވާ މިސްކިތެކެވެ.
އެ މިސްކިތުގެ މަސައްކަތް ކުރަން ހަވާލުކުރީ ތުރުކީގެ ޓާމެކްސް ކުންފުންޏާ އެވެ. އެ ކުންފުންޏާ އެކު ކުރީ ސަރުކާރުން އެއްބަސްވުމުގައި ސޮއިކުރީ ފެބްރުއަރީ 28، 2017ގަ އެވެ.
އެ މިސްކިތުގައި އަރާފޭބުމަށް ލިފުޓު ހަރުކޮށްފައިވާއިރު އެއްފަހަރާ 10،000 މީހުންނަށް ނަމާދުކުރެވޭނެ އެވެ. ލައިބްރަރީއަކާއި ކްލާސްރޫމްތަކުގެ އިތުރުން ސެމިނާ ރޫމްތައް ވެސް މި މިސްކިތުގައި ހުންނާނެ އެވެ.
