ދޯހާ، ގަތަރް (ފެބްރުއަރީ 13) - އަފްގާނިސްތާނަށް ބޭނުންވާ އިންސާނީ އެހީ ހޯދުމުގެ މަގްސަދުގައި ތާލިބާނުންގެ ވަފުދެއް ގަތަރަށް ހިނގައްޖެ އެވެ.
ވަފުދުގައި އިސްކޮށް ހުރީ ފޮރިން މިނިސްޓަރު އާމިރް ހާން މުއްތަގީ އެވެ. މި ދަތުރުގައި ތާލިބާނުން ބައްދަލުކުރާނީ އީޔޫގެ ވަފުދަކާއި، ޑިޕްލޮމެޓިކް މިޝަންތަކާއި، ގަލްފު ގައުމުތަކުގެ އޮފިޝަލުންނާ އެވެ.
ތާލިބާން ވަފުދެއް މިދިޔަ ޖެނުއަރީ މަހު ނޯވޭގެ އޮސްލޯ އަށް ވެސް ދަތުރު ކުރި އެވެ. އެ ދަތުރުގައި ބައްދަލުކުރީ އަފްގާނިސްތާނުގެ ކުރީ ސަރުކާރަށް ގިނަ އެހީތައްވި ގައުމުތަކުގެ އޮފިޝަލުންނާ އެވެ.
މިހާތަނަށް އެއްވެސް ގައުމަކުން ތާލިބާން ސަރުކާރު ބަލައިގެންފައެއް ނުވެ އެވެ. އދ. އިން ލަފާކުރާ ގޮތުގައި އަފްގާނިސްތާނުގެ 38 މިލިއަން މީހުންގެ 50 ޕަސެންޓަށް ވަނީ ކާބޯތަކެތީގެ ދަތިކަމާ ކުރިމަތިވެފަ އެވެ.
ފެބްރުއަރީ މަހުގެ ކުރީކޮޅު އޭއެފްޕީއަށް ދިން އިންޓަވިއުއެއްގައި މުއްތަގީ ބުނީ ބައިނަލްއަގްވާމީ މުޖުތަމައިން ތާލިބާން ސަރުކާރު ބަލައިގަތުމާ ގާތްވެފައިވާ ކަމަށެވެ.
ނަމަވެސް ހޯމަ ދުވަހު ދޯހާގައި ފަށާ ބައްދަލުވުންތަކުގައި ވެސް އިންސާނީ ހައްގުތަކުގެ ހާލަތު ރަނގަޅު ކުރަން ތާލިބާނުންނަށް ޕްރެޝަރު ކުރިމަތިވާނެ ކަމަށް ބެލެވެ އެވެ.
މިދިޔަ ހަފްތާގައި ވެސް ތާލިބާން އޮފިޝަލުން ވަނީ ޗެރިޓީތަކާއި އެހީދޭ ގްރޫޕުތަކާ ސްވިޓްޒަލޭންޑުގެ ޖެނީވާގައި ބައްދަލުކޮށްފަ އެވެ.
