އިއްޔެ 7،668 ޓޫރިސްޓުން އައި، ކޮވިޑަށް ފަހު މިއީ ރެކޯޑެއް

ރާއްޖެއަށް އިއްޔެ 7،600 އަށް ވުރެ ގިނަ ޓޫރިސްޓުން އައި ކަމަށާއި އެއީ ކޮވިޑްގެ ބަލިމަޑުކަމާ ހެދި ރާއްޖޭގެ ބޯޑަރުތައް ބަންދުކުރުމަށް ފަހު އަލުން ހުޅުވި ފަހުން އެެންމެ ގިނަ ޓޫރިސްޓުން އައި ދުވަސް ކަމަށް ސަރުކާރުން ބުނެފި އެވެ.

ޓޫރިޒަމް މިނިސްޓްރީން ކުރި ޓްވީޓެއްގައި ބުނީ އިއްޔެ ރާއްޖެއަށް ޖުމްލަ 7،668 ޓޫރިސްޓުން އައި ކަމަށެވެ. ބޯޑަރުތައް އަލުން ހުޅުވި ފަހުން ދުވާލަކު އަންނަ ޓޫރިސްޓުންގެ އަދަދު 7،000 އަށް ވުރެ މަތިވީ މިދިޔަ ޑިސެމްބަރު މަހު އެވެ.

ކޮވިޑު ބަލިމަޑުކަމުގެ ތެރޭގައި ޑެއިލީ އެރައިވަލް ރެކޯޑުތައް

1. ޑިސެމްބަރު 26 - 7،098
2. ޑިސެމްބަރު 18 - 6،955
3. ޑިސެމްބަރު 19 - 6،715
4. ޑިސެމްބަރު 5 - 6،296
5. އޮކްޓޫބަރު 16 - 6،197

ކޮވިޑް-19 ފެތުރެން ފެށުމާއި އެކު އެބަލި ކޮންޓްރޯލްކުރަން އެޅި ފިޔަވަޅެއްގެ ގޮތުގައި ރާއްޖޭގެ ބޯޑަރުތައް ބަންދުކުރި އެވެ. އެކަމުގެ ސަބަބުން ރާއްޖޭގެ އިގުތިސާދަށް ވަރަށް ބޮޑަށް ގެއްލުންވި އެވެ. ބޯޑަރުތައް އަލުން ހުޅުވީ 2020 ވަނަ އަހަރުގެ ޖުލައިމަހު އެވެ.