ގައުމީ ބާސްކެޓްބޯޅަ ލީގުގެ ދެ ވަނަ ޑިވިޝަންގެ ކުޅުނު ފުރަތަމަ މެޗުގައި ވައިކިންސް ބާސްކެޓްބޯޅަ ކްލަބާ ވާދަކޮށް ފަސޭހަކަމާ އެކު ވުލްވްސް ބާސްކެޓްބޯޅަ ކްލަބުން ކާމިޔާބުކޮށްފި އެވެ.
ދެ އަހަރުގެ މެދުކެނޑުމަކަށް ފަހު ބާއްވާ ގައުމީ ލެވެލްގެ ފުރަތަމަ ބާސްކެޓްބޯޅަ މުބާރާތް ކަމަށްވާ ގައުމީ ބާސްކެޓްބޯޅަ ލީގުގެ ކުޅުން ފަށާފައިވަނީ ދެވަނަ ޑިވިޝަނުންނެވެ.
މީގެ ދެ އަހަރު ކުރިން މަހު ބޭއްވި ގައުމީ ބާސްކެޓްބޯޅަ ލީގާއި ގައުމީ ބަސްކެޓްބޯޅަ މުބާރާތަށްފަހު ބާސްކެޓްގެ އެއްވެސް މުބާރާތެއް ނުބޭއްވި ދިޔައީ ކޮވިޑް-19އާ ގުޅިގެން ޒުވާނުންގެ މަރުކަޒު ފްލޫ ކްލިނިކެއްގެ ގޮތުގައި ބޭނުންކުރުމުގެ އިތުރުން ވެކްސިން ދިނުމުގެ މައި ހަބެއްގެ ގޮތުގައި މި އަހަރާ ހަމައަށް ބޭނުން ކުރުމުންނެވެ.
ނުވަ ޓީމު ދެ ވަނަ ޑިވިޝަންގައި ވާދަކުރާއިރު ޓީމްތައް ވަނީ ދެ ގްރޫޕަކަށް ބަހާލައިފަ އެވެ. ގްރޫޕް އޭގައި އޮތީ ވައިކިންސް ބާސްކެޓްބޯލް ކްލަބް، ރޯޔަލް ބާސްކެޓްބޯލް ކްލަބް، ނައިޓްސް ބާސްކެޓްބޯލް ކްލަބް، ވައިޕާސް ބާސްކެޓްބޯލް ކްލަބް، ވުލްވްސް ބާސްކެޓްބޯލް ކްލަބް އެވެ. ގްރޫޕް ބީގައި އޮތީ ޓެލަންސް ބާސްކެޓްބޯލް ކްލަބް، ސްޕާޓަންސް ބާސްކެޓްބޯލް ކްލަބް، ޔޫއެން ފްރެންޑްސް އަދި ހުޅުމާލެ ސްޕޯޓްސް ކްލަބް އެވެ.
ދެ ވަނަ ޑިވިޝަންގެ ގްރޫޕް އޭގައި ވައިކިންސް އާއި ވުލްވްސް ވާދަކޮށް މި މެޗު 96-48 ޕޮއިންޓްގެ ބޮޑު ތަފާތަކުން ކާމިޔާބުކުރީ ވުލްވްސް އެވެ. ތަފާތު މޮޅު ކުޅުމެއް ދައްކައި މުޅި މެޗު ވުލްވްސް އިން ޑޮމިނޭޓްކުރިއިރު، އެ ޓީމުން މެޗު ފެށިގެން ގޮސް ނިމެންދެން އޮތީ ލީޑުގަ އެވެ.
ޒުވާން ގިނަ ކުޅުންތެރިންތަކެއް ހިމެނުނު ވައިކިންސް އިން ވެސް ވަނީ މެޗުގެ ބައެއް ދަނޑިވަޅުތަކުގައި ރަނގަޅު ފޯރިއެއްގައި ކުޅެފަ އެވެ. އެކަމަކު، މެޗުން މޮޅުވެވޭވަރުގެ ކުޅުމެއް ދެއްކޭގޮތެއްނުވި އެވެ. މި މެޗުގެ މޮޅު ކުޅުންތެރިޔާގެ މަގާމް ހޯދީ ވުލްވްސްގެ ޝަހުދާން އާމިރެވެ.
ގައުމީ ލީގުގެ ކުޅުން މިރޭ ވެސް ކުރިއަށްދާނެ އެވެ. މިރޭ ކުޅޭނީ ވެސް ދެވަނަ ޑިވިޝަންގެ ދެ މެޗެކެވެ. ފުރަތަމަ މެޗުގައި ވާދަކުރާނީ ގްރޫޕް އޭގެ ރޯޔަލްސް ބީސީ އާއި ނައިޓްސް ބީސީ އެވެ. މިރޭ ކުޅޭ ދެ ވަނަ މެޗުގައި ގްރޫޕް ބީގެ ޔޫއެން ފްރެންޑްސް ނުކުންނާނީ ހުޅުމާލެ ބާސްކެޓްބޯޅަ ކުލަބާ ދެކޮޅަށެވެ.
