ޕެޓްރޯލް ލީޓަރަކުން 92 ލާރި އަދި ޑީސަލް ލީޓަރަކުން 60 ލާރި އެސްޓީއޯއިން ބޮޑުކޮށްފި އެވެ.
މިއީ އެއް މަސް ދުވަސްތެރޭގައި ތެލުގެ އަގު ބޮޑުކުރި ދެ ވަނަ ފަހަރެވެ. އެންމެ ފަހުން ތެލުގެ އަގު ބޮޑުކޮށްފައި ވަނީ ޖެނުއަރީ 21 ގަ އެވެ.
އެސްޓީއޯއިން ރޭ ނެރުނު ބަޔާނެއްގައި ބުނެފައިވަނީ ތެލުގެ އަގު ބޮޑުކުރަން ޖެހުނީ "ދުނިޔޭގެ ބާޒާރުގައި ހިފެހެއްޓުމެއް ނެތި ތެލުގެ އަގު ބޮޑުވަމުން ދާތީ" ކަމަށެވެ.
މި އަދުން ފެށިގެން އެސްޓީއޯގެ ސަބްސިޑިއާރީ ކުންފުނި، ފިއުސް ސަޕްލައި މޯލްޑިވްސް (އެފްއެސްއެމް)ގެ ޝެޑްތަކުން ޕެޓްރޯލް ލީޓަރެއް ވިއްކަނީ 12.98ރ. އަށެވެ. އަދި ޑީސަލް ލީޓަރެއް 13.04ރ. އަށެވެ.
ކުރިން ޕެޓްރޯލް ލީޓަރެއް ވިއްކަމުން ދިޔައީ 12.06ރ. އަށެވެ. އަދި ޑީސަލް ލީޓަރެއް 12.44ރ. އަށެވެ.
ޖެނުއަރީ 21 ގައި ތެލުގެ އަގު ބޮޑުކުރުމަށް ފަހު އެސްޓީއޯއިން އާންމުކުރި ބަޔާނެއްގައި ބުނެފައި ވަނީ ދުނިޔޭގެ ބާޒާރުގައި ތެލުގެ އަގު ހުރީ ފާއިތުވި ހަތް އަހަރު ތެލުގެ އަގު ބޮޑުނުވާ މިންވަރަކަށް ބޮޑުވެފައި ކަމަށެވެ.
