ކޮވިޑާ ގުޅިގެން ސަރުކާރުން ގެންނަން ހަވާލުކުރި ވެންޓިލޭޓަރުތައް ނުލިބުމުން، އެ ފައިސާ އަނބުރާ ހޯދުމަށްޓަކައި އެ މައްސަލަ ބައިނަލްއަގުވާމީ އާބިޓްރޭޝަނަށް ހުށަހެޅުމަށް ހެލްތު މިނިސްޓްރީން އަދިވެސް ހުށަހަޅާފައި ނުވާ ކަމަށް އެޓާނީ ޖެނެރަލް އޮފީސް (އޭޖީ) އިން ބުނީ އިއްޔެ އެވެ.

ގާތްގަނޑަކަށް މީގެ ދެ އަހަރު ކުރިން އެޕްރީލް 2، 2020 ގައި ދުބާއީގެ އެގްޒެކިއުޓާސް ޖެނެރަލް ޓްރޭޑިންއާ 30.91 މިލިއަން ރުފިޔާ ހަވާލުކުރީ 75 ވެންޓިލޭޓަރު ހޯދުމަށެވެ. ނަމަވެސް، މިހާތަނަށް ރާއްޖެ ފޮނުވީ ޖުމްލަ 15 ވެންޓިލޭޓަރެވެ. އެކަމާއި ގުޅިގެން އެތައް މުއާމަލާތްތަކެއް ކުރުމަށް ފަހު ވެސް ބާކީ 60 ވެންޓިލޭޓަރު އެ ކުންފުނިން ނުފޮނުވަ އެވެ.

އެހެންވެ، މިދިޔަ އަހަރުގެ އޭޕްރީލް މަހު ސަރުކާރުން ނިންމީ އެ ފައިސާ އަނބުރާ ހޯދުމުގެ އިތުރުން އެ މައްސަލާގައި ޖިނާއީ ކުށެއް ވާނަމަ އެކަން ބަލައި ފިޔަވަޅު އެޅުމަށް ވަކާލާތު ކުރުމަށެވެ. އެއީ މައްސަލަ ދިވެހި ސަރުކާރާ އެއްކޮޅަށް ނިމިއްޖެނަމަ ބައިނަލްއަގުވާމީ ޓްރީޓީތަކުން މަސައްކަތްތަކެއް ކުރެވޭނެތީ އެވެ.

އެގޮތުގެ މަތިން މިދިޔަ އަހަރުގެ އެ ކުންފުންޏާއެކު ވީ އެއްބަސްވުން ބާތިލްކުރަން، ސަރުކާރުން ވަނީ ނޯޓިސް ފޮނުވައިފަ އެވެ. ނަމަވެސް، ހެލްތު މިނިސްޓްރީން ފުރިހަމަ ކުރަން ޖެހޭ އިޖުރާއަތްތައް ފުރިހަމަ ކުރުމަށްފަހު، އެ މައްސަލާގައި އާބިޓްރޭޝަނަށް ދާން އެ މިނިސްޓްރީން އޭޖީ އޮފީހަށް ހުށަހަޅާފައި ނުވާ ކަމަށް އޭޖީ އޮފީހުގެ ކޮމިއުނިކޭޝަންސް ޑިރެކްޓަރު، ހުސެއިން ހަސަން "އަދަދު" އަށް ވިދާޅުވީ އިއްޔެ އެވެ.

"ވެންޓިލޭޓަރު މައްސަލަ އާބިޓްރޭޝަނަށް ހުށަހެޅުމުގެ ކުރިން ފައިސާ ހޯދުމަށް މަސައްކަތްކޮށް، އާބިޓްރޭޝަނަށް ހުށަހެޅުމުގެ ކުރިން ފުރިހަމަކުރަންޖެހޭ ކަންކަން ނިންމައި، މައްސަލަ އާބިޓްރޭޝަނަށް ހުށަހެޅުމަށް ހެލްތު މިނިސްޓްރީން މި އޮފީހަށް އަދި ހުށަހަޅާފައެއް ނުވޭ،" ހުސެއިން އިއްޔެ ވިދާޅުވި އެވެ.

އެ މައްސަލާގައި ހެލްތު މިނިސްޓްރީގެ ޑެޕިއުޓީ ޑިރެކްޓާ ޖެނެރަލް ތަސްލީމާ އުސްމާން ވާހަކަ ދައްކަވަން ބޭނުން ނުވި އެވެ. ވެންޓިލޭޓަރު މައްސަލަ ކުރިއަށްދަނީ އޭނާގެ ބެއްލެވުމުގެ ދަށުންނެވެ.

މައްސަލާގައި ދައުވާ ނުކުރޭ

ވެންޓިލޭޓަރުތައް ނުލިބި އެއްބަސްވުން ބާތިލްކުރަން ޖެހުނުއިރު، މިކަމުގައި ހިޔާނާތް ހިންގި ކަމުގެ ތުހުމަތުގައި އޭސީސީން ދައުވާކުރަން ފޮނުވީ ކުރީގެ ހެލްތު މިނިސްޓަރު އަބްދުﷲ އަމީން ހިމެނިވަޑައިގަންނަވާ ގޮތުން އެ މިނިސްޓްރީގެ 10 މީހެއްގެ މައްޗަށެވެ.

އޭސީސީން މީގެކުރިން ބުނެފައިވާ ގޮތުގައި، ދައުވާ ކުރަން ފޮނުވީ، ދައުލަތުގެ މާލިއްޔަތުގެ ގަވާއިދާ ހިލާފުވެ، ވަކި ފަރާތަކަށް ނާޖާއިޒު މަންފާއެއް ހޯދައިދިން ކަމަށް އެކަށީގެންވާ މިންވަރަށް ހެއްކާއި ގަރީނާ ހުރި ކަމަށް ތަހުގީގަށް ސާބިތުވާތީ އެވެ.

އެކަމަކު އެ މައްސަލައަކީ ކަންހިނގާފައިވާ ގޮތަށް ބަލާއިރު ޖިނާއީ ކުށެއްގެ އުންސުރުތައް ހަމަވާ މައްސަލައެއް ކަމަށް ނުފެންނާތީ އެ މައްސަލައިގައި ޕީޖީ އޮފީހުން ފުރަތަމަ ނިންމީ ދައުވާ ނުކުރުމަށެވެ. ނަމަވެސް, އޭސީސީން އެ މައްސަލަ އިތުރަށް ތަހުގީގުކޮށް ބައެއް ކަންކަން އިތުރު ކުރުމަށްފަހު ދައުވާކޮށް ދިނުމަށް އެދި ޕީޖީ އޮފީހަށް ފޮނުވުމުން ބައެއް ކަންކަން އިސްލާހު ކުރުމަށް އަނެއްކާވެސް ފޮނުވާލި އެވެ.

އެގޮތަށް އެ މައްސަލަ އަނބުރާ އޭސީސީއަށް ތަފާތު ތިން ފަހަރެއްގެ މަތިން ފޮނުވާލި އެވެ.

ބައެއް މުހިންމު ހަބަރުތައް

• ހައުސިން ޑިވެލޮޕްމަންޓް ކޯޕަރޭޝަނުން ހުޅުމާލެ ފޭސް 2 އިން ވިއްކަން އިއުލާންކުރި 26 ބިމަށް އަކަ ފޫޓެއްގެ ނިސްބަތުން 10 މިލިއަނާއި 6،759 ރުފިޔާ އާ ދެމެދުގެ އަގުތަކެއް ބީލަންވެރިން ހުށަހެޅީ އިއްޔެ އެވެ.

• ރާއްޖޭގައި އިންޑިއާ ސިފައިން ތިބުމާ ދެކޮޅަށް، "އިންޑިއާ އައުޓް" ގެ ނަމުގައި އިދިކޮޅުން ކުރިއަށް ގެންދާ ކެމްޕޭނާއި ފަހުން ވެސް ހިންގައިފާނެ އެފަދަ އެހެން ކެމްޕޭންތައް ވެސް ގާނޫނީ ކުށަކަށް ހެދޭ ފަދަ ބިލު، ރައްޔިތުންގެ މަޖިލީހަށް ހުށަހެޅުމަށް ސުޕަ މެޖޯރިޓީ އޮންނަ އެމްޑީޕީ ޕާލިމެންޓަރީ ގްރޫޕުން ފާސްކުރީ އިއްޔެ އެވެ.

• މާލެއިން 1000 ޕާކިން ސްލޮޓް އަމިއްލަ ފަރާތްތަކަށް އުމުރު ދުވަހަށް ވިއްކުމަށް ސިޓީ ކައުންސިލުން ނިންމި ނިންމުން ފަސްކުރަން ލޯކަލް ގަވަމަންޓު އޮތޯރިޓީ (އެލްޖީއޭ) އިން އެންގީ އިއްޔެ އެވެ.

ދުވަހުގެ ކޯޓޭޝަން

"އިންޑިއާ އައުޓް" ކެމްޕޭންގެ ސަބަބުން ނަފުރަތު އުފެދިގެން ބައެއް ކަހަލަ ކަންތައްތައް ހިނގާފައި އެބަހުރި ކަމަށާއި އިންޑިއާގެ ޑިޕްލޮމެޓުންނަށް ގޯނާ ކުރިކަން ފުލުހުންގެ ސަމާލުކަމަށް އައިސްފައިވާކަން ހާމަކުރައްވަމުން އިއްޔެގެ 241 ކޮމިޓީގައި ކޮމިޝަނަރު އޮފް ޕޮލިސް މުހައްމަދު ހަމީދު ވިދާޅުވީ:

"ނަފުރަތުގެ ކަންކަން ފަތުރަމުން އައިސް އަޅުގަނޑުމެނަށް އެބަހުރި އޭގެ ނަތީޖާ ވަރަށް ހިތިކޮށް ފެނިފައި. އެ ހެޔޮ އައިޑިއޮލޮޖީއާ ގުޅުވައިގެން ކަމަށް ވިޔަސް. އެކި ވިސްނުމެއް ކުރިއަށް ނެރުން ކަމަށް ވިޔަސް އޭގެ ސަބަބުން އަޅުގަނޑުމެންނަށް ކޮޮންޓްރޯލް ނުކުރެވޭ ވަރަށް މިކަންކަން ފުޅާވެ، މުޖުތަމައުގެ ތެރެއަށް ފެތުރިގެން ދިޔައިމާ އޭގެ ނުރައްކާ އެއީ ވަރަށް ބޮޑުތަނުން ބޮޑުވެގެން އައުން އެކަށީގެންވާ ކަންތައްތައް،"

ދުވަހުގެ ފޮޓޯ

ހުޅުމާލޭ ފޭސް 2 ފެންނަ ގޮތަށް މަތިން ނަގާފައިވާ ފޮޓޯއެއް. އެޗްޑީސީން އިއްޔެ ވަނީ ފޭސް 2 ގެ ބީޗްފްރޮންޓުން 26 ބިމެއް ބީލަމުގައި ވިއްކާލާފައި. މި ބިންތައް ގަންނަން 211 މީހުން ބިޑު ހުށަހެޅި. އެންމެ ބޮޑު އަގެއްގެ ގޮތުގައި ހުށަހެޅީ އަކަފޫޓަކަށް 10 މިލިއަން ރުފިޔާ. -- ފޮޓޯ: އާއިމް ޒަމީރު/އަދަދު

ދިރާސާތަކުން ކިޔާލުމަށް

"ދިވެހިރާއްޖެ އިނގިރޭސީންގެ ހިމާޔަތުގައި އޮތްދުވަސްވަރު ސިޔާސީ އަދި އެހެނިހެން ގޮތް ގޮތުން އެބައިމީހުންގެ ނުފޫޒު ފޯރާފައިފާ ގޮތްތައް"

އެއީ 2006 ގައި ގައުމީ ޔުނިވާސިޓީން ދިވެހިބަހުގެ ޑިގްރީ ކޯހުގައި ކިޔަވަމުން ދިޔަ އަބްދުއްރަހްމާން ޔޫސުފް ލިޔުއްވާފައިވާ ތާރީހީ ދިރާސާއެކެވެ. އެގޮތުން އިނގިރޭސީންގެ އަތްދަށުގައި 78 އަހަރު ދިވެހިން ވޭތުކުރިއިރު، އެދުވަސްތަކުގައި އިނގިރޭސީންގެ ނުފޫޒާއި ބާރު ސިޔާސީ ގޮތުންނާ އެހެނިހެންވެސް ގޮތްގޮތުން ދިވެހިންގެ މައްޗަށް ފޯރުވާފައިވާ ގޮތް މި ދިރާސާގައި ބަލާފައިވެ އެވެ.