ގްރޭޓާ މާލޭ ސަރަހައްދުގައި ހިމެނޭ ހުރިހާ ރަށްތަކެއް ގުޅާލަން މި ސަރުކާރުން ފަށާފައިވާ "ގްރޭޓާ މާލޭ ކަނެކްޓިވިޓީ ޕްރޮޖެކްޓް"ގެ ދަށުން އަޅާ ބްރިޖުގެ މަސައްކަތް ނިމޭނީ 2024 ވަނަ އަހަރުގެ މެއި މަހުގެ ތެރޭގައި ކަމަށް އެ ޕްރޮޖެކްޓުގެ މެނޭޖްމަންޓު ޔުނިޓުން ބުނެފި އެވެ.
މުޅި ޕްރޮޖެކްޓަށް 7.7 ބިލިއަން ރުފިޔާ ހަރަދުވާނެ ކަމަށް ބެލެވޭ މި ބްރިޖުގެ މަސައްކަތް ކުރަނީ އިންޑިއާގެ އެފްކޮންސް ކުންފުނިންނެވެ. ކޮވިޑު ބަލިމަޑުކަމުގެ ތެރޭގައި ދިގުލައިގެން ދިޔަ ބީލަން މަރުހަލާއަކަށް ފަހު، ޕްރޮޖެކްޓުގެ ކޮންޓްރެކްޓަރަކަށް އެފްކޮންސްއާއެކު ސޮއިކުރީ ނިމުނު އަހަރުގެ އޮގަސްޓު 26 ގަ އެވެ.
އޭގެ ފަހުން ފުރިހަމަ ކުރަން ޖެހޭ ކަންކަން ފުރިހަމަ ކުރުމަށްފަހު، އަމަލީ މަސައްކަތްތައް ފެށީ މި އަހަރުގެ ކުރީކޮޅުގަ އެވެ.
އެގޮތުން މިހާރު އެފްކޮންސް އިން ކުރަމުން ދަނީ މާލެ-ތިލަފުށި ބްރިޖު މަސައްކަތް ފެށުމުގެ ކުރިން ނިންމަން ޖެހޭ ޖިއޯޓެކްނިކަލް ސާވޭ އެވެ. މި މަސައްކަތް އެފްކޮންސް އިން ފެށީ މި ޖެނުއަރީ މަހުގެ ފަހުކޮޅު އެވެ.
އެކަމަކު މި މަސައްކަތް ނިމޭނެ ސީދާ ތާރީހެއް ނޭނގެ އެވެ.
ބްރިޖު ޕްރޮޖެކްޓު މެނޭޖްމަންޓު ޔުނިޓުން މި ނޫހަށް މައުލޫމާތު ދިނީ ބްރިޖުގެ ޑީޓެއިލް ޑިޒައިނަށް ބޭނުންވާ ހުރިހާ މައުލޫމާތެއް އެއްކުރެވެންދެން އެ މަސައްކަތް ކުރިޔަށް ދާނެ ކަމަށެވެ.
"ޑީޓެއިލް ޑިޒައިނަށް ބޭނުންވާ ހުރިހާ މައުލޫމާތެއް އެއްކުރެވެންދެން ޖިއޯޓެކްނިކަލް އިންވެސްޓިގޭޝަންތައް ކުރިޔަށް ދާނެ،" އެ ޔުނިޓުގެ އޮފިޝަލަކު ވިދާޅުވި އެވެ.
މާލެ-ތިލަފުށި ބްރިޖުގެ މަސައްކަތް ކުރިޔަށް ދަނީ ދެ ފިޔަވައްސަކަށް ބަހާލައިގެންނެވެ. އެއީ މާލެއިން ގުޅީފަޅަށް ގުޅާލުމާއި ތިލަފުށިން ގުޅީފަޅަށް ގުޅާލުމެވެ. ދެ ފިޔަވައްސެއް ނަމަވެސް މަސައްކަތްތައް ފަށަނީ އެކުއެކީގަ އެވެ.
މި ބްރިޖު ނިމުމުން ގްރޭޓާ މާލޭ ސަރަހައްދުގައި ހިމެނޭ ތިލަފުއްޓާއި ގުޅީފަޅާއި ވިލިމާލެ މާލެއާ ގުޅާލެވޭނެ އެވެ. އެއާއެކު ތިލަފުށިން ހުޅުމާލެއާ ހަމައަށް އެއްގަމު މަގުން ދަތުރުކުރެވޭނެ މަގުފަހި ވާނެ އެވެ.
މި ރަށްތައް ގުޅާލަން އަޅާ ބްރިޖާއި ކޯސްވޭ އަދި މަގުތަކުގެ ނެޓްވާކުގެ ދިގުމިނުގައި 6.7 ކިލޯމީޓަރު ހުންނާނެ އެވެ. މި ލިންކުގެ ބައިތަކުގެ ތެރޭގައި ތިން ބްރިޖާއި، ދެ މަގާއި، ކޮންމެ ރަށަކަށް އަރާ ފޭބުމަށް އިންޓަޗޭންޖް ޕޮއިންޓްތަކާއި، ޕާކިން ސަރަހައްދުތައް ގާއިމުކުރެވޭނެ އެވެ.
މާލެ-ތިލަފުށި ބްރިޖަކީ މި ސަރުކާރުގެ އިގުތިސޯދީ ތަސައްވުރާއި ސިޔާސަތުގެ މުހިންމު ބަޔެކެވެ. ނަމަވެސް މި ރިޔާސީ ދައުރު ނިމެންވާއިރަށް ބްރިޖުގެ މަސައްކަތް މުޅީން ނުނިމޭނެ އެވެ.
މި ބިޔަ ޕްރޮޖެކްޓަށް ހަރަދުކުރަނީ އިންޑިއާ އެގްޒިމް ބޭންކު މެދުވެރިކޮށް ހަމަޖައްސާފައިވާ 400 މިލިއަން ޑޮލަރުގެ ކްރެޑިޓް ފެސިލިޓީގެ ތެރެއިންނާއި އިންޑިއާ ސަރުކާރުން ދޭ 100 މިލިއަން ޑޮލަރުގެ ހިލޭ އެހީންނެވެ.
