ވަޒީފާގެ ބިރު ދައްކައި ކޮމަންޑޫ ދާއިރާގެ ބައި-އިލެކްޝަނަށް ނުފޫޒު ފޯރުވިކަމަށް އިދިކޮޅުން ތުހުމަތުކުރި ފެނަކަ ކޯޕަރޭޝަންގެ ލޮޖިސްޓިކްސް ހެޑް ޒާހިރު އުސްމާނަށް ވެރިކަންކުރާ އެމްޑީޕީގެ އެކްޓިވިސްޓުންގެ ނުރުހުން އަމާޒުވެ, އޭނާއާ ދެކޮޅަށް ފިޔަވަޅު އަޅައި ދިނުމުގެ އަޑު ސޯޝަލް މީޑިއާގައި ގަދަވެއްޖެ އެވެ.
ސޯޝަލް މީޑިއާގައި އެންމެ ފުރަތަމަ ޒާހިރުއާ މެދު ކަންބޮޑުވުން ފާޅުކޮށް އޭނާގެ މައްސަލަ ބަލައިދނުމަށް ގޮވާލީ ޕީޕީއެމްގެ މެމްބަރުންނެވެ. އެގޮތުން، ކޮމަންޑޫ ދާއިރާގެ އިންތިހާބުގައި ވޯޓުލާ ފެނަކަ ކޯޕަރޭޝަންގެ މުވައްޒަފުންނަށް ވަޒީފާގެ ބިރު ދައްކައި ވަކި ގޮތަކަށް ވޯޓު ދިނުމަށް އޭނާ ބުނެފައިވާ ކަމަށް އިދިކޮޅުން ތުހުމަތުކުރި އެވެ. އަދި އެފަދަ އޯޑިއޯ އެއް ވެސް ލީކުކޮށްލާފައިވެ އެވެ.
ފެނަކަ ކޯޕަރޭޝަނުން ވަނީ އެ އޯޑިއޯގައި ވާހަކަ ދައްކަނީ ޒާހިރު ނޫން ކަމަށް ބުނެ އޭނާ ދިފާއުކޮށްފަ އެވެ. އަދި އޭނާއާ ބެހޭ މައްސަލައެެއް ވެސް މިހާތަނަށް ހުށަހަޅާފައި ނުވާ ކަމަށް އެ ކުންފުނިން ބުނެ އެވެ.
"ރާޑޯއަކަށް ނޫން ވޯޓު މި ދެނީ. ވޯޓު މި ދެނީ ތިލަފަތަށް. ކަނޑައެޅިގެން މިތާ ހުރެ ރާޑޯއާ ދެކޮޅުވީމަ އެވަނީ އެމްޑީއާ ދެކޮޅު. އެހެންވެ، އަހަރުމެންނަށް އެ ދުވަހަކު އެހީތެރިކަމެއް ނުދެވޭނެ. ހަމަ ސާފުކޮށް ބުނަންވީ ތިމަންނަ ތިކަން ނުކުރާނަމޭ. އޭރަށް ނިމުނީ." ކޮމަންޑޫ ދާއިރާއަށް ނިސްބަތްވާ ފެނަކަ ކޯޕަރޭޝަންގެ މުވައްޒަފަކާ އުސްމާނާ ދެމެދު ދެކެވުނު ވާހަކަތަކެއް ކަމަށް ބުނެ އާންމުކުރި އޯޑިއޯގައި ބުނާ އަޑު އިވެ އެވެ.
ޒާހިރަށް ކުރެވޭ ތުހުމަތު ފެނަކައިން ދޮގުކުރި ނަމަވެސް، ށ. ފޯކައިދޫގައި މަސައްކަތްކުރާ ފެނަކައިގެ މުވައްޒަފަކު ވަނީ އިންތިހާބުގެ ކުރިން ވަކި ގޮތަކަށް ވޯޓު ދިނުމަށް އޭނާގެ ކިބައިން ޒާހިރު އެދުނު ކަމަށް މި ނޫހަށް ޔަގީން ކޮށްދީފަ އެވެ. މާލޭ ހެޑް އޮފީހުގައި ޒާހިރު މަސައްކަތްކުރެއްވި ނަމަވެސް ބައި-އިލެކްޝަންގެ ކެމްޕޭނަށް ގޮސް އޭނާ ހަރަކާތްތެރިވީ ކޮމަންޑޫ ދާއިރާގެ ތިން ރަށުގަ އެވެ.
"ވޯޓުލާން ދާން ވާނީ ބައްދަލުކޮށްފައި ކަމަށް ޒާހިރު ބުނި. އެހެން ނަމަވެސް އަޅުގަނޑު ބައްދަލެއް ނުކުރަން." މި ނޫހާ މައުލޫމާތު ހިއްސާކުރަމުން މުވައްޒަފު ބުންޏެވެ.
މިކަމާ ގުޅިގެން ފެނަކަ ކޯޕަރޭޝަންގެ އެމްޑީ އަހްމަދު ސައީދު ވަނީ މިހާރުގެ ފެނަކަ މެނޭޖްމަންޓުން އިންތިހާބަށް ނުފޫޒު ފޯރުވުމަށް އެއްވެސް ކަމެއް ނުކުރާނެ ކަމަށް ވިދާޅުވެފަ އެވެ.
"ކުރީގައި އެބަ ހުރި ފުވައްމުލަކުގައި މަސައްކަތްކުރާ މުވައްޒަފު ތުރާކުނަށް ވެސް ފޮނުވާލާފައި. މިހާރަކު އެފަދަ އެއްވެސް މައްސަލައެއް ނޫޅޭނެ. މިހާރުގެ މެނޭޖްމަންޓުން ކަންކުރާ އުސޫލެއް ނޫން އެއީ." މި ނޫހާ ވާހަކަ ދައްކަވަމުން ސައީދު ވިދާޅުވި އެވެ.
އެންމެ ފުރަތަމަ ޒާހިރުގެ މައްސަލަ ބަލަން ޕީޕީއެމުން ގޮވާލި ނަމަވެސް، ކުރީ ސަރުކާރުގައި ބޭއްވި އެކި ސިޔާސީ ހަރަކާތްތަކުގައި ޒާހިރު ބައިވެރިވާ ފޮޓޯތައް އެމްޑީޕީ އެކްޓިވިސްޓުން އަންނަނީ ދައުރު ކުރަމުންނެވެ. އަދި، އޭނާއަކީ ސަރުކާރަށް ގެއްލުން ދޭން މަސައްކަތް ކުރަމުންދާ މީހެއް ކަމަށާއި އޭނާއަކީ މި ސަރުކާރުގެ ސިޔާސަތުތަކާ ފާޅުގައި ދެކޮޅު ހަދާ މީހެއް ކަމަށް ބުނެ އޭނާ ވަކިކުރުމަށް އަންނަނީ ގޮވާލަމުންނެވެ.
