އަވައްޓެރި ސްރީލަންކާއިން ގެއްލިގެން ހޯދަމުން ދިޔަ ދިވެހި ދަރިވަރު މަރުވެފައި އޮތްވާ ފެނިއްޖެ އެވެ.
ގެއްލިގެން ހޯދަމުން ދިޔައީ ދެހިވަލައިގައި ދިރިއުޅޭ އަފްހަމް ނަސީރު, 23 އެވެ.
ބިޒްނަސް މެނޭޖްމަންޓުން މަތީ ތައުލީމް ހާސިލް ކުރަމުން ދިޔަ އަފްހަމްއާ އާއިލާ މީހަކާ އެންމެފަހުން ބައްދަލުވީ ރޭ 11:00 ހާއިރު އޭނާގެ އާއިލާއިން ބުނެ އެވެ.
އޭގެފަހުން ރައްޓެއްސަކާ ފޯނުން ވާހަކަ ދައްކާފައިވާއިރު ކަންބޮޑުވާ ޒާތުގެ ވާހަކަތަކެއް ދައްކާފައިވާ ކަމަށް އާއިލާއިން މައުލޫމާތުދެ އެވެ.
ލަންކާގެ ނޫސްތަކުން ވަނީ ކާކުކަން ނޭނގޭ ދެ މީހެއްގެ ހަށިގަނޑު ވެލެވަތޭގެ ބީޗް ސަރަހައްދުގައި އޮތްވާ ފެނިގެން ރިޕޯޓްކޮށްފަ އެވެ. އެ ގައުމުގެ ނޫސްތަކަށް އެއީ ކޮން ބައެއްގެ ހަށިގަނޑެއް ކަމެއް އަދި ޔަގީނެއް ނުކުރެވެ އެވެ.
ނަމަވެސް, އެ ސަރަހައްދުން އަފްހަމް ގެންގުޅުނު ބައެއް ސާމާނު ވަނީ ފެނިފަ އެވެ. އަދި, ބީޗް ސަރަހައްދު ފެނުނު އެއް ހަށިގަނޑަކީ އަފްހަމްގެ ހަށިގަނޑުކަން އާއިލާއިން ކަށަވަރުކޮށްފައިވާ ކަމަށް މައުލޫމާތު ލިބެ އެވެ.
ނޫސްތަކުން ރިޕޯޓްކޮށްފައިވާ ގޮތުގައި މަރުވެފައި އޮތްވާ ފެނުނު ދެ ހަށިގަނޑުގައި ވެސް އެކި ވަރުގެ އަނިޔާތައް ހުއްޓެވެ.
