ނިމިދިޔަ 2021 ވަނަ އަހަރު ދައުލަތުގެ ފަރާތުން 125 ކުއްޖަކަށް ގާނޫނީ އެހީތެރިކަން ފޯރުކޮށްދިންއިރު އެންމެ ގިނައީ މަސްތުވާތަކެތީގެ ކުށްތަކާ ގުޅިގެން ދިން ގާނޫނީ އެހީ ކަމަށް ބަންޑާރަ ނައިބުގެ އޮފީހުން ހާމަކުރި ތަފާސްހިސާބުތަކުން ދައްކައިފި އެވެ.
ކުޑަކުދިންގެ އަދުލުގެ ގާނޫނުގެ ދަށުން، ޖިނާއީ ކުށްތަކުގައި ތުހުމަތުވާ ކޮންމެ ކުއްޖަކަށް ދައުލަތުގެ ހަރަދުގައި ގާނޫނީ ވަކީލެއްގެ އެހީތެރިކަން ފޯރުކޮށްދެން ޖެހެ އެވެ.
އެގޮތުން، މަސްތުވާތަކެއްޗާ ގުޅުންހުރި 70 މައްސަލައެއްގައި ތުހުމަތުވާ ކުދިންނަށް ދައުލަތުން ގާނޫނީ ވަކީލެއްގެ އެހީތެރިކަން ފޯރުކޮށްދީފައިވާ ކަމަށް މިދިޔަ ހޯމަ ދުވަހު ބަންޑާރަ ނައިބުގެ އޮފީހުން އާންމުކުރި މައުލޫމާތަށް ބަލާއިރު އެނގެ އެވެ. އަދި ރޭޕް އާއި ޖިންސީ ގޯނާ ފަދަ ބަދުއަހްލާގީ އަމަލުތަކުގެ 15 މައްސަލައަކާއި، މާރާމާރީގެ 13 މައްސަލައެއްގެ އިތުރުން މަރުގެ ތިން މައްސަލައެއް ވެސް ހިމެނެ އެވެ.
ކުޑަކުދިންނަށް ގާނޫނީ އެހީތެރިކަން ފޯރުކޮށްދީފައިވާ މައްސަލަތަކުގެ ބާވަތްތައް
މަސްތުވާތަކެތީގެ ކުށްތައް - 70
ރޭޕް، ޖިންސީ ގޯނާ ފަދަ ކުށްތައް - 15
މާރާމާރީގެ ކުށްތައް - 13
ވައްކަމާއި މަކަރާއި ހީލަތުގެ ކުށްތައް - 11
ތޫނު ހަތިޔާރެއް ބޭނުންކޮށްގެން މާރާމާރީ ހިންގުމުގެ ކުށްތައް - 8
ބިރުދެއްކުމާއި ބްލެކްމެއިލް ކުރުމުގެ ކުށްތައް - 8
މުދަލަށް ގެއްލުންދިނުމުގެ ކުށްތައް - 5
މަރުގެ މައްސަލަތައް - 3
ފުލުހުންގެ ވާޖިބަށް ހުރަސް އަޅާ، މަރުގެ އިންޒާރު ދިނުމުގެ ކުށްތައް - 3
ޖިނާއީ ބޮޑެތި ކުށްތަކުގައި ހައްޔަރުކުރާ ކުޑަކުދިން ބައިތިއްބަން ކ. ހިންމަފުށީގައި ހެދި ޑިޓެންޝަން ސެންޓަރުގެ މަސައްކަތް ނިންމުމަށްފަހު، އެތަން ހުޅުވުމަށް ބޭއްވި ރަސްމިއްޔާތުގައި ހޯމް މިނިސްޓަރު، އިމްރާން އަބްދުﷲ ވިދާޅުވީ އެ ސެންޓަރަކީ ކުށްކުރާ ކުދިންގެ މައްސަލަތަކަށް ލިބުނު ބޮޑު ހައްލެއް ކަމަށެވެ.
އެގޮތުން ކުށްކުރާ ކުދިންނަށް ރަނގަޅު ތަރުބިއްޔަތު ދެވި އަލުން މުޖުތަމައުއަށް ނެރުމަކީ އެންމެބޮޑު ބޮޑު އަމާޒުކަމަށް މިނިސްޓަރު އެދުވަހު ވިދާޅުވި އެވެ.
އަލަށް އިމާރާތް ކުރި ސެންޓަރު ފަރުމާކޮށްފައި ވަނީ އެ ކުދިންނަށް ތައުލީމް އުނގަންނަވައިދެވޭނެ ގޮތަށް ކްލާސްރޫމާއި ތަމްރީން ކޮޓަރިތަކާއި ވެސް އެކު އެވެ. ގިނަ ހިދުމަތްތަކާއި އެކު އެ ޖަލު ހަދާފައި ވަނީ ބައިނަލްއަގްވާމީ ފެންވަރަށެވެ.
މަސްތުވާތަކެތީގެ ވަބާގައި ޖެހޭ ކުޑަކުދިންގެ އަދަދު ފާއިތުވި އަހަރުތަކުގެ ތެރޭގައި އިތުރުވަމުންދާ ކަމަށް ދާދި ފަހުން ހެލްތު މިނިސްޓްރީން ހެދި ދިރާސާއަކުން ދައްކަ އެވެ. އުމުރުން އަށް އަހަރުން ފެށިގެން މަސްތުވާތަކެތި ބޭނުންކުރާ ކުޑަކުދިން ރާއްޖޭގައި ތިބި ކަމަށް މި ދިރާސާގެ ހޯދުންތަކުން ދައްކަ އެވެ.
މަސްތުވާތަކެތީގެ ވިޔަފާރި ކުރުމުގައި ވެސް ކުޑަކުދިން ބައިވެރިވާ މިންވަރު އިތުރުވެފައިވާކަން މި ދިރާސާއިން ވަނީ ހާމަވެފަ އެވެ. އެގޮތުން، މަސްތުވާތަކެތީގެ ބޮޑުން އޭގެ ވިޔަފާރި ކުރުމަށް އުމުރުން 15 އަހަރާއި 17 އަހަރުގެ ކުދިން ބޭނުންކުރާކަން ވަނީ ފާހަގަކުރެވިފަ އެވެ.
