މެޑްރިޑް (ފެބްރުއަރީ 2) - ރެއާލް މެޑްރިޑުން މި ސީޒަން ނިންމާފައި ހިލޭ ޓްރާންސްފާއެއްގައި ބޮޑު މުސާރަ ލިބޭ ކޮންޓްރެކްޓެއްގައި ފްރާންސްގެ ތަރި ކީލިއަން އެމްބާޕޭ ގެންނަން ނިންމާފައިވާ ކަމަށް މީޑިއާތަކުން ރިޕޯޓްކޮށްފައިވާއިރު، އެ ޑީލާ ބެހޭގޮތުން ބްރެޒިލްގެ ކުރީގެ ފޯވާޑް ރޮނާލްޑޯ ނަޒާރިއޯ ހިޔާލުފާޅުކޮށްފި އެވެ.
އަންނަ ޖުލައި މަހު އެއް ވަނަ ދުވަހު ރެއާލާ ގުޅެން އެމްބާޕޭ ނިންމާފައިވަނީ ހަތަރު އަހަރުގެ ކޮންޓްރެކްޓެއްގައި ކަމަށް ފްރާންސާއި ސްޕެއިނުގެ ނޫސްތަކުން ވަނީ މިދިޔަ ދެ ދުވަހު ރިޕޯޓްކޮށްފަ އެވެ. އަދި އެ ކޮންޓްރެކްޓްގައިވާ ގޮތުން އެމްބާޕޭ އަށް އަހަރަކު 41 މިލިއަން ޕައުންޑް (55 މިލިއަން ޑޮލަރު) ލިބޭނެ ކަމަށް ވެސް ވަނީ ރިޕޯޓްކޮށްފަ އެވެ. އެ ގޮތަށް އެ ޑީލް ގޮސްފިނަމަ އެމްބާޕޭ އަށް ލިބޭ އާމްދަނީ ވެގެންދާނީ ކްލަބަކުން ރަސްމީކޮށް ކުޅުންތެރިއަކަށް ދޭނެ އެންމެ ބޮޑު މުސާރަ އަށެެވެ.
ކުރިން ރެއާލަށް ކުޅުނު ރޮނާލްޑޯ ބުނެފައިވަނީ އެމްބާޕޭ ރެއާލަށް ދާން އުޅޭ ހަބަރުތައް މީޑިއާ އިން ފެނިފައިވާ ކަމަށާއި ދުނިޔޭގެ އެއް ވަނަ ކުޅުންތެރިޔާ އަށް ވެވޭނެ ފެންވަރު އެމްބާޕޭގެ ކިބައިގައި އެބަހުރި ކަމަށެެވެ.
"ޓީވީތަކުންނާއި މީޑިއާ އިން އަހަރެން ދެކެފިން އަހަރަކު 50 މިލިއަން ޔޫރޯ ލިބޭ ގޮތަށް އެމްބާޕޭ ރެއާލަށް ދާން އުޅޭ ވާހަކަ. އެ ކަންކަމަށް ބަލާއިރު، އަހަންނަށް ދޭހަވަނީ އަހަރެމެން ފުޓްބޯޅަ ކުޅެވިފައި މިވަނީ ފައިސާގެ ގޮތުން ބަލާއިރު ނުރަނގަޅު ޖީލެއްގައޭ،" ރޮނާލްޑޯ ބުންޏެވެ.
"ފުޓްބޯޅަ މިހާރު ވިޔަފާރި އިންޑަސްޓްރީ އަކަށް ވެފައި އޮތް އޮތުމަށް ބަލާއިރު އަބަދުވެސް މި ފެންނަނީ އެއް ފަހަރަށް ވުރެ އަނެއް ފަހަރު ކުޅުންތެރިންގެ މުސާރަ ބޮޑުވަމުން އަންނަތަން. އެހެން އެ ގޮތަށް އެ ވަނީ އަހަރެމެންގެ ޒަމާނުގައި ފުޓްބޯޅަ ކުޅެގެން ގިނަ ކަންތައްތަކެއް ހާސިލްކޮށްފައިވާ މަންޒަރު މިހާރު މި އޮތް ޖީލަށް ފެންނަމުންދާތީ،"
އެމްބާޕޭ އަކީ ހުނަރުވެރި ކުޅުންތެރިއެއްކަން ފާހަގަކޮށް، ރޮނާލްޑޯ ބުނީ ސްޓްރައިކަރުންގެ ގޮތުގައި ބަލާއިރު، އެމްބާޕޭ އަށް ވުރެ ރަނގަޅު ތިން ކުޅުންތެރިއަކު އެބަހުރި ކަމަށެވެ. އެއީ ރެއާލްގެ ކެޕްޓަން ކަރިމް ބެންޒެމާ، ބަޔާން މިއުނިކްގެ ރޮބަޓް ލެވަންޑޯސްކީ އަދި ބޮރޫޝިއާ ޑޯޓްމަންޑްގައި މި ވަގުތު ހުރި އާލިން ބްރައުޓް ހާލަންޑް ކަމަށެެވެ.
މި ސީޒަނުގައި އެމްބާޕޭ ވަނީ 28 މެޗުން 19 ގޯލު ޖަހައިފަ އެވެ. ރޮނާލްޑޯ ބުނީ މި މަހު ޗެމްޕިއަންސް ލީގުގައި ޕީއެސްޖީ އާއި ރެއާލް ކުޅޭ މެޗަކީ އެމްބާޕޭގެ ކުޅުން ވަޒަންކޮށްލަން ލިބޭނެ ރަނގަޅު މެޗެއް ކަމަށެވެ.
