ބިދޭސީން ދިވެހި ބަހުން ވާހަކަ ދެއްކުމުގެ މުބާރާތެއް ކުރިއަށް އޮތް ރޯދަ މަހު ބޭއްވުމަށް ދިވެހި ބަހުގެ އެކެޑަމީން ނިންމައި، އެކަމުގެ އެއްބަސްވުމެއްގައި އިއްޔެ ސޮއިކޮށްފި އެވެ.
އެކެޑަމީގެ އެސިސްޓެންޓް ޑިރެކްޓަރު މުހައްމަދު ފައުޒާން ވިދާޅުވީ ބިދޭސީން ދިވެހި ބަހުން ވާހަކަ ދެއްކުމުގެ ޕްރޮގްރާމް ބޭއްވުމުގެ މަގްސަދަކީ ރީތިކޮށް، ހަމައަށް ދިވެހި ބަހުން ވާހަކަ ދައްކަން އެނގޭ ބިދޭސީން އުފެއްދުން ކަމަށެވެ.
"ރޯދަ މަހުގެ ހަތަރު ހަފްތާއަށް މި މުބާރާތް ބެހިގެންދާ ގޮތަށް ރާވާފަ އޮންނާނީ. އެއީ ހަތަރު ޕްރޮގްރާމް. ފުރަތަމަ ބުރުން ނަގަނީ 20 މީހުން ދެން އޮތް ބުރަށްދާން. ދެން 10. ފައިނަލުގައި ފަސް ބައިވެރިން،" ފައުޒާން ވިދާޅުވި އެވެ.
ދިވެހި ބަހުގެ އެކެޑަމީން އެ މުބާރާތް ބާއްވަނީ ވީޓީވީއާ ގުޅިގެންނެވެ. އެ ޕްރޮގްރާމް ގެނެސްދޭނީ ވެސް އެ ވީޓީވީގެ ޗެނަލަކުންނެވެ. އެ މުބާރާތުގެ ފަނޑިޔާރުންގެ ޕެނަލުގައި ދިވެހި ބަހުގެ ތަޖުރިބާކާރުން އަބްދުލް އަޒީޒް ޖަމާލް އަބޫބަކުރާއި އަންވަރު އިބްރާހިމް އާއި އައިމިނަތު އިބްރާހިމް ހިމެނިވަޑައިގަންނަވާނެ އެވެ.
މުބާރާތުގެ ފަނޑިޔާރުންގެ ޕެނެލްގެ މެމްބަރުން: ވަނަ ހޮވުމުގައި ބަލާނެ އެއް ކަމަކީ ބަހުގެ ހަމަތައް ބޭނުން ކުރާ ގޮތް -- ފޮޓޯ: އެކެޑަމީ
މުބާރާތުގައި ބަލާނީ ބަހުގެ ހަމަތަކަށް ބަލައިގެން ވާހަކަ ދައްކަން އެނގޭތޯ ކަމަށް އެކަޑެމީގެ އެސިސްޓެންޓް ޑިރެކްޓާ ފައުޒާން ވިދާޅުވި އެވެ. އޭގެ އިތުރުން ހުށަހެޅުމާއި ކުއްލި މައުލޫއަށް ވާހަކަ ދެއްކުމުގެ ގާބިލްކަން ހުރި މިންވަރަށް ވެސް މުބާރާތުގެ ފަނޑިޔާރުން ބަލާނެ ކަމަށް އޭނާ ވިދާޅުވި އެވެ.
ބިދޭސީން ދިވެހި ބަހުން ވާހަކަ ދެއްކުމުގެ މުބާރާތުން އެއް ވަނަ ހޯދާ މީހަކަށް 5،000ރ. ލިބޭނެ ކަމަށް ދިވެހި ބަހުގެ އެކެޑަމީން ބުނެ އެވެ. ދެ ވަނައަށް އަންނަ މީހަކަށް ލިބޭނީ 3000ރ. އެވެ. އަދި ތިން ވަނަ އަށް އަންނަ ފަރާތަކަށް 2،000ރ. ލިބޭނެ އެވެ.
މީގެ ކުރިން ބިދޭސީން ދިވެހި ބަހުން ވާހަކަ ދެއްކުމުގެ ޕްރޮގްރާމެއް، ނުވަދިހައިގެ އަހަރުތަކުގެ ތެރޭގައި ޓެލެވިޒަން މޯލްޑިވްސް އިން ވެސް ގެނެސްދިނެވެ. ރާއްޖޭގައި ދިރިއުޅެމުންދިޔަ ބިދޭސީ ދަރިވަރުންނާއި މަސައްކަތްތެރިންގެ ތަރުހީބު އެ ޕްރޮގްރާމަށް ލިބިފައިވެ އެވެ. އަދި ދިވެހިންގެ މެދުގައި ވެސް އެ ޕްރޮގްރާމް މަޝްހޫރުވި އެވެ.
