ފަންނީ ވަޒީފާތަކަށް ޒުވާނުން ތަމްރީނުކުރަން އެމްޓީސީސީން ގެންގުޅޭ ވިސްނުމުގެ ތެރެއިން މި އަހަރުގެ "ހުނަވަރު އެޕްރެންޓިސްޝިޕް ޕްރޮގްރާމު" ގައި ބައިވެރިވެ، އެކި ވަޒީފާތަކަށް ތަމްރީނުވާން 140 ފުރުސަތު މިއަދު ހުޅުވާލައިފި އެވެ.
ކާމިޔާބުކަމާއެކީ ޕްރޮގްރާމު ނިންމާ ބައިވެރިންނަށް ވަގުތުން ވަޒީފާ ލިބޭ ގޮތަށް ހިންގާ ހުނަވަރު ޕްރޮގްރާމުން މިފަހަރު ފުރުސަތު ހުޅުވާލީ އެމްޓީސީސީއަށް މި ވަގުތަށް އެންމެ ބޭނުންވާ ދާއިރާތަކުން މުވައްޒަފުން ތަމްރީނު ކުރާށެވެ. އެގޮތުން, ތަމްރީނުވާން ފުރުސަތު ހުޅުވާލި ވަޒީފާތަކުގެ ތެރޭގައި ހިމެނެނީ:
- ބަސް ޑްރައިވަރުން
- އެކްސްކެވޭޓާ އޮޕަރޭޓަރުން
- ކްރޭން އޮޕަރޭޓަރުން
- ލޯޑާ އޮޕަރޭޓަރުން
- ވެލްޑަރުން
- މެރިން މެކޭނިކްސް
- ޓަގް މެކޭނިކްސް
- ސައިޓް ސުވަޕައިޒަރުން
- ޓިންކަރުން
އެމްޓީސީސީގެ ހުނަވަރު ޕްރޮގްރާމަކީ ތިން މަސް ދުވަހަށް ކުރިޔަށް ގެންދާ ވޮކޭޝަނަލް ޓްރެއިނިން ޕްރޮގްރާމެކެވެ.
މި ޕްރޮގްރާމުތަކަށް ހޮވޭ ޒުވާނުން ތަމްރީނުވާނީ އެމްޓީސީސީގެ މަސައްކަތު ސައިޓުތަކުގައި، މަސައްކަތުގެ ދާއިރާއިން ތަމްރީނު ވެގެން ތިބި އެ ކުންފުނީގެ މުވައްޒަފުންނާ އެކީގަ އެވެ. އަދި، ޕްރޮގްރާމު ކުރިޔަށްދާ މުއްދަތުގެ ތެރޭގައި ހުރިހާ ބައިވެރިންނަށް 5،000ރ. ގެ އެލަވަންސެއް ވެސް ލިބޭނެ އެވެ. އަދި، ދިރިއުޅޭ ރަށް ނޫން އެހެން ރަށެއްގައި މަސައްކަތްކުރާ ނަމަ ހުރުމާއި ކެއުން އެމްޓީސީސީން ހަމަޖައްސާނެ އެވެ.
މި އަހަރުގެ ހުނަވަރު ޕްރޮގްރާމު އިއުލާނު ކުރައްވަމުން އެމްޓީސީސީގެ ސީއީއޯ އާދަމް އާޒިމް ވިދާޅުވި ގޮތުގައި، އެ ވަޒީފާތަކަކީ އާމްދަނީ އާއި ވަޒީފާގެ މުސްތަގުބަލަށް ބެލި ނަމަވެސް ރަނގަޅު ވަޒީފާތަކެކެވެ.
"މިއީ ވަރަށް ރަނގަޅު މުސާރަ ވެސް ލިބޭ ވަޒީފާތަކެއް. އަދި މިއީ ވަރަށް ބޮޑަށް ކުރިޔަށް ވެސް ދެވިދާނެ ވަޒީފާތަކެއް.. ޕްރޮގްރެސް ވެވޭނެ ވަރަށް ދުރަށް މީގެން ކޮންމެ ވަޒީފާއަކުން ވެސް" އާޒިމް ވިދާޅުވި އެވެ.
މިއީ ފަންނީ ވަޒީފާތަކެއް ކަން ފާހަގަކުރައްވަމުން އާޒިމް ވިދާޅުވީ މިއިިން ކޮންމެ ވަޒީފާއެއް އެވަރެޖް މުސާރަ އުޅެނީ 10،000ރ. އާއި 25،000ރ. އާ ދެމެދު ކަމަށެވެ. އޭގެ މިސާލެއް ދެމުން އާޒިމް ވިދާޅުވީ އެމްޓީސީސީގެ މޮޅު އެކްސްވޭޓަރު އޮޕަރޭޓަރުންނަށް 25،000ރ. އާއި 28،000ރ. އާ ދޭތެރޭގެ އަދަދަކުން މުސާރަ ދޭ ކަމަށެވެ.
ހުނަަވަރު ޕްރޮގްރާމުގައި ބައިވެރިވާން ފުރުސަތު ހުޅުވާލާނީ އަންނަ ހަފުތާގެ ތެރޭގަ އެވެ. މި ޕްރޮގްރާމް ބެހެނީ ދެ ބަޔަކަށެވެ. އެއީ ހުނަވަރު ލައިސެންސިން ޕްރޮގްރާމާއި ހުނަވަރު ޓެކްނިކަލް ސްކިލްސް ޕްރޮގްރާމް އެވެ. މި ޕްރޮގްރާމާއި ގުޅޭ މައުލޫމާތު ދިނުމަށް ފެބްރުއަރީ މަހުގެ ކުރީކޮޅު މާލެ އާއި ކުޅުދުއްފުށި ސިޓީ އަދި ލ. ފޮނަދޫ ގައި އެމްޓީސީސީން އޯޕަން ޑޭތަކެއް ބާއްވާނެ އެވެ.
އެމްޓީސީސީން 2018 ވަނަ އަހަރު ފެށި ހުނަވަރު އެޕްރެންޓިސްޝިޕް ޕްރޮގްރާމުގެ މަގުސަދަކީ ފަންނީ/ޓެކްނިކަލް ވަޒީފާތަކަށް ދިވެހިން ލިބުމުގައި ހުރި ދަތިތައް ހައްލު ކުރުމެވެ. މިދިޔަ އަހަރު އައްޑޫ ސިޓީ އާއި ފުވައްމުލައް ސިޓީގައި އެ ކުންފުނިން މި ޕްރޮގްރާމް ކުރިޔަށް ގެންގޮސްފައިވެ އެވެ. އަދި މިހާރު އެމްޓީސީސީގެ ވަޒީފާގައި އޭގެ ތެރެއިން 14 މީހުން އަންނަނީ ހަރަކާތްތެރިވަމުންނެވެ.
އެމްޓީސީސީގެ އަމާޒަކީ މި ޕްރޮގްރާމުގެ ތެރެއިން އެ ކުންފުންޏަށް ބޭނުންވާ ހެވީވެހިކަލްކަލް އޮޕަރޭޓަރުންނާއި، ކަނޑުގައިދުއްވާ އުޅަނދުފަހަރު އޮޕަރޭޓަރުންނާއި، އިންޖިނިއަރުންނާއި، ވެލްޑަރުންނާއި، ސާވެޔަރުން ތަމްރީނުކޮށް، ކުންފުނީގައި ދިވެހިންގެ ދައުރު އިތުރަށް ފުޅާކުރުމެވެ.
