މިއަހަރުގެ ފުރަތަމަ މަހުގެ ތެރޭގައި ފުލުހުންގެ ހިދުމަތަށް އެންމެ ގިނައިން ހުށަހަޅާފައި އޮތީ ވައްކަމުގެ މައްސަލަތައް ކަމަށް އެ އިދާރާގެ ތަފާސްހިސާބުތަކުން ދައްކައިފި އެވެ.
ފުލުހުން އާންމުކޮށްފައިވާ ހިސާބުތަކަށް ބަލާއިރު މމި ހިނގާ ޖެނުއަރީ މަހުގެ އިއްޔެއާ ހަމައަށް އެ އޮފީހަށް ހުށަހެޅީ 881 މައްސަލަ އެވެ. އޭގެ ތެރޭގައި އެންމެ ގިނައީ ވައްކަމުގެ މައްސަލަތަކެވެ. ވައްކަމުގެ 336 މައްސަލައެއް ޖެނުއަރީ މަހު ހުށަހެޅި އެވެ.
މި ޖެނުއަރީ މަހު ފުލުހުންނަށް ހުށަހަޅާފައިވާ އެހެން މައްސަލަތަކުގެ ތެރޭގައި، މަސްތުވާ ތަކެތެއްޗާއި ގުޅުންހުރި 113 މައްސަލައަކާއި ޖިންސީ ފުރައްސާރައިގެ 27 މައްސަލައަކާއި މާރާމާރީގެ 34 މައްސަލައެއް ވެސް ހިމެނެ އެވެ.
އޭގެ އިތުރުން، ގެވެށި އަނިޔާގެ 23 މައްސަލައަކާއި ފޭކު ފައިސާ ގެންގުޅުމުގެ އަށް މައްސަލަ އަކާއި ޗެކް ބައުންސިންގެ ދެ މައްސަލައެއް ވެސް މި މަހު ތެރޭގައި ފުލުހުންނަށް ހުށަހަޅާފައިވެ އެވެ.
ފާއިތުވި 2021 ވަނަ އަހަރުގެ ޖެނުއަރީ މަހުގެ ތަފާސްހިސާބުތަކަށް ބަލާއިރު އެ އަހަރުގެ ޖެނުއަރީ މަހު ވެސް ފުލުހުންނަށް އެންމެ ގިނައިން ރިޕޯޓްކޮށްފައި އޮތީ ވައްކަމުގެ މައްސަލަތަކެވެ. އަދި މިދިޔަ އަހަރު އެއްކޮށް ވައްކަމުގެ 4754 މައްސަލައެއް ރިޕޯޓްކޮށްފައިވެ އެވެ.
ފުލުހުންގެ ހިސާބުތަކަށް ބަލާއިރު މިދިޔަ އަހަރުގެ ޖެނުއަރީ މަހުގެ ތެރޭގައި އެ އިދާރާއަށް ހުށަހަޅާފައިވާ މައްސަލަތަކާ އަޅާބަލާއިރު މި އަހަރުގެ މިހާތަނަށް ހުށަހަޅާފައިވާ މައްސަލަތަކުގެ މިންވަރު 23 ޕަސެންޓު މަދެވެ.
މިދިޔަ އަހަރުގެ ޖެނުއަރީ މަހު ހިސާބުތަކަށް ބަލާއިރު އެ މަހު މަސްތުވާ ތަކެއްޗާއި ގުޅުން ހުރި 137 މައްސަލައަކާއި ޖިންސީ ފުރައްސާރަ ކުރިކަމުގެ 37 މައްސަލައަކާއި މާރާމާރީގެ 47 މައްސަލައެއް ފުލުހުންނަށް ހުށަހަޅާފައިވެ އެވެ.
މިދިޔަ އަހަރުގެ ޖުމްލަ ތަފާސްހިސާބުތަކަށް ބަލާއިރު، މަސްތުވާތަކެއްޗާ ގުޅުން ހުރި 1576 މައްސަލައަކާއި ޖިންސީ ފުރައްސާރައިގެ 386 މައްސަލަ އަކާއި މާރާމާރީގެ 649 މައްސަލައެއް ފުލުހުންނަށް ހުށަހަޅާފައިވެ އެވެ.
