ފަނޑިޔާރުންގެ އިސްތިއުނާފް މަޖިލީހުގެ އާ ބެންޗެއް އެކުލަވާލައި، އެ ބެންޗުގައި ތިއްބަވާ ފަނޑިޔާރުންގެ މައުލޫމާތު ޑިޕާޓްމަންޓް އޮފް ޖުޑިޝަލް އެޑްމިނިސްޓްރޭޝަން (ޑީޖޭއޭ) އިން މިއަދު ހާމަކޮށްފި އެވެ.
އެ މަޖިލީހަށް އައްޔަންކޮށްފައިވަނީ ސުޕްރީމް ކޯޓުގެ ފަނޑިޔާރު ހުސްނުއް ސުއޫދާއި، ހައިކޯޓުގެ ފަނޑިޔާރު އަބްދުއްރައޫފް އިބްރާހީމްގެ އިތުރުން ޑްރަގް ކޯޓުގެ ގާޒީ މުހުތާޒު ފަހުމީ އެވެ.
އެއް އަހަރު ދުވަހަށް އެކުލަވާލާ އިސްތިއުނާފް މަޖިލީހުގައި ތިއްބަވާނީ އުއްތަމަ ފަނޑިޔާރު ފިޔަވާ ސުޕްރީމް ކޯޓުގެ ފަނޑިޔާރަކާއި، ހައި ކޯޓުގެ ފަނޑިޔާރަކާއި، ސްޕީރިއާ ކޯޓުގެ ފަނޑިޔާރެކެވެ. އަދި އެ ބޭފުޅުންނަކީ ޖޭއެސްސީގެ މެންބަރުންނަށް ވެގެން ނުވާނެ ކަމަށް ފަނޑިޔާރުންގެ އިސްތިއުނާފް މަޖިލީހުގެ ގަވާއިދުގެ ހަތަރުވަނަ މާއްދާގެ (ށ) ގައިވެ އެވެ.
މިއާ އެކު ފަނޑިޔާރަކާ ގުޅޭ ޝަކުވާއެއް ބަލައި ޖުޑިޝަލް ސާވިސް ކޮމިޝަނުން ނިންމާ ނިންމުންތަކުގެ ތެރެއިން ފަނޑިޔާރަކު މަގާމުން ވަކި ކުރަން ރައްޔިތުން މަޖިލީހަށް ހުށަހެޅުމަށް ނިންމާ ނިންމުންތައް ފިޔަވައި އެހެނިހެން ނިންމުންތައް އިސްތިއުނާފް ކުރުމަށް ހުށަހަޅަން ޖެހެނީ އެ މަޖިލީހަށެވެ.
އެގޮތުން، މިދިޔަ އަހަރު ފަނޑިޔާރުންގެ އިސްތިއުނާފް މަޖިލީހަށް ދެ މައްސަލައެއް ހުށަހަޅާފައިވާ ކަމަށް ޖޭއެސްސީން ބުނެފައިވެ އެވެ. އަދި މި ދެ މައްސަލަ ވެސް އިސްތިއުނާފް މަޖިލީހުން ބަލައިގަނެ މައްސަލައާ މެދު ގޮތެއް ނިންމާފައިވާ ކަމަށް ޑީޖޭއޭން ހާމަކުރި އެވެ.
