އިސްތިއުނާފީ މަރުހަލާގެ ފުރަތަމަ ކޯޓު، ހައިކޯޓުގެ އިސްފަނޑިޔާރަކަށް އެ ކޯޓު ހިންގެވުމާ ވަގުތީ ގޮތުން ހަވާލުވެހުންނެވި އަބްދުالله މޫސާ މިއަދު އައްޔަނުކޮށްފި އެވެ.
ޖުޑީޝަލް ސާވިސް ކޮމިޝަނުން ބުނީ، އެ މަގާމަށް ޖަމީލް އައްޔަނުކުރީ އެކަމަށް ޝައުގުވެރިކަން ފާޅުކޮށް ކުރިމަތިލެއްވި ބޭފުޅުންނާ އިންޓަވިއު ކުރުމަށްފަހު އިސްފަނޑިޔާރުކަމަށް އައްޔަނުކުރަން ކޮމިޝަނަށް ލަފާ ދީފައިވާ ގޮތަށް ކަމަށެވެ.
ޖަމީލްއަކީ ހައިކޯޓުގެ ހިންގުން ވަގުތީ ގޮތުން ހަވާލުކޮށްފައި ހުންނެވި ބޭފުޅާ އެވެ. އޭނާއާ އެ މަސްއޫލިއްޔަތު ހަވާލުކުރީ ނޮވެމްބަރު 19. 2025 ގަ އެވެ. އޭގެ ކުރިން އެ މަގާމު އަދާކުރައްވަމުން ގެންދެވީ މުހައްމަދު ފައިސަލް އެވެ.
ފައިސަލްގެ މައްސަލައެއް އެންޓި ކޮރަޕްޝަން ކޮމިޝަނުން ތަހުގީގު ކުރަން ފެށުމާއެކު އޭނާ ވަނީ ނޮވެމްބަރު 23، 2025 ގައި އެ ކޯޓުގެ ފަނޑިޔާރުކަމުން އިސްތިއުފާދެއްވައިފަ އެވެ. ފައިސަލް އަކީ ހައިކޯޓުގެ އިސްފަނޑިޔާރުކަމަށް އައްޔަނުކުރަން ޖޭއެސްސީން އޭޕްރިލް 17، 2025 ގައި ނިންމާފައި އޮތް ބޭފުޅާ އެވެ.
ހައިކޯޓުގެ އިސްފަނޑިޔާރުކަމަށް މިއަދު އައްޔަނުކުރި ޖަމީލްއަކީ މީގެ ކުރިން ލ. ދަނބިދޫ މެޖިސްޓްރޭޓު ކޯޓުގެ މެޖިސްޓްރޭޓުކަމާއި ސިވިލް ކޯޓުގެ ގާޒީކަން ކުރައްވާފައިވާ ބޭފުޅެކެވެ. ހައިކޯޓުގެ ފަނޑިޔާރުކަމުގެ ހުވާ ޖަމީލް ކުރެއްވީ އޯގަސްޓު 3، 2025 ގަ އެވެ.
އޭގެ އިތުރުން، ޖޭއެސްސީން މިއަދު ވަނީ ފެމިލީ ކޯޓުގެ އިސްފަނޑިޔާރުކަމަށް އަބްދުالله ނަޝީދު އައްޔަނުކޮށްފަ އެވެ.
ނަޝީދުއަކީ މީގެ ކުރިން ނ. މަނަދޫ ކޯޓުގެ މެޖިސްޓްރޭޓުކަމާއި އެ ކޯޓުގެ އިސްމެޖިސްޓްރޭޓުކަމުގެ އިތުރުން ނ. އަތޮޅު ޖުޑީޝަލް ދާއިރާގެ އިސްމެޖިސްޓްރޭޓުކަން އަދި، ކްރިމމިނަލް ކޯޓުގެ ގާޒީކަން ކުރައްވައިފަ އެވެ. ފެމިލީ ކޯޓުގެ ގާޒީކަމަށް ނަޝީދު އައްޔަނުކުރީ މާޗު 24، 2016 ގަ އެވެ.
