ގައުމުތައް ދަރަނިވެރިވުމާ ވެސް މިހާރު ގުޅިފައި ވަނީ މޫސުމަށް އަންނަ ބަދަލުތަކުގެ ގެއްލުމާ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ސްރީލަންކާއަށް ކުރެއްވި ރަސްމީ ދަތުރުފުޅުގައި އެގައުމުގެ ޔޫތު ޕާލަމެންޓްގައި ތަގުރީރު ކުރައްވަމުން ނަޝީދު ވިދާޅުވީ މޫސުމަށް އަންނަ ބަދަލުތަކާއި ދައުލަތުގެ ދަރަނި އެތައް ގޮތަކުން ގުޅިފައިވާ ކަމަށެވެ. އެމަނިކުފާނު ވިދާޅުވީ މޫސުމަށް އަންނަ ބަދަލުތަކުގެ ގެއްލުމާއެކު ދަރަންޏަކީ ވެސް ދެކުނު އޭޝިއާގެ ގައުމުތަކަށް ދިމާވެފައިވާ ސީރިއަސް މައްސަލައެއް ކަމަށެވެ.
"އަޅުގަނޑުމެންގެ ދަރަނި، މޫސުމަށް އަންނަ ބަދަލުތަކާ އެތައް ގޮތަކުން ގުޅިފައިވާ ކަމަށް ވެސް އަޅުގަނޑު ގަބޫލުކުރަން. އަޅުގަނޑުމެން އެންމެން ބޭނުންވޭ އިންފްރާ ސްޓްރަކްޗާ. އަދި އަޅުގަނޑުމެން އެންމެން ވެސް ދަރަނިވެރިވާންޖެހޭ. އެކަމަކު މެޑަމް ސްޕީކާ، އަޅުގަނޑުމެން ލޯނު ނެގި އިރު ދުނިޔޭން ބުނަމުން ދިޔައީ މޫސުން ގޯސްވުމާ ކާބަން ބޭރުކުރުމާ ގުޅުމެއް ނެތޭ،" ނަޝީދު ވިދާޅުވި އެވެ.
އެމަނިކުފާނު ވިދާޅުވި ގޮތުގައި އިންޓަގަވަމެންޓަލް ޕެނަލް އޮން ކްލައިމެޓް ޗޭންޖް، (އައިޕީސީސީ) އިން ތަކުރާރުކޮށް ބުނަމުން ދިޔައީ "މޫސުން ގޯސްވާނީ ( މޫސުމަށް އަންނަ ބަދަލުތަކުގެ ގެއްލުންވާން ފަށާނީ) 50 އަހަރު ފަހުން ކަމަށެވެ.
"އެކަމަކު މިދިޔަ އަހަރު އަޅުގަނޑުމެން ކޮޕް 26 އަށް ދިޔަ އިރު، އައިޕީސީސީ ރިޕޯޓް އޮތީ ވަރަށް ސާފުކޮށް. އެ ރިޕޯޓްގައި ބުނީ މޫސުން ގޯސްވުން ގުޅިފައި ވަނީ ކާބަން ބޭރުކުރުމާ އޭ،" އެމަނިކުފާނު ވިދާޅުވި އެެވެ.
މޫސުމަށް އަންނަ ބަދަލުތަކުންވާ ގެއްލުމުގެ މިސާލުތައް ނަޝީދު ދެއްކެވީ ސްރީލަންކާއިންނެވެ. ފަހަކަށް އައިސް އެގައުމުގައި ފެންބޮޑުވުން އިތުރުވެފައިވާ ކަމަށް އެގޮތުން ވިދާޅުވި އެވެ. މޫސުމަށް އަންނަ ބަދަލުތަކުގެ އަސަރު ލަންކާގެ ދަނޑުވެރިކަމަށް ވެސް ކޮށްފައިވާ ކަމަށް ތަފާސްހިސާބުތަކާ ހަވާލާދީ އެމަނިކުފާނު ވިދާޅުވި އެވެ.
"ސްރީލަންކާގެ މޫސުން އެންމެ ފަހުން ގޯސްވި އިރު ސްރީލަންކާއަށް އެތައް ބިލިޔަން ޑޮލަރެއްގެ ގެއްލުން ކުރިމަތިވި. އެއީ [ތަންތަނަށް ] ލިބުނު ގެއްލުމާއި އާމްދަނީ މަދުވުމުގެ ސަބަބުން. ލޯނުތައް ނެގި އިރު އަަޅުގަނޑުމެން ނުވިސްނާ މޫސުން ގޯސްވުމުގެ ސަބަބުން ކުރިމަތިވެދާނެ ގޮންޖެހުންތަކަކަށް،" ނަޝީދު ވިދާޅުވި އެވެ.
އެހެން ނަމަވެސް މޫސުމަށް އަންނަ ބަދަލުތަކުގެ ސަބަބުން ރައުސްމާލު ގެއްލޭކަން މިހާރު ފެންނަން އެބަ އޮތް ކަމަށް ވެސް އެމަނިކުފާނު ވިދާޅުވި އެވެ.
މޫސުމަށް އަންނަ ބަދަލުތަކުގެ ވާހަކަ އެމަނިކުފާނު ފެއްޓެވީ ސިޔާސަތު ކަނޑައެޅުމުގައި ޒުވާނުންގެ ބައިވެރިވުން މުހިންމުވާ ގޮތުގެ މިސާލެއްގެ ގޮތުގަ އެވެ. ޒުވާނުން އެމީހުންނަށް ސިޔާސީ ބާރުވެރިކަން ލިބޭނެ ދުވަހެއް ފެންނަންދެން ހިމޭނުން ތިބެފައި އިހުގެ ގޮތް ގޮތަށް ކަންތައް ކުރުމަކީ މިހާރު ކުރެވެން އޮތް ކަމެއް ނޫން ކަމަށް އެމަނިކުފާނު ވިދާޅުވި އެވެ.
