މެލްބަން (ޖެނުއަރީ 14) - އޮސްޓްރޭލިއާ އިމިގްރޭޝަނުން ދުނިޔޭގެ އެއް ވަނަ ކުޅުންތެރިޔާ ނޯވަކް ޖޮކޮވިޗްގެ ވިސާ މައްސަލަ އިތުރަށް ދިރާސާ ކުރަމުން ދިޔަ ނަމަވެސް ޖޮކޮވިޗް ހިމަނައިގެން އޮސްޓްރޭލިއަން އޯޕަން ޓެނިސް ގްރޭންޑް ސްލޭމް މުބާރާތުގެ ޝެޑިއުލް ނެރެފި އެވެ.
ޝެޑިއުލްގައިވާ ގޮތުން އޮސްޓްރޭލިއަން އޯޕަންގެ ފުރަތަމަ ބުރުގައި ޖޮކޮވިޗް ހޯމަ ދުވަހު ކުޅެން އޮތީ ސާބިއާގެ މިއޮމީރް ކެޗްމަނޯވިޗާ ދެކޮޅަށެވެ.
ޖޮކޮވިޗްގެ ވިސާ ކެންސަލްކޮށްލި މައްސަލަ ކޯޓަށް ހުށަހަޅައިގެން އޭނާ ކާމިޔާބު ހޯދި ނަމަވެސް އޭގެ އާ މައްސަލައެއް އޮސްޓްރޭލިއާ އިމިގްރޭޝަނުން ބަލަން ފެށުމާ އެކު ޖޮކޮވިޗް ވަނީ ކަން ހިނގާދިޔަގޮތް އޮޅުންފިލުވައިދޭން ބަޔާނެއް ނެރެފަ އެވެ.
އެ ބަޔާނުގައި ޖޮކޮވިޗް ވަނީ މިދިޔަ މަހު 16 ގައި އޭނާ ކޮވިޑަށް ޕޮޒިޓިވްވި ފަހުން އިންޓަވިއުއެއް ދޭން ކަރަންޓީނު ޕްރޮޓޮކޯލާ ހިލާފުވި ކަމަށް އެއްބަސްވެފަ އެވެ. އަދި ވިސާ ފޯމުގައި މައުލޫމާތު ފުރިއިރު، "އޮޅުމަކުން" ގޯހެއް ހެދިފައިވާ ކަމަށާއި އެކަން މިހާރު ވާނީ އޮސްޓްރޭލިއާގެ އިމިގްރޭޝަނަށް އޮޅުން ފިލުވައިދީފައި ކަމަށެވެ.
އޮސްޓްރޭލިއާ އިމިގްރޭޝަނުން ޖޮކޮވިޗްގެ ވިސާއާ މެދު އަމަލުކުރާނެ ގޮތެއް ކަނޑައަޅަން ބަލަމުން އަންނަ މައްސަލަ ލަސްވެގެން އާދިއްތަ ދުވަހުގެ ކުރިން ނިންމާނެ ކަމަށް އޮސްޓްރޭލިއާގެ މީޑިއާތަކުން ވަނީ ރިޕޯޓްކޮށްފަ އެވެ.
ޖޮކޮވިޗަކީ އޮސްޓްރޭލިއަން އޯޕަންގެ އެންމެ ކާމިޔާބު ކުޅުންތެރިޔާ އެވެ. އޭނާ ވަނީ ނުވަ ފަހަރު އެ މުބާރާތް ކާމިޔާބުކޮށްފަ އެވެ. އެންމެ ފަހުން ތިން ފަހަރު ވެސް އޮސްޓްރޭލިއަން އޯޕަން ކާމިޔާބުކުރީ ޖޮކޮވިޗް އެވެ.
މި ފަހަރުގެ މުބާރާތް ކާމިޔާބުކޮށްފިނަމަ ޖޮކޮވިޗަށް ޓެނިސް ތާރީހުގައި އެންމެ ގިނަ ގްރޭންޑްސްލޭމް ކާމިޔާބު ކުރުމުގެ ރެކޯޑް ގާއިމް ކުރެވޭނެ އެވެ. ގްރޭންޑް ސްލޭމްގެ ކާމިޔާބީގައި ޖޮކޮވިޗް މި ވަގުތު އޮތީ ރޮޖާ ފެޑެރާ އާއި ރަފައެލް ނަޑާލާ އެއްވަރުވެފަ އެވެ. ތިން ކުޅުންތެރިން ވެސް ވަނީ 20 ގްރޭންޑް ސްލޭމް ކާމިޔާބު ކޮށްފަ އެވެ.
