މުޅި ރާއްޖެ އަށް ހުޅުވާލައިގެން 2023/2024 ވަނަ އަހަރުގެ ދިވެހި ޕްރިމިއާ ލީގު ކުޅެން ނިންމާފައިވާއިރު، އެ މުބާރާތުގެ ކޮލިފިކޭޝަން ބައިގައި ރަޖިސްޓްރީވާން މިއަދު ރަސްމީކޮށް ހުޅުވާލައިފި އެެވެ.
އެފްއޭއެމުން 2023/2024 ވަނަ އަހަރު ދިވެހި ޕްރިމިއާ ލީގު ފުޅާކުރާއިރު، ރާއްޖެ ބެހިގެންދާނީ ހަަތަރު ޒޯނަކަށެވެ. ޒޯން އެކެއްގައި ހިމެނެނީ ހއ، ހދ، ށ، ނ، ރ އެވެ. ޒޯން ދޭއްގައި ބ، ޅ، ކ، އއ، އދ، ވ، މ، ފ، ދ ހިމެނޭއިރު، ޒޯން ތިނެއްގައި އޮތީ ތ، ލ، ގއ، ގދ، ޏ، ސ އެވެ. އަދި ޒޯން ހަތަރަކީ މިހާރު މާލޭގައި ކުރިއަށްދާ ފުރަތަމަ ޑިވިޝަނެވެ. މި ޑިވިޝަނުގައި ހިމެނޭނީ މާލެ، ހުޅުމާލެ، ވިލިމާލޭގެ ޓީމުތަކެވެ.
އެފްއޭއެމުން މިއަދު ނެރުނު އިއުލާނުގައި ބުނެފައިވަނީ، އާ ފޯމެޓާ އެއްގޮތަށް 2023/2024 ދިވެހި ޕްރިމިއާ ލީގުގެ ކޮލިފިކޭޝަން ފެށުމަށް ނިންމާފައިވަނީ އަންނަ މާޗް މަހު އެއް ވަނަ ދުވަހު ކަމަށެވެ. އަދި ކޮލިފިކޭޝަންގައި ބައިވެރިވާން އެދޭ ފަރާތްތަކުން (ޓީމުތަކުން) އަންނަ މަހުގެ ހަތް ވަނަ ދުވަހުގެ 14:00ގެ ކުރިން އެފްއޭއެމަށް ލިޔުމަކުން ހުށަހަޅަން ޖެހޭނެ ކަމަށެވެ.
މުބާރާތުގައި ބައިވެރިވުމަށް ލިޔުން ފޮނުވާއިރު، އީމެއިލްގެ ޒަރިއްޔާއިން ފޮނުވޭނެ އިންތިޒާމް ވެސް އެފްއޭއެމުން ވަނީ ހަމަޖައްސައިފަ އެވެ. އެ ގޮތުން އީމެއިލް ކުރަން ޖެހޭނީ league@famaldives.com އަށެވެ. މި އީމެއިލް ފިޔަވައި އެހެން މެއިލްތަކަށް ފޮނުވޭ ލިޔުންތައް ބަލައިނުގަނެވޭނެ ކަމަށް އެފްއޭއެމުން ވަނީ އަންގައިފަ އެވެ.
2023/2024 ދިވެހި ޕްރިމިއާ ލީގު ފޯމެޓް
ފޯމެޓަށް އަންނަ އެންމެ ބޮޑު ބަދަލަކީ މީގެއިން ކޮންމެ ޒޯނެއްގައި (އެއް ވަނަ، ދެ ވަނަ އަދި ތިން ވަނަ ޑިވިޝަން) ތިން ޑިވިޝަނެއް ކުރިއަށް ގެންދިއުމެވެ. ތިން ޑިވިޝަނަށް ޓީމުތައް ހޮވުމުގައި އެންމެ ފުރަތަމަ ބޭއްވިގެންދާނީ ރަށު ފެންވަރުގައި ބޭއްވޭ "އޯޕަން ޑިވިޝަން" އެކެވެ. އޯޕަން ޑިވިޝަނުގެ ބޭނުމަކީ ކޮންމެ ރަށެއްގައި ވެސް އޮންނަ ކޮންމެ ޓީމަކަށް (ކޮންމެ ޖަމިއްޔާ އަކަށް) ބައިވެރިވުމުގެ ފުރުސަތު ދިނުމުގެ ގޮތުންނެވެ.
ލީގުތަކުގައި ބައިވެރިވެވޭނީ ކޮމިޝަނާ އޮފް ސްޕޯޓްސްގެ ދަށުން ރަޖިސްޓްރީ ކުރެވި ގާނޫނީ ގޮތުން ވެސް ބަލައިގަނެފައިވާ ޓީމުތަކަށެވެ.
ދިވެހި ޕްރިމިއާ ލީގު 2023/2024 ވަނަ އަހަރު ފަށާއިރު އޮންނާނީ މި ވަގުތު ވެސް ޕްރިމިއާ ލީގުގައި އޮތް އަށް ޓީމުގެ އިތުރުން ހަތަރު ޒޯންގެ ޗެމްޕިއަނުންނެވެ. މީގެ ތެރެއިން މާލެ ޒޯންގެ ޗެމްޕިއަން ގޮތުގައި ކަނޑައަޅާނީ 2022 ވަނަ އަހަރުގެ ދެ ވަނަ ޑިވިޝަނުގެ ޗެމްޕިއަނުން ކަމަށް ވަނީ ނިންމައިފަ އެވެ. ދެން އޮތް ތިން ޖާގަ ލިބޭނީ ޒޯން ޗެމްޕިއަނުންނަށެވެ.
