އެފްއޭއެމްގެ ކުރީގެ އިމާރާތުގައި ކޮވިޑް ސާމްޕަލް ނެގުމަށް ސެންޓަރެއް ގާއިމުކޮށްފި އެވެ.
އެޗްޕީއޭއިން އިތުރު ސާމްޕަލް ސެންޓަރެއް ގާއިމުކޮށްފައި މިވަނީ ސާމްޕަލް ނަގާ ކިއުތައް ދިގުވެ، ސެންޓަރުތައް ތޮއްޖެހޭތީ އެވެ.
މިއަދު އަލަށް ގާއިމުކުރެވުނު ސާމްޕަލް ސެންޓަރުން މިއަދުން ފެށިގެން ކޮންމެ ދުވަހަކު މެންދުރުފަހު 2:00 އިން އިރުއޮއްސި 6:00އަށް ސާމްޕަލް ނެގުމުގެ ހިދުމަތް ލިބިގެންދާނެ އެވެ.
އިތުރު ސެންޓަރެއް ގާއިމް ކޮށް ހުޅުވާފައި މި ވަނީ މާލެ ސަރަހައްދުގައި ކޮވިޑަށް ޕޮޒިޓިވް ރޭޓް ފަސް ޕަސެންޓަށް ވުރެ މަތިވުމާ ގުޅިގެން ރަށްރަށަށް ދަތުރު ކުރާއިރު ޕީސީއާރް ހެދުން މަޖުބޫރު ކުރުމަށް ފަހު ދެ ދުވަހުގެ ލުޔެއް ދީފައިވާއިރު ކިޔޫ ދިގުވެ ބާރުބޮޑު ވެފައިވާ ދަނޑިވަޅެއްގަ އެވެ.
އެގޮތުން ކޮވިޑު ވެކްސިންގެ ޑޯޒްތައް ފުރިހަމަވެ 14 ދުވަސް ހަމަވެފައިވާ ފަރާތެއް ނަމަ ދަތުރުކުރުމުގެ 72 ގަޑިއިރު ނުވާ ޕީސީއާރު ނެގެޓިވް ނަތީޖާއެއް އޮންނަންޖެހޭނެ ކަމަށް އެޗްޕީއޭއިން ބުންޏެވެ.
އަދި ވެކްސިންގެ ޑޯޒްތައް ފުރިހަމަނުވާ ފަރާތެއްނަމަ، 14 ދުވަހުގެ ކަރަންޓީނު ފުރިހަމަކުރަންޖެހޭއިރު، ކަރަންޓީނުން ދޫކުރެވޭނީ 14 ދުވަހުގެ ކަރަންޓީނު ފުރިހަމަކުރުމަށްފަހު ޕީސީއާރު ޓެސްޓް ހަދައި ނަތީޖާ ނެގެޓިވް ވުމުންނެވެ.
ނަމަވެސް، މީގެތެރޭގައި މިފަދަ މީހުންނާއެކުގައި ދަތުރުކުރަންޖެހޭ ވެކްސިން ނުޖެހޭ އުމުރުގެ ކުޑަކުދިން ނުހިމެނޭނެކަމަށް ބުނެފައި ވެއެވެ.
ރާއްޖޭގައި އަނެއްކާވެސް ކޮވިޑުގެ ކޭސްތައް އިންތިހާއަށް މައްޗަށް ގޮސްފައިވާއިރު، ދުވާލެއްގެ މައްޗަށް ޕޮޒިޓިވްވާ މީހުން އަދަދު މިހާރު ވަނީ 300 އަށް ވުރެ މަތިވެފަ އެވެ.
