ރިޔާދް، ސައުދީ އަރަބިއްޔާ (ޖެނުއަރީ 8) - ސައުދީ އަރަބިއްޔާގައި ބަންދުކޮށްފައި ހުންނެވި އަމީރާ ބަސްމާ ބިންތި ސައުދު އާއި އެކަމަނާގެ ދަރިކަނބަލުން ތިން އަހަރަށް ފަހު މިނިވަންކޮށްފި އެވެ.
ޝާހީ އާއިލާ އަށް ނިސްބަތްވާ ދެ މެމްބަރުން ވެރިރަށް ރިޔާދްގައި ބަންދުކޮށްފައި ތިއްބެވި ސަބަބު ހާމައެއް ނުކުރެ އެވެ. އުމުރުން 57 އަހަރުގެ ބަސްމާ އަކީ އަންހެނުންގެ ހައްގުތަކަށް ގޮވާލާ އެކްޓިވިސްޓެކެވެ.
ބަސްމާ ހައްޔަރު ކުރެއްވީ މާޗް 2019 ވަނަ އަހަރު އެވެ. ސިއްހީ ފަރުވާ އަށް އެކަމަނާ ދޫކޮށްލަން އެދި އޭޕްރިލް 2020 ވަނަ އަހަރު ރަސްގެފާނު ސަލްމާން އާއި ވަލީއަހުދު މުހައްމަދު ބިން ސަލްމާން އަށް ހުށަހަޅާފައި ވެ އެވެ.
"ބަސްމާ ބިންތި ސައުދު އަލް ސައުދު އާއި އެކަމަނާގެ ދަރިކަނބަލުން ސުހޫދު ވަނީ މިނިވަން ކުރައްވާފައި،" އޭއެލްކިއުއެސްޓީ ފޯ ހިޔުމަން ރައިޓްސް ޖަމިއްޔާ އިން ކުރި ޓްވީޓެއްގައި ބުންޏެވެ.
"އެކަމަނާގެ ފުރާނަ އަށް ނުރައްކާވާ ސިއްހީ މައްސަލަ އަށް ފަރުވާ ކުރުމުހެ ހައްގު ފޯރުކޮށްދީފައެއް ނުވޭ. ބަންދުގައި ހުންނެވި މުއްދަތުގައި އެއްވެސް ދައުވާ އެއް ވެސް އުފުލާފައެއް ނުވޭ."
ބަސްމާ އާއި ދަރިކަނބަލުން މިނިވަން ކުރެއްވުމާ ގުޅޭ ގޮތުން ސައުދީ އަރަބިއްޔާ އިން ވަކި އެއްޗެއް ނުބުނެ އެވެ.
އާއިލާގެ ގާތް ބޭފުޅަކު ބުނި ގޮތުގައި ބަސްމާ ހައްޔަރު ކުރެއްވީ ސިއްހީ ފަރުވާ އަށް ސްވިޓްޒަލޭންޑަށް ފުރާވަޑައިގަންނަވަން ތައްޔާރުވަމުން ދަނިކޮށެވެ.
އެކަމަނާ އަށް ކުރިމަތިވެފައިވާ އާލާސްކަންފުޅާ ގުޅޭ އެއްވެސް މައުލޫމާތެއް މިހާތަނަށް ހާމަކޮށްފައެއް ނުވެ އެވެ.
ރަސްކަން ހިންގެވުމުގެ ކަންކަމާ ވަލީއަހުދު މުހައްމަދު ޖޫން 2017 ވަނަ އަހަރު ހަވާލުވެވަޑައިގެންނެވި ފަހުން ގެންދަވަނީ ގިނަ އިސްލާހީ ބަދަލުތަކެއް ގެންނަމުންނެވެ.
އެގޮތުން އަންހެނުންނަށް ކާރު ދުއްވުން މަނާކޮށްފައި އޮތް އޮތުން އުވާލައި، އަންހެނުންގެ "ބެލެނިވެރި" ފަރާތަކީ ފިރިހެނުން ކަމަށް ކަނޑައަޅާފައި އޮތް އޮތުން އުވާލާފައި ވެ އެވެ.
ނަމަވެސް އިދިކޮޅު ފިކުރުގެ މީހުންނާ ދެކޮޅަށް ހިންގާ ހަރަކާތްތައް ސައުދީ އަރަބިއްޔާގައި ވަނީ އިތުރުވެފަ އެވެ. އެގޮތުން ސިޔާސީ މީހުންނާއި، ދީނީ އިލްމުވެރިންނާއި، އެކްޓިވިސްޓުންނާއި ޝާހީ އާއިލާގެ މެމްބަރުންނަށް ވެސް ފިޔަވަޅުތައް އަމާޒުވެފައި ވެ އެވެ.
ބަސްމާ ބަންދުގައި ހުންނެވީ އަލް ހައިރް ޖަލުގަ އެވެ. އެ ޖަލުގައި ގިނަ އަދަދެއްގެ ސިޔާސީ ގައިދީން ބަންދުކޮށްފައި މިހާރު ވެސް އެބަ ތިއްބެވެ.
އެކަމަނާގެ އާއިލާ އިން އދ. އަށް ލިޔުމުން ފޮނުވި ބަޔާނެއްގައި ބުނީ ހައްޔަރު ކުރި މައިގަނޑު ސަބަބެއްގެ ގޮތުގައި ބެލެވެނީ އަނިޔާވެރިކަމާ ދެކޮޅަށް ވާހަކަދެއްކެވުން ކަމަށެވެ.
އޭގެ އިތުރުން ވަލީއަހުދު މުހައްމަދުގެ ކުރިން އެ މަގާމުގައި ހުންނެވި މުހައްމަދު ބިން ނާޔިފްއާ ގާތް ގުޅުމެއް އޮންނެވުމަކީ ވެސް ހައްޔަރު ކުރި ސަބަބެއް ކަމަށް ފާހަގަކޮށްފައި ވެ އެވެ.
