އެފްއޭއެމް ވިމެންސް އިންވިޓޭޝަން ކަޕްގައި މިއަދު ހަވީރު ކުޅުނު މުބާރާތުގެ ފައިނަލް މެޗުގައި އެޕެކްސް ސްޕޯޓްސް ކްލަބް 1-0 އިން ބަލިކޮށް ޑޮޓްކޮމް ސްޕޯޓްސް ކްލަބުން މުބާރާތުގެ ޗެމްޕިއަންކަން ހޯދައިފި އެވެ.
އެފްއޭއެމުން ވަނީ އިންވިޓޭޝަނަލް މުބާރާތްތަކެއް ލ އަތޮޅާއި ހދ. ކުޅުދުއްފުށި އަދި ފުވައްމުލަކުގައި ވެސް ބާއްވަން ނިންމައިފަ އެވެ. އަދި. މާލޭގައި ފުރަތަމަ ޑިވިޝަނުގެ އަށް ޓީމުގެ މެދުގައި އަންހެން މުބާރާތުގެ ބައެއް ކުޅޭނެ އެވެ. މި ފަސް ބައިގެ ޗެމްޕިއަނުން މާލޭގައި ފައިނަލް ބުރެއް ކުޅުމަށް ފަހު ރާއްޖޭގެ އަންހެން ޗެމްޕިއަނުން ހޮވާ ގޮތަށް ވަނީ ނިންމައިފަ އެވެ. ޅ. އަތޮޅުގައި ބޭއްވި އިންވިޓޭޝަން ކަޕް ކާމިޔާބުކޮށް، ފައިނަލް ބުރުގެ ފުރަތަމަ ޖާގަ ހޯދީ ޑޮޓްކޮމް އިންނެވެ.
ޅ. އަތޮޅުގެ މުބާރާތުގެ ލީގު ބުރުގައި އެޕެކްސް އިން ވަނީ ޑޮޓްކޮމްގެ މައްޗަށް 2-0 އިން ކުރިހޯދައިފަ އެވެ.
ނައިފަރު ދަނޑުގައި މިއަދު ހަވީރު ކުޅުނު ފައިނަލް މެޗަށް ނުކުމެ، އެޕެކްސް އިން ގިނަ ވަގުތު ބޯޅަ ހިފަހައްޓައިގެން ކުޅެ، ގޯލު ޖެހޭތޯ މަސައްކަތްކުރި އެވެ. އެކަމަކު، އެ ޓީމުން ގޯލު ޖަހަން ކުރި މަަސައްކަތް ކާމިޔާބެއްނުވި އެވެ.
ޑޮޓްކޮމް އިން މިއަދުގެ މެޗުން މޮޅުވީ މެޗުގެ ފަހު މިނިޓްގައި ގޯލު ޖަހައިގެންނެވެ. ކޯނަރަކުން ޝަހުލާ ތައުފީގު ފޮނުވާލި ބޯޅަ ދިފާއުކުރަން އުޅުމުގެ ތެރޭގައި އެޕެކްސްގެ ފާތިމަތު މިއުޝާ ފައިގައި ޖެހިފައި ވަނީ ބައިކޮޅަށެވެ.
ލީގު ބުރުގެ ވަނަ ޓީމުގެ ގޮތުގައި ފައިނަލަށް ދަތުރުކުރި ޑޮޓްކޮމް އިން މުޅި މުބާރާތުގައި ކުޅުނު ފަސް މެޗުގެ ތެރެއިން ބަލިވީ ލީގު ބުރުގައި އެޕެކްސް އަތުން އެކަންޏެވެ. އޭގެ ބަދަލުހިފައި ފައިނަލުން ޑޮޓްކޮމް މޮޅުވީ އެވެ.
ފައިނަލް މެޗުގެ މޮޅު ކުޅުންތެރިޔާގެ މަގާމާއި މުބާރާތުގެ އެންމެ މޮޅު ކުޅުންތެރިއަކަށް ހޮވުނީ ޑޮޓްކޮމް އަށް ކުޅޭ ގައުމީ ޓީމުގެ ޝަހުލާ އެވެ. އެންމެ ގިނަ ގޯލު ޖެހީ އެޕެކްސްގެ މިއުޝާ އެވެ. މިއުޝާ ވަނީ މުބާރާތުގައި ޖުމްލަ އެއްކޮށް 11 ގޯލު ޖަހައިފަ އެވެ.
މުބާރާތުގެ ފެއާޕްލޭ ޓީމަކީ ކުރެންދޫ އެފްސީ އެވެ. ކުރެންދޫ އަށް ފައިނަލުގެ ޖާގައެއް ކެޓީ ލަނޑުގެ ތަފާތުންނެވެ.
ނައިފަރުގައި ކުރިއަށް މިދިޔަ އިންވިޓޭޝަން ކަޕް އެންމެ ފުރަތަމަ ރޭވީ ހިންނަވަރު ވެސް ލައިގެންނެވެ. އެކަމަކު، ފަހު ވަގުތު ހިންނަވަރުގައި ކޮވިޑް-19ގެ ހާލަތު ގޯސްވެ، އެ ޓީމަށް ޖެހުނީ މުބާރާތުން ވަކިވާށެވެ.
